Hiobe 12

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Hiobezi dâŋ okacne kecʒiŋuc bâtikie‐jarewec:

²“Jâmbomac, ŋoŋe ŋic sasawa jaŋere mic mecne, irec ŋoŋe juku hâmopie maŋɋârâŋzi ŋoŋehec mâmâc omaeocmu.

³Manaŋgopieŋ, no ŋoŋere sâc mamanahec jaha juekopac, no ŋoŋere wahamicne aricne; ŋoŋe dâŋ muŋgopieŋ i mozi moc kâuc baekac?

⁴No ŋic tiŋne â bahac fâsâc juekopac, erâ ine âgofâc‐nane ŋoŋe sifu âke sisic enarehuc gâgâwi enareŋgopieŋ. Noni hâcne Anutu numucnepe mana‐nare jujec.

⁵Ŋoŋe ʒârâ ʒâpâ tâmiric jueŋgopieŋzi no qaisocnuhuc mu ruruc enareŋgopieŋ, erâ no biac rândiŋkezo ehape waha qazejec muhuc tuŋnuŋgopieŋ.

⁶Fiuc roro â miti tâmiric jaŋe ine tâpiri‐jeŋicte manapie Anutu‐jeŋic eha wama faio jueŋgopieŋ.

⁷“Ŋoŋe qowi jaŋe wio‐jarepie ŋaza qazuc eniŋmu, me sawa wipe jaŋe wio‐jarepie ŋazaniŋmu jaha.

⁸Ŋoŋe mâreŋ qowi mecne, hâwec qowi mecne mu wioc ejarepie maŋɋârâŋte fuŋne ŋaza qazuc eniŋmu wâc.

⁹Anutuzi wiac sasawa bâfuac‐jopa‐fârewec i jaŋe kâuc mi baŋgopieŋ.

¹⁰Anutuzi hâcne wiac jujune sasawa hone soŋaŋ ejareekac, â ŋic nâŋâc ʒeŋgoma ere tâpirio jufâreeŋgopeneŋ.

¹¹Nânâ i aŋacnehec me aŋac tâmiric muhuc nâhoneeŋgopeneŋ, irec sâc jaha hazec‐nâŋeczi dâŋ manarâ mana wosâc enʒepeneŋ.

¹²Ŋicraŋɋa jaŋe maŋɋârâŋhec â ŋicqizec jaŋe mamana tarahec.

¹³“Anutu e ine maŋɋârâŋ â tâpiri rune, e hâcne mamanasu â mamana tara‐ticnehec.

¹⁴Eki fic moc hetâtieme mozi heɋârerâ baocmu? Me ŋic moc kâpâcwâru bahame mozi bataraocmu?

¹⁵Eki hoe aka hecneme opâ jaŋe kereŋke‐fâreniŋmu, erâ ekizia wâc mume rumi fisirâ mâreŋ qofackehuc âke dumeocmu.

¹⁶Anutu e tâpiri â sasanaŋ‐ticnehec, eeatuc ŋic â ŋic eatuc‐jopakicne jaŋe mâmâc ere rurumaŋko juŋgopieŋ.

¹⁷E ŋic fekicne jaŋere maŋɋârâŋ qame wahaekac, â mumutara ŋic maŋmutuc bacjopaekac.

¹⁸E ŋicwofuŋ jaŋe eri ŋeŋe‐jeŋickonec tuŋjoparâ kâpâcwâru bacjopaekac.

¹⁹E taha bapa ŋic ŋaqi qoruc hetara‐jareekac â ŋic tâpirihec bawahac‐jopaekac.

²⁰E dâŋ mumu ŋic bâniniŋ‐jopaekac, â ŋicraŋɋa maŋɋârâŋ jowac roekac.

²¹E ŋic qac momori jaŋere faio aaric‐ticne hoŋkeme feekac, â mâreŋte guriŋ bapa jaŋere tâpiri wâc qame wahaekac.

²²E wiac soŋsoŋko fokac i hewirickeekac, â duŋdapâc qisiric fokac ira tatamac‐ticne bâfuaekac.

²³E ŋic gurune gurune basawec‐jopahuc basanaŋ‐jopaekac, erâ ekizia wâc bawahac‐jopahuc bâsirowec‐jopaekac.

²⁴E guriŋ bapafâc‐jeŋic mutuc bacjopaekac, ehuc maŋ bâsifuc ejareme qac qâsoric ehuc jueŋgopieŋ.

²⁵Iŋuc ejareme dapâcko babarâ juhuc biric boroc erâ maŋjeŋic omaeekac.