ESEKIƐRI 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Kɛ̀ dɛ̀ mmɔkɛ yɛbie ntɛpíítɛ̀ nɛ̀ bɛ̀ ti pĩ̀ḿmɛ̀ kɛ kònnɛ̀ Bɑbidɔnni otɑ̃̀nkù píínwè, diyiè tɛpíítɛ̀ nɛ̀ didɛ́rínnì kó diyiè kɛ̀ Kuyie nní mbɛ́innɛ̀ kɛ dɔ̀:

²Onìtì fɔ̃́! Wɛ̃ɛ̃tɛ Esibiti bíɛ́kɛ̀ kɛ́nɑ́kɛ́ okpɑ̀ɑ̀tì nɛ̀ o nìtìbɛ̀ m pɑ̃ɑ̃nɑ́ɑǹtì.

³Nɑ́kɛ́ bɛ kɛ dɔ̀: Mí ndi Yiɛ̀ nKuyie n tú n yìtɛ́ kɛ còḿmúmu o kpɛ́í, wenwe kukó nNiidi kó fɛmùɔ̀fɛ̀, wenwe wèè bo kukó nNiidi mmiɛkɛ, kòo yɛ̀mmɛ̀ dò nhò kù tiekɛ kɛ nɑ́ɑ́ nkɛ tú weè dɔ̀ɔ̀ kukó nNiidi nkɛ kù te.

⁴Nɛ̀ dɛ kpɛ́í n yóó tɔ̃nnɛ́ kuyĩmpie nku o yɛ̀ì kɛ̀ kukó nNiidi kó siyĩĩ ncɑ́ɑ́tí o yíɛ́kɛ̀ kɛ̀ nh ò yũ̀ɔ̃́ nkɛ́dennɛní kɛ̀ sì ncɑ́ɑ́tí o yíɛ́kɛ̀.

⁵Kɛ̀ nh ò dootóo dikpɑ́ɑ̀ tɛdɔntɛ̀ miɛkɛ wenwe nɛ̀ dɛ kó siyĩĩ, kòò nduɔ́ dikpɑ́ɑ̀ miɛkɛ bɑ́ òmɔù bɑ́ɑ́ ò tùótɛ́ kɛ́kũnnɛ́. Tikpɑsĩ̀ntì nɛ̀ sinɔɔ dɛɛ̀ yóó ò di.

⁶Kɛ̀ Esibiti tenkɛ̀ kɔbɛ bɛmɔuu bɑntɛ́ n túmɛ̀ di Yiɛ̀ nKuyie. Kɛ yɛ̃́ bɛ̀ do dòmmɛ̀ dipènnì ndi Isidɑyɛɛribɛ nɔu miɛkɛ.

⁷Bɛ̀ do ò pĩĩ nkoò pùɔ̀mmu kɛ si bɛ nɔu, kɛ̀ bɛ̀ ò diri kòò pùɔ nkɛ donnìnko bɛ kɔ̃m̀bùɔ̀tì.

⁸Dɛɛ̀ kpɛ́í nte mí ndi Yiɛ̀ nKuyie kɛ̀ n tú: M bo duɔ́ nkɛ̀ bɛ̀ɛ ò do mudoò kɛ́kuɔ o ɛì miɛkɛ bɛnìtìbɛ̀ nɛ̀ iwũɔ̃.

⁹Ò mɛ nyɛ̃mmɛ̀ weè te kukó nNiidi kɛ̀ weè kù dɔ̀ɔ̀. Nɛ̀ dɛ kpɛ́í nhEsibiti kó kɛtenkɛ̀ bo dɔúnko kɛ́nɑɑ́ ntidobontì kɛ̀ bɛ̀ɛ bɑntɛ́ n túmɛ̀ di Yiɛ̀ nKuyie.

¹⁰N yìtɛ́ kɛ còḿmúmu wenwe nɛ̀ kukó nNiidi bɛ kpɛ́í, m bo duɔ́ nkɛ̀ bɛ tenkɛ̀ɛ dɔúnko kɛ́nɑɑ́ ntidobontì, kɛ́túótɛ́ Mikidɔdi kɛ́yɛ̀nnɛ̀ Siyɛnni kɛ́ntɔ kɛ́tuɔkɛnɛ̀ Kuusi temmɑ̀nku.

¹¹Bɛ̀ tɛ̃́nkɛ bɑ́ɑ́ yɑ̀ dɛ kó kɛtenkɛ̀ miɛkɛ onìtì kó tɛnɑɑ̀cɛ̀tɛ̀ yoo kuwɑnwɑnkù mɑkù kpɛtɛ. Dɛ kó kɛtenkɛ̀ bo dɔúnko kɛ̀ dɛ̀ mmɔkɛ yɛbie nsipísìnɑ̀ɑ̀.

