Kʋtɔɔsʋtʋ II 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Ḿpʋ́ɣʋ́ Ɩsekiyɑsɩ pǝsɑ wulɑʋ kɛ ɩ lʋlʋɣʋ pɩɩsɩ hiu nɑ kɑkpɑsɩ nyǝŋkɑ tɑɑ. Yosɑlɛm kɛ ɩ tɔɣɔ kɑwulɑɣɑ kɛ pɩɩsɩ pɔɣɔlɑɣɑ fɛɩ hiu nɑ nɑɑnʋwɑ. Ɩsekiyɑsɩ too kɛlɛ Sɑkɑlɩ pɛɛlɔ Api.

²Ɩlɛnɑ Ɩsekiyɑsɩ lɑ mpi pǝ mɑɣɑ Tɑcɑɑ tɔ. Ɩsɩɩ ɩ lɔŋcɛ Tɑfiiti.

³Hɑlǝnɑ Ɩsekiyɑsɩ tʋlɩ Ɩsɔ tǝsɛɛlɛ nɔnɔɔsɩ kɛ ɩ kɑwulɑɣɑ pǝnɑɣɑ kɑncɑɑlɑɣɑ nyǝŋkɑ tɑɑ, nɑ ɩ́ tɑɣɑnɩ-tɛ.

⁴Ḿpʋ́ɣʋ́ ɩ kotɑ kɔtǝlɑɑ kɛ ilim tǝlɩɩlɛ nɔnɔɣɔ tɛɛ.

⁵Nɑ ɩ́ tɔ-wɛ sɩ: Lefii lʋlʋɣʋ nyǝ́mɑ mɛ, ɩ́ nɩɩ mɑ tɔm. Ɩ́ lɑ mǝ nɑ Ɩsɔ tǝsɛɛlɛ mǝ nyɔɔŋ tɔɔ ɑsilimɑ kɛɛlʋɣʋ kɔtɑɣɑ. Ɩ́ lɑɑsɩ tǝ tɑɑ ɑcɑɑlǝtʋ wontu nti tǝ wɛɛ tɔ, nɑ ɩ́ tɑɣɑnɩ-tɛ.

⁶Tɑ́ cɔsɔnɑɑ tɑ tǝŋ Ɩsɔ Tɑcɑɑ kɛ teu. Pǝ́cɔ́ pɑ lɑpɑ mpi pǝ tɑ mɑɣɑ-ɩ tɔ. Pɑ kpɛɛsɑ-ɩ nɑ pɑ́ kisi Ɩsɔ tǝsɛɛlɛ kɛ nyǝnʋɣʋ, nɑ pɑ́ hɑ-ɩ siɣile.

⁷Hɑlǝnɑ pɑ́ tǝkɩ tǝ nɔnɔɔsɩ, nɑ tǝ kɔkɔsɩ te. Nɑ pɑ́ yele tulɑɑlʋnɑɑ nɑ kɔtɑsɩ nsi kɔkɔ lusɑ sɩ tǝnɑ tɔɣɔ lɑpʋ kɛ Tɑcɑɑ kɛ tǝ tɑɑ.

⁸Tǝnɑɣɑ Tɑcɑɑ nɑ́ mʋ pɑ́ɑ́nɑ́ nɑ Yosɑlɛm nɑ Yutɑ, nɑ ɩ́ yele-wɛɣɛ wɑhɑlɑ tɑɑ, nɑ yǝlɑɑ woŋiɣi-wɛ. Nɑ pɑ tɔm wɛ sɔɣɔntʋ nɑ tǝ́ sʋsǝɣɩ wɑtʋ ɩsɩɩ ɩ́ nɑɑkʋɣʋ nɑ mǝ ɩsǝpee tɔ.

⁹Pǝ tɔɔ kɛ́ tɑ́ cɑɑnɑɑ sǝpɑ yoou tɑɑ, nɑ tɑ́ ɑlɑɑ nɑ tɑ́ piyɑ pǝsɩ yomɑɑ.

