1Wakathi aya opo, Suhuriiya muukha wa Eburamu khaari ovokola. Ye aarina njaazi mmote wa Misuri aari wiitthiwaaye Hajira.
2Siikhu moote, Suhuriiya khumuuza mannawe Eburamu yoori: “Nnyizinku khanikinkha mwaana, apho orapalelane njaazi aka, khinjuweya kimpatthaka mwaana khwa ye.” Asiiliyeevo toole, Eburamu khukhupalela mattakhuzi apale a muukhaawe.
3Suhuriiya khunthuula njaazi otule khumwinkha Eburamu yoori eeye muukhaawe waphiiri. Vitthu epi zarettikhana Eburamu arina nyaakha khumi eekhalaka tuniya ya Kanaani.
4Eburamu khurapalela na Hajira, ye khwiiya wa wiimittha. Ooniyeevo yoori eemittha khwaaza ontwayifu nhano awe.
5Suhuriiya khumuuza Eburamu yoori: “Miiyo kanthuula njaazi aka khuwinkha, ye n'oojuwa yoori eemittha aaza okitwayifu. Okitwayifusha opu anikirettelaaye Hajira, khahi etthu ya shariya, ti weyo onintakhelaaye. Nnyizinku ti aniphuke miiyo na-weyo.”
6Eburamu khunjipu Suhuriiya yoori: “Ye nalelo njaazi awo, onrettele khwa nanna ontakhaazo.” Aphano Suhuriiya khwaaza ontarawu Hajira mpakha khufiyelela otthira.
7Nlayikha la Nnyizinku khunsikana Hajira n'yaara eemeliye kharipu na naattuuttu wa maati aattameliyeeyo tarikhi ya Shuuri.
8Nlayikha ntthile khumuuzela liraka: “Weeyo Hajira njaazi wa Suhuriiya! Onlankha vayi wala ontta vayi?” Ye khujipu: “Keetta otthira vaje wa nhano aka Suhuriiya othuuto.”
9Nlayikha khumuuza yoori: “Orutele wa nhano awo, wanshututele.”
10Khumuuza theenya yoori: “Kinteela waattisa peewu yawo khwa nanna ehinaalakeyaaye.
11Apho wiimitthiyeevo onteela ompattha mwaana ontthaje nzina la Esumayila, mwaasa yoori Nnyizinku oona ohoowa wawo.
12Ye onteela wiiya woohisiilaneyi nkhama nyama ya ntthuttu; onteela wiiya muumani wa atthu ooshi, na-yo anteela wuumana na ye, na onteela wiiya wa waattuwana na attwiize.”
13Hajira khujuuzela mwennyeweru yoori: “Kamoona Nluku, nalelo kiri haayi?” Aphano khunkhuwelela Nnyizinku nzina liriina maana a “Nluku anikoonaaye”.
14Pi apho nlipu aya opule oniittheliwa “Peeri-Lahayi-Rooyi”. Nlipu aya opu ori enakatthi-nakatthi ya Kateeshi na Peereti.
15Hajira khumpattha mwaana wa Eburamu. Eburamu khuntthaja mwaana otule nzina la Esumayila.
16Wakathi Hajira ampatthiyeevo mwaana otule, Eburamu aarettiye arina nyaakha thamaaniini na sitha.
