Génesis 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Sarai co hua'huana'pihuë ni'ton, co Apran hui'nahuaninhuë'. Napoaponahuë', Saraiso a'nara cosonanën ya'huëtërin. Inaso iquipitoron. Acara itopi.

²A'na tahuëri Saraiso', so'in itapon: —Ni'quëchi, Sinioro co nohuantërinhuë ni'ton, co hua'huanahuë'. Napoaponahuë', cosonanëhuë acoanchinquën topirahuë. Tapona inaso', hua'huana'pi nisápirinhuë'. Hua'huanpachin cari masarahuë hua'huahuë pochachin nicacaso marë', itërin. Napotohuachina, Apranta nohuantërin.

³Naporo chachin Saraiso', Acara masahuaton, so'in acoantërin. Nani shonca pi'ipi Canaan parti ya'huapona pochin, napoapi.

⁴Shiarahuaton Acaraso', cayorin huachi. Inaporahuaton, hua'anën nocanin. Nocanaton, co yanatërinhuë'.

⁵Naporo' Sarairi Apran itapon: —Quëma tëhuëran ni'ton, Acara nocaninco. Cari chachin acoantopiranquënhuë', iporaso' hua'huanaton, nocaninco huachi. Sinioro chachin inquënposona tëhuërëso' anitochinpo': Quëma tëhuëmaranquën, ca a'na napomaraco, itërin.

⁶Napotohuachina, Apraniso' itapon: —Ni'quë', cosonanënso', natëinquënso ya'huërin. Ma'sona nohuantëranso' nitëquë', itërin. Naporo quëran huarë' Saraiso', Acara pa'pi aparisitërin. Napoaton, inaso ta'arin huachi.

⁷Ta'apirinhuë', Sinioro anquëninëni inotëro parti quënanin. Shor iraquë i'sha pipirinso' ya'cari', quënanin.

⁸Quënanahuaton, natanin: —Quëmaso' Acaranquën, nohuitëranquën. Sarai cosonanënquën. ¿Intoparanta huëcaton, intopata pa'saran? itërin. —Patronanëhuë Sarai itopiso' ta'ananpiarahuë, tënin Acara.

⁹Naporo' Sinioro anquëninëni, itapon: —Naquëranchin patronanën paapantaquë'. Ma'sona camairinquënsopita, natëquë', itërin.

¹⁰Napotahuaton itaantarin: “Ca nohuanto, hua'huayátërahuë amiparinpita ya'huëtarinquën. Co pichicasohuë' na'apona'.

¹¹Ipora cayoranso', quëmapia'huaya huaiyaran. Huaihuatan, Ismairo itëquë'. Co napion ancantaton na'nëranso', Sinioro nataninquën ni'ton, ina nininën acotëquë'.

¹²Mashotohuachin, tanan cahuario pa'pi notëraya pochin nisarin. Ya'ipiya inimicotarin. Inanta', ya'ipiya quëran, inimicotapona'. Quëmopinënpitari co quë'yapirinahuë', inahua notënanquë chachin ya'huapon,” itërin.

¹³Siniorori nontërin ni'ton, Acaraso' pa'yanënquë tapon: “¿Yosë chachin nontaporahuë co chiminahuë ti?” tënin. Ina yonquiaton, iso pochin Sinioro nohuitërin: “Nicatonco, catahuarincoso Yosë,” itërin.

¹⁴Napoaton inaquë poso ya'huërinsonta', “Nanpiton, ni'sárincoso' posonën,” itopi. Ina pososo', Catisë ninano', Piriti ninano', inapita ninanoro'sari ahuancanapirin.

¹⁵Acaraso' anquëni natërahuaton, patronanënquë chachin paantarin. Tahuëri nanihuachina huairin. Apran posa shonca saota pi'ipitaso', hui'nin nasitarin. Nasitohuachina, Ismairo itërin.