1Hisikia e jara‐ticne 25 bazurâ fuŋkerâ ŋicwofuŋ ehuc jara 29 Jerusalem haeo juwec. Neŋgoc‐ticne ʒâŋene Abia e ine Ʒekariare otâ.
2Hisikia e apa‐ticne Dawidizi ewec irec sâc jaha ehuc Wofuŋte ʒâŋe faio wiac sasawa ebac eme sâcke‐fârewec.
3Hisikia e ŋicwofuŋ gie fuŋkewec jara irec fuŋfuŋke mosa ira Wofuŋ ufuŋ‐ticnere motâc i rofârerâ mocwâc bâpiaŋke‐fârewec.
4Erâ taha bapa â Lewiŋic rocjoparâ ʒoaŋ wewefunaopec hae ʒoŋa ira hetumaŋ‐jopawec.
5Ehuc kecʒiŋuc jazawec: “Lewiŋic ŋoŋe hazec râerâ mananiŋ! Ŋoŋe ŋaŋacne eemasaŋ gie bahuc apa ŋosafâc‐ŋeŋic jaŋere Wofuŋ Anuture ufuŋ wâc mâmâc emasaŋkeniŋ, ehuc tiri ufuŋko wiac repic qapicne fokac i bârârienʒepieŋ.
6Mamacfâc‐nâŋec jaŋe hâcne Wofuŋ Anutu‐nâŋecte maio wiac mamakâcne embiŋ. Jaŋe Wofuŋ râpecke sanaŋkehuc ŋeŋe juju‐ticne i mâmâc râpeckembiŋ.
7Jaŋe iŋuc ehuc hae gâŋgâŋte motâc hesanaŋkembiŋ wâc. Erâ lambe bâhâpohuc Israere Anuture hosâc âsu me qowi bâzi moc tiri ufuŋko mi rikembiŋ.
8Irec Wofuŋte kimbeŋzi Juda â Jerusalem hae rune jaŋere faio fewec. Iŋuc ejareme jaŋe hâhâwic â wawarec â sâke kiki dâŋ eejare irec biŋe embiŋ i ʒâŋe fâri‐ŋeŋiczi honeŋgopieŋ.
9Mamacfâc‐nâŋec jaŋe irec hâcne ʒikao fefârembiŋ â naru motecfâc‐nâŋec â ŋonâŋfâc‐nâŋec jaŋe wâc irec erâ kâpâcwâru bacjopakicne.
10No ʒi Israere Wofuŋ Anutuhec ʒâʒâfic moc epemurâ maŋkehuc jukopac, eme Wofuŋte kimbeŋzi nâŋâcnao bâruŋkehuc foekac i omaezejec.
11Irec motecfâc‐nane, dameŋ mi sipirickezo. Wofuŋ e ŋoŋe hâcne kiŋaŋŋicfâc‐ticne juhuc mai‐ticnao domarâ kiŋaŋ qacnehuc hosâc âsu rikecneniŋte rowosâec‐ŋopawec.”
12Iŋuc mume Lewiŋic ʒiŋuczi faharembiŋ: Amasaire ŋokâ Mahata â Kohatire ɋâricfâc jaŋeraonec ine Aʒariare ŋokâ Joele; â Merarire ɋâricfâc jaŋeraonec ine Abadire ŋokâ Kisi â Jehalele ere ŋokâ Aʒaria; erâ Geresoŋte ɋâricfâc jaŋeraonec ine Ʒimare ŋokâ Joa â Joare ŋokâ Edeŋ.
13Eme Elisafaŋte ŋokâfâc jaŋeraonec ine Ʒimiri â Jeuele; â Asafare ŋokâfâc jaŋeraonec ine Ʒekaria â Matania.
14Eme Hemaŋte ŋokâfâc jaŋeraonec ine Jehuele â Simei, â Jedutuŋte ŋokâfâc jaŋeraonec ine Semaja â Uʒiele.
15Jaŋe qomâfâc‐jeŋic hetumaŋ‐joparâ jaŋe jaŋacnao eemasaŋ gie bahuc Wofuŋte micte ŋicwofuŋzi mutâcnewec irec sâcko ufuŋko raʒirâ Wofuŋte ufuŋ emasaŋkembiŋ.
16Taha bapa jaŋe Wofuŋte ufuŋmaŋko eemasaŋ gie baniŋte raʒimbiŋ, ehuc Wofuŋte taha ufuŋko wiac wâwânâŋnehec bâfuambiŋ i rorâ bawaha Wofuŋte ufuŋ hae ʒoŋa‐ticnao guruckembiŋ. Guruckepie Lewiŋic jaŋe rorâ Kidoroŋ opâo barambiŋ.
17Jaŋe fufuŋke mosa irec ʒoaŋ gie bapa wâŋ ira eemasaŋ gie fuŋkembiŋ, eme mosa irec ʒoaŋ gie bapa 8 ira ine Wofuŋte ufuŋmaŋko fembiŋ. Eme ʒoaŋ gie bapa 8 Wofuŋ ufuŋ‐ticnere eemasaŋ gie bahuc juhapie juku mosa irec ʒoaŋ gie bapa 16‐ko batarambiŋ.
18Batararâ ŋicwofuŋ Hisikiarao ra ʒiŋuc âzâcnembiŋ: “Nâŋe Wofuŋte ufuŋ mecne, erâ qowi bâzi ririkere alata â wâcwiac‐ticne gâcne sasawa mecne, erâ poroŋ furu mukicne irec tebo â wâcwiac‐ticne sasawa i mâmâc emasaŋke‐fârembeneŋ.
