1Beee gbɛra Ayuba lɛ́ wɛ̃̀ à yã zaaa ò a igurↄↄ musu
2à bè:
3Luda ma igurↄↄ kɛ pã atɛ̃nsa gwãavĩ kɛ̀ wà ma nↄ̀ sì pì.
4Gurↄↄ pì li gusiaa ũ, zaa musu Luda tón à yã daro, àton tó guu puaro.
5Gusia kũ níginigi gurↄↄ pìa, ludambɛ siaa kúɛa, gusia bìtim daàla.
6Gwãavĩ pì sↄ̃ sia kũ níginigi, wàton da wɛ̃̀ gurↄↄnↄ tɛ́ dↄro, wàton naro mↄ gurↄↄnↄ guuro.
7Gwãavĩ pì kɛ gwãavĩ fĩi ũ, guda tóngↄ̃ dↄ gurↄↄ beeearo.
8Pↄ́dammari kɛ̀ aↄ̃è tó ↄfãntɛ̃ guu puroonↄ láari kɛ gurↄↄ pìa, gbɛ̃ kɛ̀ aↄ̃ↄ dↄ̃ lán wè ↄ ká kùkukuzi pìnↄ.
9À gudↄnao sↄsↄnɛnↄ sia kũ, weé à gudↄna dã pã, guwɛɛ é kɛ̃ro.
10Zaakɛ gurↄↄ pì e ma da nɛ́'isↄ zɛ́ tatamalɛro, à tò ma wɛ́ɛ sì nawɛ̃alɛ.
11À kɛ̀ dia wèe ma i gɛ̀ ũroo? Bↄ́yãnzi mɛ́ɛ bↄ gbɛɛɛn ma sↄkpa gↄ̃ↄroo?
12À kɛ̀ dia wà ma kpa gbálaa? Bↄ́yãnzin wà yↄ̃ kpàma má mìzi?
13Tó ma ga yã, lɛ ma gↄ̃ kítikiti, lɛ ma ii ò ma kámma bò
14kↄ̃n kínanↄ kↄ̃n anduna guu lɛ́dammari kɛ̀ aↄ̃ kíbɛ ziinↄ kɛ̀kɛ wà bò ń zĩndanɛnↄ,
15wɛ̃ɛnɛ kɛ̀ aↄ̃ vura kàkↄ̃ańzinↄ bensↄ̃ aↄ̃ kondogi kà ń kpɛ́n à pà.
16À maa yã wà ma vĩi lán nↄ̀bↄɛnɛ bà, lán nɛ́ kɛ̀ mↄ̀ gɛ̀ ũ èe anduna eroo bà.
17Gwen zaakɛrinↄ è ń zaakɛna tón bensↄ̃ gbɛ̃ busananↄ è kámma bon.
18Zĩ̀zↄnↄ è ĩampakii e gwe, aↄ̃è ń wɛ́ɛtãmmarinↄ kòto ma dↄro.
19Gbãadeenↄ kↄ̃n talakanↄↄ kú gwe ń píngi, bensↄ̃ zↄ̀ ègↄ̃ dɛ a dii pↄ́ ũ gwe dↄro.
20Bↄ́yãnzi Luda è guu pu wɛ̃ndadeenↄnɛzi? À kɛ̀ dia è wɛ̃̀ndi kpá gbɛ̃ kɛ̀ aↄ̃ pↄↄ siaanↄa?
21Aↄ̃ wɛ́ɛ ègↄ̃ dↄ gaazi aↄ̃è ero, aↄ̃è kpáɛ kɛzi dɛ auziki kɛ̀ utɛnala.
22Tó aↄ̃ gà wà ń vĩi, aↄ̃è pↄnnaa kɛ, aↄ̃ nↄ̀sɛ è kɛ nna.
23Luda ń zia yã ùtɛńnɛ, à kara lìgańzi kpa sãnda píngia.
24Wesakakↄ̃a à bo bé à gↄ̃̀ ma pↄ́blee ũ, ma m̀bona è yãaro.
25Yã kɛ̀ ma vĩa kɛ̀nɛ pì bé à ma le, yã kɛ̀ ma kã gìzi pì bé à sùma.
26Má ĩampana vĩro, ma làakari kpaɛnaro. Má kámmabona vĩro, ma nawɛ̃akɛna è yãaro.