¹²M bo duɔ́ nkɛ̀ Esibiti tenkɛ̀ɛ dɔúnko kɛ́nɑɑ́ dikpɑ́ɑ̀ tɛdɔntɛ̀ kɛ́nɑɑ́ ntidobontì yɛhɛkɛ̀ tɛyɛ̀ cuokɛ̀ m puɔ̀ nyɛ̀, kɛ́ntɔ kɛ́tuɔkɛnɛ̀ yɛbie nsipísìnɑ̀ɑ̀. Dɛ mɔ̀nnì m bo cíɛ nhEsibiti tenkɛ̀ kɔbɛ kɛ̀ bɛ̀ɛ tɑ ibotí tɛì miɛkɛ.

¹³Mí ndi Yiɛ̀ nKuyie m míì bɛ́i nkɛ tú, yɛbie nsipísìnɑ̀ɑ̀ kó difɔ̃nkúò m bo wɛ̃tɛ kɛ́dennɛní Esibiti tenkɛ̀ kɔbɛ ibotí tɛì bɛ̀ do cìɛ́tɛ́ kɛ́mbo ìì miɛkɛ, m bo wɛ̃tɛ kɛ́ bɛ̀ tìí.

¹⁴Dɛ mɔ̀nnì m bo wɛ̃tɛ kɛ́tíí nhEsibiti kó tidɑɑtì, kɛ̀ tìi kɑri bɛ tenkɛ̀ Pɑtidoosi ɛì bɛ̀ do borɛ̀ nɛ̀ dimɔ̀nnì kɛ́ɑ̃nnɛ́ dikpɑ̀ɑ̀tìyuu dìì berí.

¹⁵Esibiti bo ntú dɛ mɔ̀nnì dikpɑ̀ɑ̀tìyuu dìì berí, ò tɛ̃́nkɛ bɑ́ mbɑkɛ́ ibotí. N yóó ò kɛ̃́kùnnɛmu, bɑ́ ò tɛ̃́nkɛ bɑ́ mbɑkɛ́ ibotí tɛì.

¹⁶Isidɑyɛɛribɛ tɛ̃́nkɛ bɑ́ nhò tɑ̃́, bɛ̀ yóó bɑntɛ́mu kɛ dò ndɛ̀ do tú mɛyɛi mmɛ bɛ̀ do kɔrìmɛ̀ o borɛ̀ kɛ dɔ́ mɛteèmmɛ̀. Dɛ mɔ̀nnì kɛ́bɑntɛ́ n túmɛ̀ di Yiɛ̀ nKuyie.

¹⁷Kɛ̀ dɛ̀ mmɔkɛ yɛbie nsipísìdɛ́ nɛ̀ yɛ̀yiekɛ̀ nɛ̀ bɛ̀ ti pĩ̀ḿmɛ̀ kɛ́kònnɛ̀ Bɑbidɔnni, otɑ̃̀nkù ketiwè diyiè ketirì yiè, kɛ̀ ti Yiɛ̀ Kuyie nní mbɛ́innɛ̀ kɛ dɔ̀:

¹⁸Onìtì fɔ̃́! Nɛbukɑnnɛsɑɑ Bɑbidɔnni kóo kpɑ̀ɑ̀tì weè tɑnnɛ́ o ɑ̃ɑ̃pɔ̀mbɛ̀ mutɔ̃nkperímù, kɛ tú bɛ̀ɛ̀ pɔ̀ntɛ Tiiri kó dihɛì kɛ̀ bɛhɑ̃ɑ̃pɔ̀mbɛ̀ yɔ kũ̀ɔ̃tɛ kɛ̀ bɛ bɑɑyɔ fɑ̃ũtɛ́, ò mɛ nyí pɛ̀tɛ́ mucɔ̃́ntimu wenwe nɛ̀ o kó bɛhɑ̃ɑ̃pɔ̀mbɛ̀ mutɔ̃mmú bɛ̀ pĩ mmù kpɛ́í.

¹⁹Dɛɛ̀ kpɛ́í nte mí ndi Yiɛ̀ nKuyie nkɛ̀ n tú: N yóó ɑ̃nnɛ́ Esibiti tenkɛ̀ Nɛbukɑnnɛsɑɑ nɔu miɛkɛ nkɛ, kòo dì pɔ̀ntɛ kɛ́hɛí di kpɑ̀tì kɛ̀ dɛ̀ ntú o ɑ̃ɑ̃pɔ̀mbɛ̀ kó tiyeti.

²⁰N yóó ò duɔ́ nhEsibiti nwe kòò ntú o kó tiyeti ò ɔ̀u tìì ɔ̀ùtì kpɛ́í, nkɛ yɛ̃́ ò pĩ̀ḿmɛ̀ n kó mutɔ̃mmú mmu. Mí di yiɛ̀ nKuyie mmíì bɛ́i!

²¹Dɛ yiè ndi n yóó wɛ̃tɛ kɛ́dɛ́úkùnnɛmɛ̀ Isidɑyɛɛribɛ wɛ̃rímú, kɛ́ dɑ pɑ̃ kucɛ fɔ̃́ nhEsekiɛri kɑ̀ɑ mbɛ̀ nɑ̀ɑ́nnɛ̀ kɛ̀ bɛ̀ɛ bɑntɛ́ n túmɛ̀ di Yiɛ̀ Kuyie.