Job 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hein neuǥet migkaǥi si Job te mibmehey sikandin ke maan is neetew pa sikandin.

²Ke sikandin te,

³“Edrewakan ku is andew te kegkeetew ku.

⁴Deyzey pa ke mibmerusirem en haazà he andew ne wazè en silai te andew. Wazè en heini pezem tentenuzi te Megbevayà diyà te langit.

⁵Deyzey ke netembunan en haazà te kerusireman etawa mekepal he ǥapun, ne netenges en pezem te kerusireman is kerayag din.

⁶Deyzey ke nehimu he merusirem he kezukileman is ked-enaka kedì, ne wazè en haazà pezem mekeragkes diyà te pitsa te kelindar.

⁷Deyzey ke wazà ad meetew zutun he kezukileman, wazè en pezem nelipey zutun he timpu.

⁸Deyzey ke rewaki haazà he kezukileman te edrawak he metau he ebpukew te dragun he egngezanan te Leviatan.

⁹Wazè en pezem medsiǥa is mekevugwas dutun he andew wey wazè en mebmeselem.

¹⁰Edrewakan ku haazà he andew su wazè din eǥena is ked-enaka kedì su wey ku kenè en meseǥazi heini he menge kemeresayan.

¹¹“Deyzey pa ke minatey e en diyà te ǥetek te iney ku.

¹²Maan is nesepipi e pa wey ingkepesusu e pa te iney ku?

¹³Emun pezem minatey ad dutun he timpu ne melinawen ad pezem guntaan, he midlipezeng wey midhimeley

¹⁴duma te menge hadì wey menge pengulu te kelibutan he mibangun te menge turuǥan hein kaazen dan pa.

¹⁵Nekehimeley ad pezem duma te ebpemendumala he nepenù te vulawan wey pelata is menge valey zan.

¹⁶Deyzey pezem ke neiring a te menge vatà he nemematey zutun te ked-enaka kandan, ne inleveng he wazè en mekaahà te kerayag.

¹⁷Diyà te lugar te menge minatey, is menge lalung kenè en ebaal te kelelalung, ne is nengeveley nemekehimeley en.

¹⁸Dutun he lugar, is menge vinihag ebpeeyehey en ne kenè dan en egkezineg is kegkulehia kandan te menge etew he ebpeǥes kandan ebpeterebahu.

¹⁹Ne zutun he lugar is langun he klasi te menge etew, bentuǥan etawa kenà. Is menge uripen, kenè en egkeveyveyaan te menge egalen dan.

²⁰“Maan is edtuǥutan pa he meuyag is etew he egkerasey wey egkeseeng?

²¹Egkesuat sikandan he ebpatey, piru wazè dan mebpatey. Ebpen-ahaan dan is kemetayen subra pa te kebpen-ahà te etew te ketiǥeyunan he nekeeles.

²²Wey sikandan ebmelipayen emun ebpatey zan en wey igkeleveng dan en.

²³Maan is edtuǥutan he meuyag is etew he wazè din man hanew ke hengkey is egkepengkusan din? Ketau te Megbevayà he kenà metueni te etew is diyà te huziyan he egkehitavù kandin.

²⁴Kenà a ebpekekaan tenged te subra he kegkeseeng, kenè en egkeengked is kebpekezag-es ku.

²⁵Is merasey he egkeulaula he igkahandek ku ne nehitavù en kayi te kedì.

²⁶Wazè ku kelinew wey keeyehey. Kenà ad ebpekehimeley su layun dà kesamuk is egkehitavù kedì.”