Hiobe 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elifaʒizi dâŋ iŋuc âzâcneme Hiobezi dâŋ okacne kecʒiŋuc bâtikiecnewec

²“No dâŋ keciŋucne mârâc jaha biac mana‐fârepo, ŋoŋe ine mu bâmiriŋ enarezo muhuc mâc bâʒâicnuŋgopieŋ.

³Ŋoŋe dâŋ racne muŋgopieŋ i wezimucko moc beheniŋmu? Me wemo wiaczi maŋbâiŋ eŋareha dâŋ keciŋucne sasawa boc bâtikie‐nareŋgopieŋ.

⁴Manaŋgopieŋ, no ŋoŋere sâc jurâ muzac ine ŋoŋe dâŋ mufâreŋgopieŋ ijaha wâc muzo murâ muzapo. Erâ dâŋ muŋgopieŋ irec qâtâc heŋarehuc dâŋ wokemaŋ bocjaha eŋare raku dâŋŋeŋic qazo murâ qazapo.

⁵Erâ ŋifec ine dâŋ ŋazahuc hâbi sâcne qazu‐ŋarezapo, ehuc dâŋ murahuc jaha bâmiriŋ‐ŋopazapo wâc.

⁶“Eme ʒi dâŋ i me i mupe ʒâic‐nanezi sifu mi behecnuocmu, â niniŋkerâ dâŋemâc ŋehuc wâc mi afeckepemu.

⁷Anutu e tâpiri‐nane bâomaewec, ehuc otâ ŋokâfâc‐nane qâhâmoc‐jopawec.

⁸E râsi enarehuc ro basanaŋ enarewec, irec sahac‐nane waha‐fâreme siec sawa ekopac, â ŋic jaŋe honecnupie kiŋhec jukopac tinac ekac.

⁹Anutu e nore aaric manahuc bâsuc qâsucnuekac, erâ mic kizu‐narehuc ʒâŋe bâbâroŋ honecnuekac.

¹⁰Ŋic jaŋe mu ruruc enareeŋgopieŋ, erâ orâŋnu‐fârehuc me tatapezi mauc‐naneo nueŋgopieŋ.

¹¹Anutuzi ŋic sindaŋne jaŋerao qikiŋnuwec, â ŋic hehesicne jaŋere meo râecnuwec.

¹²No wama faio juhâmopo, ehame Anutuzi ine upe‐naneo rocnurâ qa tutuŋ enarehuc qanʒaŋnuwec. E tepe motec‐ticnezi murucnuocte ma âkendâŋnuwec.

¹³E orâŋ bârâŋ enarehuc tepe motec qâtâcneme sahac‐nane kimârâŋkehuc sipiricke‐fâreekac.

¹⁴E ʒuʒuhuc jaha ʒâpâ nume soc ruahuc foekopac, e momori ŋic jaŋe râsifâc‐jeŋic jopaeŋgopieŋ irec sâc enareekac hâcne.

¹⁵No makuc barâ mateŋ qonaŋkerâ jukopac, erâ tâpiri‐nane omaeme ʒafe ruarâ ŋekopac.

¹⁶No kio wâwâsic epe ʒâŋe mai‐nane bâruŋkewec, â ʒâŋe hâpi‐nane siwiŋnerâ kitutuckewec.

¹⁷Erâ no wiac sindaŋne moc mi bâfuapo, â Anuturao nunumu i maŋɋaɋac juhuc numuekopac.

¹⁸“O mâreŋ, go wiac gâgâpâcne maŋgâŋ enarekicne i mi hesoŋkezemec, â dâŋnane mutiŋneniŋte kio wâwâsic egarepe mi bâniniŋnuzemec.

¹⁹Manaŋgopieŋ, sambâŋko mumutiŋ ŋic moc jukac eki hâcne baficnuhuc dâŋnane mutiŋne‐jâmbâŋkeocmu.

²⁰No âgofâc‐nane jaŋe sâke kiki enarehapie Anutuzi ʒâŋeuc‐nane honehuc nunumu‐nane manaocte mukopac.

²¹Ŋic moczi âgo‐ticne bafickehuc dâŋgieo dâŋticne dopeckeekac, irec sâc moczi moc Anuture maio nore dâŋ dopeckeocte enarekac.

²²No jara‐nane afecne sawa fokac, i tarame hata rapemu irecnec mocwâc ririsiene mi fokac.