Job 3

1

2

3

4

38

40

42

¹Wiki tagogi au murina Job gamona i laḡi ma ana tupua marana i parivaiapoapoeni.

²I pa,

³Au tupua marana ma boai, ma waguvaraina i vinolanola da tevera orotona i tupua.

⁴Nai marana ina waguvarei! Ma God au aidamo wei marana ina nota-tawanei, ma au tepana eḡa ina rarana.

⁵Waguvara ma gimtona potopotona wei marana ina vibadei; ma lada marana ina purui ma gimtona lalalaina ina purui.

⁶Gimtona nai waguvaraina ina viamoai wei marana eḡa ma iava-melei; madeḡana bo nawaravina.

⁷Nai waguvaraina eḡa aiai ina tupua, ma eḡa nuaiai gararana ina nonori.

⁸Vijiboḡa amamai, mepa da ai vijiboḡa boga bariawana ina vidagui; taui wei marana ina vijiboḡi.

⁹Maratomtom ubonana ina ḡuvai ma mara karena ina paina-avei ma madeḡa vuduna eḡa ina inanai.

¹⁰Aubaina taui manawa metaetana eḡa ita gudui ma vita maḡamaḡaui i vereu.

¹¹Airake, boiboḡi ita gomuiu! Bo ata i ʼraḡe maranai a tuputupua.

¹²Aiwai aubaina au arona i vimataveniu ma ḡuḡunei i viḡuḡuiu?

¹³Maranaina a tupua, matau ita pota; ma ata matave ma ata vilauvitau.