1Abram-na ore Sera nogo-naaki na madiasa. Yapare nipuna kogono pae, Isip nogo Ega asimi.
2Gore Sera-me Abram para lalo: Adaa Aa-me ni nogo-naaki na geadega na kogono nogo rapu patalipina. Nipu mada nina ruru madaa maopaina. Abram-me Sera-na sa agaa ratisa.
3Abram-me nipu Kenan mali 10 awa ore Sera-me nipuna kogono pae Isip nogo Ega mua aani ore ma-aulainalo kasa.
4Abram Ega rapu patisa, goa pua naaki pada pirisa. Nipu naaki pada pirisa makuawa nipuna surube onana rolo para napiri agaa napagisa.
5Gore Sera-me Abram-para lalo: Go adalo kedare neme adape keda rialo. Nina kogono nogore nena kina sawade, goa pua abiare nipu naki pada pilo makuawa nina agaa na pagea. Adaa Aa-me ne-sana rikirana rumaina.
6Abram-me lalo: Nena kogono nogore nena kina iya. Nena kone-para paliare pape, gore Sera-me Ega udipa pisa pulu nipu pogola pisa.
7Adaa Aa-na Ensol-me Ega mo ipa repaa-para su kapune pare adesa. Go ipare mo Sur pora paginane popea.
8Gore Ensol-me lalo: Ega, Serana kogono nogo, apara awa, wala apara polalo pi? Nina surube ona Sera pogola pulu.
9Gore Adaa Aa-na Ensol-me nipu goa lakesa: Nena surube ona Sera piri wala pua, nipuna agaa pagape.
10Ensol-me lalo: Nena rururi ma-adayalua, goa pua dipiape rupa page maralimi.
11Adaa Aa-na Ensol-me wala lalo: Nere naki pada-pi pulu naki madiali. Nipuna biri Ismael lape, akoloya, Adaa Aa-me nena re-e pagade.
12Nipuri kira mena raa yana rupa alia. Nipu onaa rayo rapu yada-kepealia rabu onaa rayome nipu yada-kepealimi, goa pua nipuna onaa rayo gimua agurapo alia.
13Ega-me Adaa Aa go bi kasa: Akoloya ni Ade Gote. Nipumi lalo: Abiare ni adea Gote-re adalo.
14Go ipa-na biri, Bia La Roi teme, abia page go ipare Kades para Bered lapona rikirana popea.
15Ega-me Abram-na naki madiasa, goa pua Abram-me, Ega-me madiasa nakina biri Ismail sa.
16Abram-na mali 86 patinaloa Ega-me naki madiasa.
