Hiobe 42

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wofuŋ e dâŋ mutarame Hiobezi okacne kecʒiŋuc bâtikiecnewec:

²“O Wofuŋ, goki hâcne tâpiri rune jukomec i manakopac, erâ wiac i me i ezo murâ moc mi eipiecmu i wâc kâuc mi bakopac.

³Go ʒiŋuc wio‐narekomec: ‘Ŋic mamana tâmiric go wemocte maŋɋârâŋ‐nanere manabâc ekomec?’ Irec ʒiŋuc muhuc gazakopac: No wiac fuŋne fuŋne â mâsi wiac qeŋ bipineheczi mamana‐nane sirickeekac irec fuŋne mi mana tarahuc mutuc erâ dâŋ musifuckepo.

⁴Go hazec râehape dâŋ nazacmurâ mumec, erâ wâc dâŋ nazatec okacne bâtikie‐garepemurâ nazamec.

⁵No juwicnao ŋic gâcne jaŋe sawa gore dâŋ mupie hazeczi manapo, ʒi ine ʒâŋe fâri‐nanezi go gahacne honecgukopac.

⁶Irec no dâŋ muwarepo i manasurâ mimiekopac, ehuc ʒafe ruarâ rufemaŋko ŋehuc maŋnane bârisiekopac.”

⁷Eme Wofuŋ e Hiobehec dâŋ mutara‐fârerâ Temaŋŋic Elifaʒi ʒiŋuc âzâcnewec: “Go â âgo jahecge ŋoŋe Hiobezi fuŋne‐nane mutaniŋkewec irec sâc mi mutaniŋkembiŋte kimbeŋ‐nanere ʒocbâruŋ fai‐ŋeŋicko râepe fekac.

⁸Irec ŋoŋe bulimakao ŋicne 7 â lama ŋicne 7 jaha rocjoparâ kiŋaŋŋic‐nane Hioberao bacjopa rarâ kiŋŋeŋic taraocte qowi bâzi rikenʒepieŋ. Ehame kiŋaŋŋic‐nane Hiobezi ŋoŋere erâ numu‐nareme nunumu‐ticne manarâ kiŋ hurembiŋ irec okacne mi bazu‐ŋarepemu. Ŋoŋe Hiobezi fuŋne‐nane mutaniŋkehuc dâŋ fârine muwec irec sâc mi embiŋ.”

⁹Iŋuc âzâcneme Temaŋŋic Elifaʒi â Suhiŋic Bilidadi erâ Namati ŋic Zofari jaŋe Wofuŋzi mutâcne‐jarewec irec sâc embiŋ; ehame Wofuŋzi Hiobere nunumu manawec.

¹⁰Hiobe e âgofâc‐ticne jahec â moc jaŋere erâ numume tarame Wofuŋzi mocwâc ehâmocnehuc mârâc jaha wiac sasawa focnewec irec sâc sirickehuc wiac râcne tahac ewec.

¹¹Iŋuc ecneme Hiobe hahac ɋa seŋ qofâc‐ticne erâ âgofâcne sasawa jaŋe erao fisirâ ehec tiwâ bâzi nâmbiŋ. Ehuc Wofuŋzi wiac ʒârâ ʒâpânehec fai‐ticnao râeme fowec irec busâqoc manacnehuc mu bâmiriŋ ecnembiŋ. Iŋuc ehuc moneŋ â meo fefe wiac golzi bakicne râcne‐fârembiŋ. Ehame Wofuŋ e mârâc jaha Hiobe jambuŋkewec irec sâc jâuruhuc jambuŋkewec. Eme irec fârine wiac kecʒiŋuc fuacnewec: Lama 14 tauseŋ, kamele 6 tauseŋ, bulimakao 2 tauseŋ â doŋgi 1 tauseŋ.

¹³Erâ ŋokâfâcne 7 â otâfâcne jahec â moc ʒuhuckerâ fuacnembiŋ wâc.

¹⁴Eme mârâc otâ‐ticnere ʒâŋe Jemima muwec, â ere râpeo fuawec ere ʒâŋe Kezia muwec, erâ ʒâhec otâ‐ticnere ʒâŋe i Kereŋ‐Hapuc iŋuc muwec.

¹⁵Hiobe otâfâc‐ticne jaŋe sasawa sahac hawari biaŋ, jaŋe iŋucne mâreŋ sâc ŋokac moc mi jumbiŋ. Ehame mamac‐jeŋiczi merâfâc wiac‐ticne bâtâc bahuc ŋokâfâcne jarewec iŋuc jaha wâc otâfâcne kâdoc qajarewec.

¹⁶Hiobe e biaŋkerâ jara 140 sâko ʒuhuckerâ juwec, ehuc apa ŋosafâc‐ticne fua fepie honec‐jopa‐fârewec.

¹⁷Iŋuc ehuc dameŋ ʒora jufeku ŋicqizec jâmbâŋ erâ hâmowec.