1Abram ŋonâŋ‐ticne Sarai e hufiŋne juhuc naru motec moc mi rowec. Ehame Aigita mâreŋkonec kiŋaŋ naru‐ticne moc juwec, ʒâŋene Haga.
2Eme Saraizi Abram ʒiŋuc âzâcnewec: “Manakic, Anutuzi kogoc fufua irec mâsi sakare‐narewecte go kiŋaŋ naru‐nanehec juhaŋtec eraonec motec moc sâcne fua‐nareocmu mecne.” Mume Abramzi Saraire dâŋ reŋkewec.
3Irec Abram e Kanaaŋ mâreŋko jara 10 jutarawec dameŋ ira Sarai, Abramte ŋonâŋ, e Aigita mâreŋkonec kiŋaŋ naru‐ticne Haga rorâ ŋowe‐ticne Abram râcneme ŋonâŋ‐ticne ewec.
4Eme Haga e jume motec kiweckewec. Erâ, kiwechec ekopac, iŋuc manahuc ŋokac bomboŋ‐ticnere maname wawahane ewec.
5Iŋuc eme Saraizi Abram ʒiŋuc âzâcnewec: “Mimi fua‐narekac i gorao qacnezejec. Noni kiŋaŋ naru‐nane garehuc amecgao râepo, eme eki, kiwechec ekopac, iŋuc muhuc mana wahacnukac. Ŋondeŋ‐nâhecko dâŋ fuarâ fokac i Wofuŋ e jahac mutarazejec.”
6Mume Abramzi Sarai dâŋ ʒiŋuc âzâcnewec: “Wiac kiŋaŋ naru e gore meo jukac, e iŋuc me iŋuc ecnezo murâ ecnec.” Eme Saraizi Haga qa bâtiŋ ecneme wiserâ rawec.
7Rame Wofuŋte aŋelozi mâreŋ burocnao Suru hatamecko opâ ʒâŋe fokac ira bâfuawec,
8bâfuarâ ʒiŋuc muhuc wiocnewec: “Haga, Saraire kiŋaŋ naru, go wenirec warekic erâ wena rakomec?” Eki muwec: “No ŋokac bomboŋ‐nane Sarai wisecnekopac.”
9Eme Wofuŋte aŋelozi‐âzâcnewec: “Go risierâ ŋokac bomboŋge rumecnehuc juzemec.”
10Erâ Wofuŋte aŋelozi ʒuhuckerâ âzâcnewec: “No ɋâricfâcge basawec‐jopape mâretec sawe mâririackepie ʒare‐jeŋiczi wowosenere sâc jâuruocmu.”
11Erâ Wofuŋte aŋelozi ʒiŋuc wâc âzâcnewec: “Manakic, go kiwechec jukomecte juku motec moc rocmu, ere ʒâŋe Isimae muzemec, Wofuŋ e ki mamakucge manajec irec.
12Eki doŋgi momori wânʒâŋ iŋucne erâ juocmu, ehuc ŋic sasawa râsi ejareha jaŋe wâc râsi jaha ecne‐fâreniŋmu, eme ɋafâcne jaŋere maio ŋec juc ehuc qâhuc‐jopaocmu.”
13Eme dâŋ âzâcnewec Wofuŋ ere ʒâŋe ʒiŋuc muwec: “Go fufua tâcne Anutu.” I ʒiŋucte muwec hâcne: No fua tâcne‐narewec eme no e hâcne ʒâŋitapo.
14Irec opâ ʒâŋene ʒiŋuc mueŋgpieŋ: “Juju runezi honecnuekac ere opâ ʒâŋe”, opâ ʒâŋe i Kadesi â Berede ŋondeŋ‐jekicko fokac.
15Juku Hagazi Abramte motec moc rowec, eme Abram e Hagazi motec rowec ere ʒâŋe Isimae muwec.
16Abram e jara 86 bazuhame Isimae fuawec.