¹⁰Ɩlɛ mɑ cɑɑ sɩ mɑ́ nɑ Ɩsɔ tǝ́ pɛɛlɩ nɔɣɔ. Nɑ ɩ pɑ́ɑ́nɑ́ kɑtɑtǝlɑɣɑ nyǝnɑ wenɑ ɩ mʋnɑ-tʋ tɔ ɑ́ hɛɛ.

¹¹Mɑ yǝlɑɑ mɛ, ɩ́ tɑɑ wɛɛ mpɑ pɑɑ pɑɑsǝɣǝnɑ tɔ. Mpi tɔ, mɛɣɛ Tɑcɑɑ lǝsɑɑ sɩ ɩ́ sǝŋ ɩ kiŋ nɑ mǝ sɔɔlʋ pɩɩ sɩ ɩ́ lɑpɩ-ɩ tǝmlɛ nɑ ɩ́ wɔpɩ-ɩ tulɑɑlʋ kɛ́ ɩ hǝtɛ tɑɑ.

¹²Lefii nyǝ́mɑ mpɑ pɑ polɑɑ tɔɣɔlɛ Kehɑtɩ lʋlʋɣʋ nyǝ́mɑ. Amɑsɑyi pǝyɑlʋ Mɑhɑtɩ, nɑ Asɑliyɑ pǝyɑlʋ Sowɛɛlɩ. Nɑ Melɑli lʋlʋɣʋ nyǝ́mɑ. Apiti pǝyɑlʋ Kisi. Nɑ Yehɑlelɛlɩ pǝyɑlʋ Asɑliyɑ, nɑ Kɛɛsɔŋ lʋlʋɣʋ nyǝ́mɑ. Simmɑ pǝyɑlʋ Yowɑ, nɑ Yowɑ pǝyɑlʋ Ɩteni,

¹³nɑ Ɩlǝsɑfɑŋ lʋlʋɣʋ nyǝ́mɑ. Simli nɑ Yeiyɛlɩ, nɑ Asɑfɩ lʋlʋɣʋ nyǝ́mɑ. Sɑkɑlɩ nɑ Mɑtɑniyɑ,

¹⁴nɑ Hɛmɑŋ lʋlʋɣʋ nyǝ́mɑ. Yehiyɛlɩ nɑ Simeyi, nɑ Yetutuŋ lʋlʋɣʋ nyǝ́mɑ. Semɑyɑ nɑ Usiyɛlɩ.

¹⁵Ḿpʋ́ɣʋ́ pɑ kpeɣelɑ pɑ lʋlʋɣʋ nyǝ́mɑ tǝnɑ nɑ pɑ́ lɑ-wɛɣɛ nyɔɔŋ tɔɔ ɑsilimɑ kɛɛlʋɣʋ kɔtɑɣɑ. Pǝ wɑɑlɩ kɛ́ pɑ lɑpɑ mpʋ tɔtɔɣɔ Ɩsɔ tǝsɛɛlɛ, ɩsɩɩ Tɑcɑɑ kɑ sɩɩʋ nɑ wulɑʋ heeli-wɛ tɔ.

¹⁶Ḿpʋ́ɣʋ́ kɔtǝlɑɑ sʋʋ kutuluɣu tɑɑ, nɑ pɑ́ tɑɣɑnɩ. Nɑ pɑ́ kuu kʋ tɑɑ ɑsilimɑ wontu nɑ pɑ́ lɩɩnɑ tɑɣɑ tɔɔ. Ɩlɛnɑ Lefii nyǝ́mɑ nɑ́ɑ́ kpɑɣɑ-tɩ nɑ pɑ́ lɔ Setǝlɔŋ tɛtɛkǝlɛ tɑɑ kɛ́ ɩcɑtɛ wɑɑlɩ.