19Ŋicwofuŋ Ahaʒi e Wofuŋtao mi siŋkehuc ufuŋte wiac sasawa bârârieme mâc ŋeekac i emasaŋke‐fârerâ emoc bâmoc efârembeneŋ, eme ʒi Wofuŋte alata maŋfuŋko ŋekac.”
20Jaŋe iŋuc mupie ŋicwofuŋ Hisikia e furic uupicte faharerâ hae irec ŋic fekicne hetumaŋ‐jopame Wofuŋte ufuŋko fembiŋ.
21Ehuc uucmaŋte â furu ufuŋte â Judaŋic sâqocne‐jeŋicte taha bâzi rikeniŋte bulimakao ŋicne 7 â lama ŋicne 7 â lama motecne 7 â noniŋ ŋicne 7 jaha mâmâc bacjopa fisimbiŋ. Eme Aroŋte ɋâricfâc taha bapa jaŋe Wofuŋte alata faio taha bâzi rikeniŋte mujarewec.
22Irec jaŋe bulimakao ŋicne bacjopa fisimbiŋ i joparâ taha bapa jaŋe socjeŋic rorâ alatao tiembiŋ. Erâ lama ŋicne â lama motecne mâmâc joparâ jaŋere soc i iŋuc jaha alatao tiembiŋ.
23Iŋuc erâ sâqocnere taha baniŋte noniŋ ŋicne bacjopa fisimbiŋ i ŋicwofuŋ â kikefuŋ jaŋerao guruc‐jopapie jaŋe mejeŋic fai‐jeŋicko râembiŋ.
24Eme taha bapa jaŋe Israe ŋic sasawa kiwiric‐jeŋic roniŋte noniŋ ŋicne i joparâ socjeŋic alatao tiehuc sâqocne tâtâmire taha bambiŋ. Ŋicwofuŋzi Israe ŋic sasawa jaŋere erâ qowi bâzi â sâqocne tâtâmire taha bâzi rikeniŋte mujarewec hâcne.
25Erâ Hisikia e Dawidi â ŋicwofuŋte findaŋdâŋ mumu ŋic Gade â porofete jaŋere sâcmutâc dâŋte sâcko Lewiŋic jaŋe kaŋguc â gita kulelehec Wofuŋte ufuŋko râec‐jopawec. Sâcmutâc dâŋ i Wofuŋzi porofetefâc‐ticne jaŋerao mufuawec hâcne.
26Eme Lewiŋic jaŋe Dawidizi gae hehere musi wiac bawec ihec domahapie taha bapa jaŋe qeŋhec domambiŋ.
27Iŋuc epie Hisikia e qowi bâzi alatao rikeniŋte mujarewec. Eme qowi bâzi ririke gie fuŋkehapie Wofuŋ gae hehecne i wâc iŋuc jaha fuŋkembiŋ. Ehuc Israe ŋicwofuŋ Dawidizi musi â qeŋ wiac bawec i mâmâc qapie dâŋewec.
28Eme kikefuŋ sâko jaŋe Wofuŋ numu hefârec ecnehuc gae hehe ŋic jaŋe gae hembiŋ â qeŋ qaqa ŋic jaŋe qeŋ qambiŋ. Wiac i fuahuc fohame juku qowi bâzi ririke i tara‐fârewec.
29Taha bâzi wiac i tara‐fâreme ŋicwofuŋ â ŋic ŋokac mâmâc jumbiŋ jaŋe fodaperâ Wofuŋ numu hefârec ecnembiŋ.
30Eme ŋicwofuŋ Hisikia â mefârofâc‐ticne jaŋe Dawidi â findaŋdâŋ mumu ŋic Asafa jahe gae hefuapic i Lewiŋic jaŋe hehuc Wofuŋ ʒeri mumuteŋ ecneniŋte mujarembiŋ. Eme jaŋe bubiaŋ faio ʒeri mumuteŋ ehuc fodaperâ Wofuŋ numu hefârec ecnembiŋ.
31Eme Hisikiazi muwec, “Ŋoŋe miŋecgac Wofuŋtao fuahuc tirine eŋgopieŋte Wofuŋte ufuŋko wefurâ taha bâzi â daŋge taha râeniŋ.” Iŋuc jazame kikefuŋ jaŋe taha bâzi â daŋge taha wiac râembiŋ; â buafecko wiac embiŋ jaŋe ine qowi bâzi bafisimbiŋ.
32Eme kikefuŋ jaŋe bâzi ririkere biŋe qowi bafisimbiŋ irec ʒare ine ʒiŋuc: Bulimakao ŋicne 70 â lama ŋicne 100 â lama motecne 200. Qowi sasawa i Wofuŋte qowi bâzi rikeniŋte bafisimbiŋ hâcne.
33Eme taha bâtirikicne ine bulimakao ŋicne 600 â lama 3 tauseŋ.
34Eme taha bapa jaŋe afecnere qowi bâzi ririkere biŋe i sahacne âkehockeniŋte eipiembiŋ. Eme taha bapa gâcne jaŋe eemasaŋ gie bambiŋ irec woŋec qomâfâc‐jeŋic Lewiŋic jaŋe bafic‐jopapie juku tara‐fârewec. Lewiŋic jaŋe maŋjeŋic fâretiŋ jaha foha eemasaŋ gie bahuc taha bapa siric‐jopambiŋ hâcne.
35Eme qowi bâzi guru sâko ŋewec ira ʒuhuckerâ wama bâzire biŋe wokemaŋ â qowi bâzire biŋe waiŋ taha wiac ŋewec wâc. Jaŋe iŋuc ehuc Wofuŋte ufuŋko gie bapa i mocwâc hefârockembiŋ.
36Erâ Hisikia â ŋic ŋokac sasawa jaŋe Anutuzi bafic‐jopaha wiac biac jaha efârembiŋte ʒeri efârembiŋ.
