Hiobe 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hiobe e iŋuc mume Temaŋŋic Elifaʒizi dâŋ okacne kecʒiŋuc bâtikiecnewec:

²“Ŋiczi Anutu bafickepene erao wiac bibiaŋkene i moc fokac me? Aricne, ŋiczi maŋɋârâŋhec juipiehuc sifu Anutu babafickene i mi fokac.

³Anutuzi tiŋne jujuge irec maname moc biaŋkeocmu? Me bahac fâsâc jucmu izi sâcne moc bafickeocmu?

⁴Go araŋ bacnehuc juekicte dâŋgieo râecguhuc qa bâtiŋ egarekac me?

⁵Aricne, go hehesicge guru sâko, â kiŋge tatara tâmiric fokacte iŋuc egarekac.

⁶Go qomâfâcge jaŋerao tofage fowec i bazu‐gareniŋte woŋec juhuc ŋaqi qoruc wiac‐jeŋic jowac rotec biuctac erâ jumbiŋ.

⁷Go nânâre hâmohuc docke betaŋ embiŋ jaŋe nânâ opâ jare gumec mi emeŋ.

⁸Go ŋic tâpirihec â ʒâŋe biŋehec jumeŋte mâreŋ furu jaha ro rauc emeŋ.

⁹Go hozec jaŋe hone bafic mi ejaremeŋ, â bekâ mâsiŋ jaŋe bâʒâic‐jopahuc wâcwiac‐jeŋic jowac romeŋ.

¹⁰Eme irec hâcne wiwiticzi rârecguhuc foha honerâ ututuŋ jaha bipic tatara egarekac.

¹¹Tatamacgezi herisierâ dapâc eha wiac moc mi honekomec, â opâ rumizi qâurucguzo ekac.

¹²“Anutu e sambâŋne sambâŋne jowaru‐fârerâ faic jâmbâŋ jukac, ehuc bâpiŋ faic jaha ŋeraŋgopieŋ jaŋerao mi fime wahaekac me?

¹³Goki ine ʒiŋuc mu wioc ekomec: ‘Anutuzi wemo wiac moc manaekac? E karoraczi foŋkeha fimârâŋkehuc honec‐nâporâ dâŋnâŋec sâcne mutaraocmu me?’

¹⁴Erâ wâc ʒiŋuc manasukomec: ‘E sambâŋ â mâreŋ jahere ŋoŋondeŋko rac warec ehuc karorac ɋâfoŋnezi sâockeme mi honec‐nâpoekac.’

¹⁵Go ŋic sindaŋne jaŋe hata raŋɋa‐jeŋic bâjâpe ware jumbieŋ ijaha âtecmurâ mukomec me?

¹⁶Manakic, jaŋe dameŋ‐jeŋic mi maickeha omae‐fârembiŋ, rumizi rocjopame hâmo miziec efârembiŋ hâcne.

¹⁷Jaŋe Anutu ʒiŋuc âzâcnembiŋ: ‘Go behec‐nâpoc,’ erâ ʒiŋuc manambiŋ wâc: ‘Anutu e bapafârezi juipiehuc iŋuc me iŋuc sâcne mi enâreocmu.’

¹⁸Iŋuc muhapie Anutuzi sifu jaha mafa mâriri bâfua‐jareme juhâmombiŋ. No ine ŋic sindaŋne jaŋere dâŋ mana maŋ mi ezepac.

¹⁹Ŋic sindaŋne jaŋe bâbâtiŋ fua‐jareme ŋic biaŋne jaŋe honec‐joparâ bubiaŋ manaeŋgopieŋ, â bahac tâmiric jaŋe gâwie‐iareeŋgopieŋ.

²⁰Jaŋe ʒiŋuc muhuc iŋuc eeŋgopieŋ: ‘Kisâfâc‐nâŋec jaŋe imac‐jopakicne, â wiac fojarewec i ʒoczi ʒâseŋke‐fârewec.’

²¹“O Hiobe, go manac: Go Anutu râsi mocwâc mi ecnehuc ehec maŋ mocjaha erâ juzepirec; go iŋuc etec jambuŋgume juhâc qâhâmocmu.

²²Micticnaonec mu qaqazuc dâŋ wahame manazemec, ehuc dâŋticne mana maŋ erâ juzemec.

²³Go Anuturao risiehuc maŋhuhuŋ juzemec, ehuc ficgao wiac hehesicne ebac eeŋgopieŋ i bârârietec arictac ezejec.

²⁴Go gol wiac fogarekac i behetec omaezejec, â Ofiri mâreŋkonec gol i opâo qânâ ŋerakac jaŋere ŋondeŋko hefacketec rârâŋnezejec.

²⁵Go Anutu bapafâregere manatec furi sâko ezejec, eme eki gol â siliwa guru sâko irec sâc egarezejec.

²⁶Go iŋuc ehuc erao roweckecmuo ine ʒiŋuc mana taracmu: Eki hâcne ʒeri bubiaŋ fârine bâfua‐nareekac.

²⁷Erâ e numucnetec mana‐gareocmu, â mumupaŋ dâŋ mumeŋ i wâc soŋaŋkehuc jucmu.

²⁸Go gie batec fârinehec efâreocmu, â tatamaczi hatage batamaeocmu.

²⁹Anutuzi ŋic maŋfefehec bawahac‐jopaekac, â maŋhuhuŋ jueŋgopieŋ jaŋe ine bâpiaŋ‐jopaekac.

³⁰Go bahac tâmiric jucmu ehuc wiac ebac etec sâckeocmuo ine Anutuzi ʒârâ ʒâpâonec bataracguocmu.”