¹⁷Ɩsɔtʋ kʋyɑkʋ kɑncɑɑlɑɣɑ nyǝŋkʋ wule kɛ pɑ cɑɑlɑ Ɩsɔ tǝsɛɛlɛ kɛ tɑɣɑnʋɣʋ. Pǝ tɑlɑ kʋyɑkʋ pǝlefɛɩ nyǝŋkʋ ɩlɛ pɑ tɑlɑ ɩ kpɑɑŋ tɑɑ kɛlɛ. Nɑ pɑ́ tɑɣɑnɩ ɩ tǝnɑɣɑ kʋyɛɛŋ pǝlefɛɩ tɔtɔ. Ɩlɛnɑ tǝmlɛ tɛ ɩsɔtʋ kʋyɛɛŋ nɑɑnʋwɑ nɑ nɑɑtoso wule.

¹⁸Pǝ wɑɑlɩ kɛ́ Lefii nyǝ́mɑ polɑ wulɑʋ Ɩsekiyɑsɩ tɛ, nɑ pɑ́ heeli-ɩ sɩ: Tɑcɑɑ wulɑʋ, tǝ tɑɣɑnɑ Ɩsɔ tǝsɛɛlɛ nɑ kɔtɑsɩ nsi kɔkɔ lusɑ sɩ tǝnɑ tɔ sɩ tǝlɑtɛ. Nɑ pǝ wontu tǝnɑ nɑ Ɩsɔ potopotonɑɑ tɑɑpǝlɩ.

¹⁹Ye pǝ kɑɑsɑ Ɩsɔ wontu nti wulɑʋ kɑɑnɩɩtʋ Ahɑsɩ kɑ pilisɑ ɩ kɑwulɑɣɑ wɑɑtʋ tɔ, tǝ tɑɣɑnɑ tǝlɛ nɑ tǝ́ sɩɩ-tɩ nɑ tǝ mpɑɑ. Ntǝɣǝlɛ kɔtɑɣɑ tǝlɑtɛ ɩsɛntɑɑ.

²⁰Tɛʋ femɑ tɑnɑŋ tǝhulu, ɩlɛnɑ wulɑʋ Ɩsekiyɑsɩ koti ɩcɑtɛ sɔsɑɑ. Nɑ ɩ́ nɑ-wɛ pɑ́ polo Ɩsɔ tǝsɛɛlɛ.

²¹Nɑ pɑ́ kpɛnnɑ lɑtǝcɛnɑɑ, nɑ ɩwɑɑŋ, nɑ ɩwɛɛsɩ, nɑ pǝŋtʋlʋŋ kɛ nɑɑtosompɔɣɔlɑɣɑ mpɔɣɔlɑɣɑ sɩ, pɑ lɑkɩ kɔtɑsɩ kɛ wulɑʋ tǝyɑɣɑ nyǝ́mɑ nɑ Ɩsɔ tǝsɛɛlɛ nɑ Yutɑ nyǝ́mɑ pɑ ɩsɑɣɑtʋ tɑɣɑnʋɣʋ tɔɔ. Ḿpʋ́ɣʋ́ Ɩsekiyɑsɩ tɔmɑ Alɔŋ lʋlʋɣʋ nyǝ́mɑ kɔtǝlɑɑ sɩ: Ɩ́ lɑ kɔtɑsɩ nsǝɣɩ Tɑcɑɑ kɔtɑɣɑ tǝlɑtɛ tɔɔ.

²²Ɩlɛnɑ pɑ́ cɑɑlǝnɑ lɑtǝcɛnɑɑ kɛ lɛntʋɣʋ nɑ pɑ́ tiɣisi cɑlǝm nɑ pɑ́ ŋmɩɩsɩ-wǝɣɩ kɔtɑɣɑ tǝlɑtɛ tɔɔ. Nɑ pɑ́ lɛntɩ tɔtɔɣɔ ɩwɑɑŋ, nɑ ɩwɛɛsɩ, nɑ pɑ́ lɑ mpʋ tɔtɔ.

²³Pǝ kɑɑsɑ pǝŋtʋlʋŋ, ɩlɛnɑ pɑ́ ponɑ-ɩ wulɑʋ nɑ sɑmɑɑ pɑ kiŋ nɑ pɑ́ tǝnɩ ɩ tɔɔ kɛ́ pɑ niŋ.

