1Iok Apram nehei Sarai mes tamane mana pe hoe tuna e ero. Pe nena hekuleileinga ana hei e nena nge Ekipto nge ene Heka.
2Pe Sarai hele lange Apram, “Non Soke poi ele iau ke e hoe tuk e ero. Pomalam o la ke o ma luluch nge lek hekuleileinga ana hei; lape tutuk mur te ha lakou nge i.” Pe Apram ngata nga Sarai nena helenga.
3Apram tu nge Kenan ke ana hesinga iri analoch (10) lalo pe Sarai tunge Heka lange i ke nehei naingana ia. Heka nena nge Ekipto pe i Sarai nena hekuleileinga ana hei ia.
4Iok laol Apram maluluch nge Heka ke la sana. Nga eteue nenge Heka eteia ke sana lo, talun ke heto heke i pe ngai lele hei palau Sarai.
5Ol pe Sarai hele lange Apram ke teke, “Iau e amneia melmelenga nga poinga nenge o poia nei. I manmanna ke e tunge lek hekuleileinga ana hei lange iong. Pe heueu nei hele poreke iau iange eteia ke sana lo. Pe e teke Non Soke milteu at nge imem nai nga poinga nei. Itei toto la ke pengpeng?”
6Pe Apram hele ke teke, “O nau at, hei nem lem hekuleileinga ana hei ia. O teke o poia i ke merechrei, o poia nga lemem ngam mana.” Pomalam Sarai poi poreke Heka ke ua sapele.
7Hei neu ua pe nanasia kue nenge lange Sur ke la nga ich sana lomona. Pe Non Soke nena hekulkulonga e saolia i nga ech matana e nga lamau.
8Pe hele lange i ke teke, “Heka, e Sarai nena hekuleileinga ana hei laka iong. O i at nga langai? Pe o la ke merechrei?” Pe Heka tuacholia ke teke, “E ua hei palau Sarai ana.”
9Pe Non Soke nena hekulkulonga hele, “O la mule nge hei soke nem pe o nanas mene nena helenga.”
10Pe hekulkulonga neu hele mule ke teke, “Lape e poia lem tete mur ke te lohot ke iri halang toto pe mele pele nakuna nge sisele iri ero.”
11Pe Non Soke nena hekulkulonga neu hele lange i pule ke teke, “Iong sam lo pe lape o hoe tum tamane ngana e. Pe o hetue ke ene Ismael. Ismael-Luna laka: NeHalang longe. Iange Non Soke longe lem tanginga lo.
12Pe Ismael lape poi ke malaka nga kie inolo pe nena ngarang mur laka hana lochloch pe hana lochloch reria ngarang laka i. Pe kila ita ke nek ero pe kila ke nek luluch nge alona mur ero pule.”
13E Heka hetue Non Soke nenge hele luluch nge i neu ke ene, “Iong NeHalang nenge o naue iau.” Iange i hele ke teke, “E naue NeHalang nenge naue iau ke ulolo?”
14Ke ngana laka te hetue ech matana neu ke ene, “Pia Lahai Roi” Luna laka ech matana nenge NeHalang nenge tu ke maulul naue iau. Ana ech matana kou tu heueu nei kura pe tu nga kileng nenge Kates pe Pet tuna ngaria.
15Ke Heka hoe Apram tuna tamane ngana e pe Apram hetue ke ene Ismael.
16Nga etue nenge Heka hoe Apram tuna Ismael, Apram ana hesinga lohot ke iri ana non kina henel pe ratele elle (86).
