1Jara namba 10 irec mosa 10 â irec ʒoaŋ gie bapa 12 ira Wofuŋte dâŋ norao ʒiŋuc fuawec:
2“Ŋicte ɋâric, go Aigita ŋicwofuŋ Farao maickerâ e mecne â Aigita ŋic sasawa mecne jaŋe okacdâŋ jazazemec.
3Ehuc ʒiŋuc muzemec: Wofuŋ Anutuzi dâŋ kecʒiŋuc mukac: “O Aigita ŋicwofuŋ Farao, manakic, no râsi egarepemu. Go oâ sâko erâ opâ ʒâkâŋko fohuc kecʒiŋuc muekic: ‘Nilu opâ i nore biŋe jâmbâŋ, i noni hâcne bâfuapo.’
4Manakic, no mecqaŋeŋgao hawiczi hehawicgupe, opâ qowi jaŋe sahac garacgao bohota‐fâreniŋmu. Ehame opâonec fârecgupe go gahacne â opâ qowi sahacgao bohotaeŋgopieŋ ŋoŋe mâmâc wefu‐fâreniŋmu.
5Erâ go â opâ qowifâcge ŋoŋe mâreŋ burocnao behec‐ŋopapemu. Eme ira mâreŋ sawao fohapie moczi moc rocŋoparâ mi ducŋopaniŋmu. Kâte qowi â sawa wipe jaŋere nânâ eniŋte behec‐ŋopapemu hâcne.
6“Iŋuc fuame Aigita mâreŋ ŋecjucfâc‐ticne jaŋe, no hâcne Wofuŋ jukopac i mana taranʒepieŋ. Go Israe kikefuŋ gunu wawaucne iŋucne ejaremeŋ.
7Jaŋe âkesiŋguhapie mejeŋicko herickerâ nâpârâc‐jopameŋ, me gorao roweckehapie hericketec foameŋkembiŋ.
8Irec Wofuŋ Anutu no ʒiŋuc mukopac: Manakic, no mupe ʒika fua‐garerâ ŋic mecne qowi mecne jopa sipiric efâreocmu.
9Eme Aigita mâreŋ i niniŋ siarereŋ erâ tuhutac fuarâ foocmu. Iŋuc fuame, no hâcne Wofuŋ jukopac i mana taraniŋmu. “Go ʒiŋuc mumeŋ: ‘Nilu opâ i nore biŋe jâmbâŋ, noni hâcne bâfuapo.’
10Manakic, no irec hâcne go â opâfâcge râsi eŋarepe Aigita mâreŋ e Migidoli hae ira fuŋkerâ niniŋ siarereŋ erâ tuhutac fuarâ raku Etiopia mâreŋ qaŋeŋnao, Siene haeo hâcne taraocmu.
11Eme ŋic mecne qowi mecne mâreŋ ira sicne fotâc mocwâc mi epie tuhutac erâ foha jara 40 tarazejec.
12Eme no Aigita mâreŋ ima bape mâreŋ ima bacjopakicne gâcne jaŋere ŋondeŋko niniŋ siarereŋ fuarâ fozejec. Ehame haefâcne ŋeraŋgopieŋ jaŋe hae bâsirowec‐jopakicne jaŋere ŋondeŋko sesuctac fuarâ fohapie jara 40 jaha tarazejec. No Aigita ŋic jaŋe ŋicne ŋicne jaŋere ŋondeŋko bâtâtiec‐jopape mâreŋ sâc siŋsaŋ qafârenʒepieŋ.”
13Wofuŋ Anutuzi dâŋ kecʒiŋuc mukac: “Juku jara 40 tarame Aigita ŋic gurune gurune jaŋere ŋondeŋko bâtâtiec‐jopakicne irecnec qâzuc‐jopapemu.
14Ehuc ʒârâ hâriŋ‐jeŋic bârârierâ Patarosi mâreŋko, fufua mâreŋ‐jeŋicko hâcne ira mocwâc bârisiec‐jopape ŋicguru wawahane erâ junʒepieŋ.
15Jaŋe ŋicguru wawahane jâmbâŋ juhuc ŋicguru gâcne jaŋere maio fefene erâ mi junʒepieŋ. No bawahac‐jopa‐jâmbâŋkepe ŋic gurune gurune jaŋerao guriŋ bapa gie mocwâc mi banʒepieŋ.
16Ehame Israe kikefuŋ jaŋe Aigita ŋic jaŋerao mocwâc mi roweckenʒepieŋ, jaŋe Aigita ŋiczi bafic‐jopaniŋte wira‐jarehuc sâqocne bâfuambiŋ irec manasunʒepieŋ. Eme jaŋe, no hâcne Wofuŋ jukopac i mana taranʒepieŋ.”
17Jara namba 27 irec mosa namba wâŋ â irec ʒoaŋ gie bapa wâŋ jaha ehame Wofuŋte dâŋ norao kecʒiŋuc fuawec:
18“Ŋicte ɋâric, manakic, Babe ŋicwofuŋ Nebukaneza eki momorifâc‐ticne ejareme Tiro hae roniŋte gie sâko bambiŋ. Ehuc wâcwiac de âsic ekupie qizec‐jeŋic pârâcke‐fârewec â ɋawe‐jeŋic nâpârâcke‐fârewec. Ehame Tiro hae râsi ecnehuc gie sâko bambiŋ irec furine e jahacne mecne â momorifâcne mecne moc mi fua‐jarewec.
19Irec hâcne Wofuŋ Anutuzi ʒiŋuc mukac: Manakic, Babe ŋicwofuŋ Nebukaneza e Aigita mâreŋ râcnepe moneŋ mafa wiac‐jeŋic kâŋgâc jowac rome momorifâc‐ticne jaŋere gie furi ezejec.
20Jaŋe nore micte gie bambiŋte gie furi‐jeŋic i Aigita mâreŋ qikiŋne‐jarepemu hâcne. Wofuŋ Anutu nore dâŋ iŋuc.
21“No dameŋ ira Israe kikefuŋ mana‐jarepe tâpiri mocwâc fua‐jareocmu, erâ micge baafeckepe dâŋnane acmeruŋ tâmiric jazahuc juzemec. Eme jaŋe, no hâcne Wofuŋ jukopac i mana taraniŋmu.”