²⁴Ɩlɛnɑ kɔtǝlɑɑ lɛntɩ nɑ pɑ́ ŋmɩɩsɩ cɑlǝm kɛ kɔtɑɣɑ tǝlɑtɛ tɔɔ sɩ, pǝ́ hɩɩsɩ Ɩsɛɣɛlɩ nyǝ́mɑ tǝnɑ ɩsɑɣɑtʋ. Mpi tɔ, Ɩsɛɣɛlɩ nyǝ́mɑ tǝnɑ tɔɔ kɛ́ wulɑʋ yelɑɑ nɑ pɑ́ lɑ́ kɔtɑɣɑ ŋkɑ kɔkɔ lusɑ kɑ tǝnɑ tɔ, nɑ ɩsɑɣɑtʋ hɩɩsʋɣʋ nyǝŋkɑ.

²⁵Ḿpʋ́ɣʋ́ wulɑʋ sɩ́ɩ́ Lefii nyǝ́mɑ kɛ Ɩsɔ tǝsɛɛlɛ tɑɣɑ tɔɔ nɑ kpɛŋkpɛŋnɑɑ nɑ cǝmǝŋ nɑ sɑŋkʋnɑɑ. Ɩsɩɩ Tɑfiiti nɑ Ɩsɔ kʋyɔɣɔtʋtʋ tɛlǝsǝlɑɑ Kɑtɩ nɑ Nɑtɑŋ pɑ sɩɩʋ tɔ. Tɑcɑɑ heelɑɣɑnɑ Ɩsɔ kʋyɔɣɔtʋtʋ tɛlǝsǝlɑɑ mpɛ nɑ pɑ́ tɛlǝsǝɣɩ.

²⁶Nɑ Lefii nyǝ́mɑ cɑɣɑ pɑ tǝcɑɣɑlɛ. Nɑ cǝmǝŋ wei Tɑfiiti kɑ yelɑɑ nɑ pɑ́ lu tɔ, nɑ kɔtǝlɑɑ nɑ́ɑ́ hʋlǝɣɩ pɑ ɑkɑntɛɛ.

²⁷Ɩlɛnɑ Ɩsekiyɑsɩ tɔ sɩ: Ɩ́ lɑ kɔtɑsɩ nsi kɔkɔ lusɑ sɩ tǝnɑ tɔ. Sɑɑ wei pɑ cɑɑlɑɑ, ɩlɛnɑ pɑ́ tʋ́ Tɑcɑɑ kɛ yontu nɑ ɑkɑntɛɛ nɑ cǝmǝŋ wei Ɩsɛɣɛlɩ wulɑʋ Tɑfiiti lupɑ tɔ.

²⁸Ḿpʋ́ɣʋ́ sɑmɑɑ tǝnɑ hǝntɑ ɑtɛ. Nɑ yonyoolɑɑ nɑ́ɑ́ tɔŋnɑ yontu nɑ pɑ cǝmǝŋ mɑpʋ, nɑ ɑkɑntɛɛ hʋlʋɣʋ, hɑlǝnɑ kɔtɑɣɑ tɛm.

²⁹Wɑɑtʋ wei pǝ tǝnɑ pǝ tɛmɑ, ɩlɛnɑ wulɑʋ nɑ ɩ cɔlɔ nyǝ́mɑ tǝnɑ luŋ ɑkulɑ nɑ pɑ́ hǝntɩ ɑtɛ.

³⁰Ɩlɛnɑ wulɑʋ nɑ sɔsɑɑ pɑ́ tɔ Lefii nyǝ́mɑ sɩ: Ɩ́ sɑ Tɑcɑɑ tɔtɔ, nɑ mǝ yontu nti Tɑfiiti nɑ Ɩsɔ kʋyɔɣɔtʋtʋ tɛlǝsʋlʋ Asɑfɩ pɑɑ lupɑ tɔ. Ḿpʋ́ɣʋ́ Lefii nyǝ́mɑ yoonɑ lɑŋhʋlʋmlɛ. Pǝ wɑɑlɩ kɛ́ pɑ hǝntɑ ɑtɛ nɑ pɑ́ sɛɛ Tɑcɑɑ.

