Hiop 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, Hiop a popuetä le kapas o otteki ewe rän a uputiu lon.

²Iwe, a apasa,

³“Amwo ewe rän üa upulong lon epwe morola, pwal ewe pwin, lupwen eman a apasa, ‘Eman ät a uputiu.’

⁴Amwo ei rän epwe rochopwak, amwo Kot mi nom läng esap ekieki usun, nge saram esap tinetiu won.

⁵Amwo toputop me rochokichin rochopwak epwe nemeni ei rän, pwal kuchu repwe nonom won, nge rocholan akkar epwe pwal fis lon.

⁶Amwo rochokichin rochopwak epwe turufi ei pwin. Amwo esap alealong lein ekewe ränin ier, esap pwal pachelong lein ekewe ränin maram.

⁷Iwe, ei pwin epwe pön, esap wor eman epwe rong mweireiren pwapwa lon.

⁸Ekewe sourong mi sile pöüt ngeni rän repwe pwal pöüt ngeni ei rän, ir chokewe mi sip le apwätäi ewe Lefiatan .

⁹Amwo ekewe fün rän repwe rochopwak. Ei pwin epwe ösüküsükü saram, nge esap war, esap fokun küna saramen ünümweerän,

¹⁰pun esap pineela letipen inei, esap pwal aopala riaföü seniei.

¹¹Pwota üsap mäla le uputiuei? Pwota üsap mäla, lupwen üa towu seni letipen inei?

¹²Pwota inei a anomuei won afön, nge pwota a aoupuei?

¹³Are üpwe mäla lon na fansoun, üpwe kinamwe ikenai. Üpwe annut o asösö

¹⁴fiti ekewe king me souöüröüren fanüfan, ra aüetä imwer fän iter mi tala ikenai.

¹⁵Üpwe pwal fiti ekewe samol mi amasoua imwer ren kolt me silifer.

¹⁶Pwota üsap wewe ngeni eman mönükol aramas ra ireela, pun a uputiu nge esamwo tori fansoun, ika usun ekewe mönükol resap küna saram.

¹⁷Ikenan lon ewe peias ekewe aramasangau ra ükütiu le föri mine a ngau, ikenan ekewe mi malülü ren ar angang ra asösö.

¹⁸Ikenan ekewe chon fötek ra nomfengen fän kinamwe, resap chüen rongorong mwelien chokewe mi nemeniir fän pöchökül.

¹⁹Ekewe aramas kis me aramas tekia ra nom ikenan, pwal ätewe aramas ra nöüni amanau a ngas seni an samol.

²⁰Pwota saram a tori ätekewe mi nom lon riaföü, nge pwota manau a nom ren ätekewe mi letipengau?

²¹Ra ösüküsükü mäla, nge esap war. Ra kütta mäla lap seni ar kütta pisek aüchea mi monola.

²²Ra fokun meseik o pwapwa lupwen ra tolong lon peias.

²³Pwota manau a tori eman aramas esap küna alan, ätewe Kot a epeti pwelin ünükün?

²⁴Ai ngaselap ina enei mongö, ai ngüngü a towu seniei usun koluk a puwu seni lenian.

²⁵Pun ekewe mettoch üa niuokusiti ra feito woi, nge mine üa niueiti a toriei.

²⁶Esap wor ai kinamwe, esap pwal wor ai fansoun asösö, nge üa chök nom lon riaföü.”