Hiobe 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Suhiŋic Bilidadi e Hiobe dâŋ kecʒiŋuc bâtikiecnewec:

²“O Hiobe, ŋic go iŋucne jaŋe niniŋkerâ dâŋemâc moc sâcne mi ŋeniŋmu me? Go dâŋ moc beherâ hazec râehaŋtec dâŋ gazanʒapeŋ me!

³Go wemocte nâŋere manatec bulimakao jaŋere sâc mutuc matacne eŋgopeneŋ tinac ekac?

⁴Manakic, go gahacne aariczi bâʒâicgukac. Me mâreŋzi gore erâ tuhutac sâcne fuarâ foocmu? Me tiki jaŋe gore jâmbâŋ erâ moc ŋerârieniŋmu me?

⁵“Ŋic sindaŋnere ʒoc tatamac bâhâponiŋmu, eme mocwâc mi bâruŋkeocmu.

⁶Ficboze‐ticnao tatamaczi herisieme dapâc eocmu, â lambe‐ticne domakac i ficne hâponiŋmu.

⁷E âte sanaŋkeweczi âte qindoc ekac, â e jahacne dâŋzi bitiŋ ecneha raʒime kikac.

⁸E jahacne kikezi ecneme rândiŋkerâ uficko jowakac, erâ wâc kike‐ticnezia fâreme nombâŋko hukac.

⁹E bitiŋzi kike‐ticne rorâ basanaŋkekac.

¹⁰E wiwitic soŋsoŋko râekicne i bâfuame rokac, â hatagâŋ‐ticnao nombâŋ ropie hukac.

¹¹E hata raekac sâc wiac hâhâwicnezi orâŋ bârâŋ ecnehuc kikeo kikeo ecneekac.

¹²E moneŋ mafa sâko focneweczi nânâre hâmo sipiric ekac, â sisipiriczi rârec bârârec woŋec‐ticne fokac.

¹³Wic ukicneheczi sahac‐ticne sâcke‐fâreme me kike‐ticne gârecke ʒaŋ ekac.

¹⁴E ficboze‐ticnao juhâmoweckonec fâre ferâ ŋicwofuŋ moc ʒâŋene Hâmoc ere maŋfuŋko râeŋgopieŋ.

¹⁵Erâ ficboze‐ticne opâsic â saifezi ʒure emasaŋ epie ŋic furune jaŋe ira ŋec juc eniŋmu.

¹⁶Mâreŋmaŋko gâtâ‐ticne kereŋkeme hâmokac â tieŋ taeŋnezi ɋaŋa ururuc ekac.

¹⁷Ʒâŋe biŋe‐ticnezi bembeŋko mecne ʒoricko mecne rârâŋne‐fârekac, ehame ŋic moczi moc ere mocwâc mi manasukac.

¹⁸E ŋic ŋondeŋkonec tuŋkepie raocmu, â tatamac‐ticne sârockepie dapâcko huocmu.

¹⁹E ɋâricfâc‐ticne moc mi fuarâ juniŋmu, â fic hae‐ticnao ʒâŋetucfâc‐ticne wâc omaeniŋmu.

²⁰Ʒoaŋ wewefunao me huhunao jueŋgopieŋ jaŋe biŋe‐ticne manarâ gâgâmârâhuc bipic tatara ejareocmu.

²¹Ŋic sindaŋne jaŋe iŋuc hâcne fua‐jareocmu, jaŋe Anutu tatara ecneeŋgopieŋte wiac iŋuc hâcne fua‐jareme omae‐fâreniŋmu.”