³¹Ntɛnɑ wulɑʋ Ɩsekiyɑsɩ tɔ sɑmɑɑ sɩ: Ɩsɩɩ ɩ́ hɑʋ mǝ tǝɣɩ Tɑcɑɑ kɛ pǝnɛntɛ tɔ, ɩ́ kɔnɑ nɔɣɔ kʋlʋmɑɣɑ kpɛntʋɣʋ nɑ sɑmtʋ pǝ kʋhɑɑŋ kɛ Ɩsɔ tǝsɛɛlɛ tɑɑ. Ɩlɛnɑ kotilɑɑ kɔnɑ tɔlɑ nɑ pɑ́ lɑ́ kɔtɑsɩ nsɩ. Hɑlǝnɑ luɣu kʋlʋmʋɣʋ nyǝ́mɑ tǝnɑ lɑ kɔtɑsɩ nsi kɔkɔ lusɑ sɩ tǝnɑ tɔ.

³²Lɑtǝcɛnɑɑ nɩɩtoso nɑ nɑɑnʋwɑ nɑ ɩwɑɑŋ nɩɩnʋwɑ (100) nɑ ɩwɛɛsɩ ŋmʋnʋɣʋ (200) kɛ pɑ lɑpǝnɑ kɔtɑsɩ nsi kɔkɔ lusɑ sɩ tǝnɑ tɔ.

³³Nɑ nɑɑŋ kɛ nɑsǝtoso (600) nɑ heeŋ nɑ pǝ́ŋ kɛ iyisi tooso (3000) nɑ pɑ́ lɑ́ kɔtɑsɩ lɛnsɩ.

³⁴Kɔtǝlɑɑ mpɑ pɑɑ wɛɛ tɔ, pɑ fɛɩ pɑɣɑlɛ. Ɩlɛ pɑ tɑ pǝsɩ nɑ pɑ́ liti kɔtɑsɩ nsi kɔkɔ lusɑ sɩ tǝnɑ tɔ sɩ tɔlɑ tǝnɑ. Pǝ tɔɔ kɛ́ pɑ tɛɛtʋnɑɑ Lefii nyǝ́mɑ lɛlɑɑ sǝnɑ-wɛ nɑ pɑ́ tɛɛsɩ pɑ tǝmlɛ. Hɑlǝnɑ kɔtǝlɑɑ lɛlɑɑ lɑ nyɔɔŋ tɔɔ ɑsilimɑ kɛɛlʋɣʋ kɔtɑsɩ. Mpi tɔ, Lefii nyǝ́mɑ kɑ kǝlɑ sɔɔlʋɣʋ kɛ pɑ tɩ tɑɣɑnʋɣʋ nɑ pǝ́ kǝlɩ kɔtǝlɑɑ.

³⁵Kɔtɑsɩ nsi kɔkɔ lusɑ sɩ tǝnɑ tɔ sɩ tuutuumɑ nɑ pǝ́ sɔɔsǝnɑ sʋlʋm mpi pɑ hɑwɑ tɔ pǝ pɑɑsi, pɩɩ wɛɛ sɩ pɑ ponɑ kɔtɑɣɑ tǝlɑtɛ tɔɔ kɛ́ nɔɣɔ kʋlʋmɑɣɑ kpɛntʋɣʋ kɔtɑsɩ nɑntʋ nim cɔlɔ nim cɔlɔ. Ɩsǝnɑ pɑ sɩɩ Ɩsɔ sɛɛʋ kɛ Ɩsɔ tǝsɛɛlɛ tɑɑ tɔɣɔlɛ.

³⁶Ḿpʋ́ɣʋ́ Ɩsekiyɑsɩ nɑ yǝlɑɑ tǝnɑ pɑ lɑŋɑ hʋlʋmǝnɑ mpi Ɩsɔ hʋlɑ-wɛ sɩ pɑ́ lɑ tɔ. Mpi tɔ, pǝ lɑpɑ lɔŋ kɛ́.