1Saray wəran k'Abram ɛnakomɛ fɛ kɔ wan. Mba ɛnayɔ wəcar wəran wəMisira, pacwe kɔ Hakar.
2Kɔ Saray oloku Abram: «Mənəŋk, Kanu Kəpɔŋ kəyaməsər im kəsɔtɔ ka wan. Məfəntərɛ kɔ wəcar kem, tɔlɔma intam kəsɔtər kɔ wan wərkun.» Kɔ Abram ɛŋcəŋkəl dim da Saray.
3Awa, kɔ Saray wəran ka Abram ɛlɛk wəcar kɔn wəMisira, Hakar, k'ɔsɔŋ kɔ wos Abram pəyɔ kɔ wəran. Tɛnatəŋnɛ kəndɛ ka Abram atɔf ŋa Kanahan kəsɔtɔ meren wəco.
4Kɔ Abram ŋambəpɛnɛ kɔ Hakar, kɔ Hakar ɛmbɛkəs. Ntɛ ɛŋcərɛ a ɛmbɛkəs mɔ, ɔmɔmənɛ fɛ sɔ Saray fɔr yɔtɔt.
5Kɔ Saray oloku Abram: «Mən' endesarɛ pəcuy pa mɔlɔməs mmɛ ɔlɔməs im mɔ! Ina yati, in' ɛlɛk wəcar kem k'imbɛr əm kɔ dəwaca, mba ntɛ ɛnəŋknɛ oŋ pəbɛkəs mɔ, k'ɛyɛfɛ kəfərfərəs im. Mba Kanu Kəpɔŋ kəmboc su kiti dacɔ (kəyi su dacɔ), ina kɔ məna!»
6Kɔ Abram oluksɛ Saray moloku: «Wəcar kam ey' əm dəwaca. Məyɔ kɔ tɔkɔ tentes' am mɔ.» Awa, kɔ Saray ɔntɔrəs Hakar haŋ kɔ Hakar ɛyɛksər kɔ, k'ɔŋkɔ pəbɔlɛ.
7Kɔ mɛlɛkɛ ma Kanu Kəpɔŋ mɔŋkɔ mɛbəp kɔ nde dətɛgbɛrɛ kələmp kəlɔma kəsək ta ɔmbɔlɛ kəŋgbɔkɔ nkɛ kəyi dɔpɔ da Sur mɔ.
8Kɔ mɛlɛkɛ mmɛ meyif: «Hakar, wəcar ka Saray, deke məyɛfɛ-ɛ? Deke məŋkɔ-ɛ?» Kɔ Hakar oluksɛ mi moloku: «Wəbɛra kem Saray, iyɛksər.»
9Kɔ mɛlɛkɛ ma Kanu Kəpɔŋ moloku, «Məluksərnɛ ndena wəbɛra kam, məkɔ məfəntərɛ kɔ dəntɔf.»
10Kɔ mɛlɛkɛ ma Kanu Kəpɔŋ moloku kɔ: «Indesɔŋɛ yuruya yam yɛla haŋ ta antam kəlɔm ŋa-ɛ.»
11Kɔ mɛlɛkɛ ma Kanu Kəpɔŋ moloku kɔ: «Məmbɛkəs tantɛ, wan wərkun məndekom, wan nwɛ məndesɔŋ tewe ta Səmayila mɔ, bawo Kanu kəne kəkulɛ-kulɛ ka pəcuy pam.
12Wan kam endeyi pəmɔ sɔfale sa dop. Ende pəc-caŋ afum fəp kəyɛfərɛnɛ, fəp fəc-yɛfərɛnɛ kɔ nkɔn. Sona s' endendɛ pəbɔlɛnɛ afum aləpəs aŋɛ.»
13Kɔ Hakar ɔsɔŋ tewe a Kanu Kəpɔŋ nkɛ kənalok-lokər kɔ mɔ, «Ata-Ɛl-Roy,» ti tɔ tatɔkɔ: «Inəŋk nnɔ Kanu nkɛ kənəŋk im mɔ.»
14Ti t' awenɛ kələmp kaŋkɔ, kələmp ka Lahay-Roy. Kələmp kaŋkɔ kəyi Kadɛs kɔ Beredu dacɔ.
15Kɔ Hakar oŋkomɛ Abram wan wərkun, kɔ Abram ewe wan wəkakɔ Hakar ɛnakomɛ kɔ mɔ tewe ta Səmayila.
16Abram ɛnasɔtɔ meren 86 tɛm ntɛ Hakar oŋc-komɛ kɔ Səmayila mɔ.
