YƐKOTINƆ̀ 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Kɑ̀ɑ yo ntikũnfɑ̃ɑ̃̀tì kɛ bonɛ̀ diwɛ̀ì dɛ̀ tɔ̃ũnɛ̀ ɑ bo nhɑ̃mɛ̀ imɑɑ mpìɛ́kɛ́ tɛ̀ɛ̀ cĩ́ɛ̃̀tɛ̀ kɛ bonɛ̀ yɛkpɑ̀rɛ̀.

²Otɔ̃ntì wèè ciì ò ɔ̃ɔ̃ bɑɑtɛ́mu tɛcĩ́ɛ̃̀tɛ̀ birɛ dɛ̀ɛ̀ yetɛ ditoò, kɛ́wɛ̃nnɛ́nɛ̀ dɛ tebìí kɛ̀ bɛ̀ɛ totɛ́ dɛ cicɛ kpɛrɛ.

³Bɛ̀ ɔ̃ɔ̃ yɑ́ɑ́kɛ́ mɛsɔɔ nnɛ̀ timɑ́tì pɛ́ítì muhɑ̃ɑ̃́ mmiɛkɛ nkɛ, Kuyie nkuù mɛ nyɑ̀ú onìtì yɛ̀mmɛ̀ mmɛ.

⁴Onìtì wèè dɔ́ mɛyɛi nhò kemmu inɔ́ndiɛ nyɛiyi yɛmbɛ̀ mbɛ, kɛ̀ siyɑ́ɑ̀bìsí yiɛ̀ nkenti siyɑ́ɑ̀bìsí.

⁵Wèè dɑú ocĩ̀rì ò dɑú Kuyie nku kùù ò dɔ̀ɔ̀, kɛ̀ mɛyɛi ntùɔ̀kɛní otɔù kɑ̀ɑ ò dɑú ɑ bɑ́ɑ́ mɔ́ntɛ́ dɛ kó tiyeti.

⁶Bɛkótíbɛ̀ kó diwɛ̀ì tu bɛ yɑɑ̀bí, kɛ̀ ibí kpɛri tú i cicɛ.

⁷Kuyɛìnkù í yíénnɛ̀mɛ̀ tinɑ́ɑǹsɑ̀ɑ̀tì, siyɑ́ɑ̀bìsí yiɛ̀ nyí mɛ nyíénnɛ̀ ò bo mbɑkɛ́mɛ̀.

⁸Bɛ̀mɑbɛ̀ yɛ̀mmɛ̀ dò nticuuti dɔɔri mɛsɑ̀ɑ̀ nkɛ ɔ̃ nte kɛ̀ bɛ̀ dɔ́ tìi dɔ̀ɔ̀.

⁹Kɛ̀ bɛ̀ dɑ dɔ̀ɔ̀ mɛyɛi nkɑ̀ɑ mɛ̀ yɛ̃̀ dí nnɑɑti, kɑ̀ɑ mɛ̀ mmɛ̀ dènniní sɑ̃́ɑ̃̀ dí nsĩ̀.

¹⁰Kɑ̀ɑ kpɑnnɛ̀ wèè ciì dɛ̀ bo ò teennɛ̀ kɛ́pɛ̃ɛ̃tɛ́ ɑ bo puotímɛ̀ kuyɛìnkù dinɑsɑ̃́ũ̀ kucɛ tɛkɔ̀ùtɛ̀ (100).

¹¹Onitiyɛiwe ɔ̃ ndɔ́ mɛcɑɑ̀rìmɛ̀ mmɛ ò mɛ nyóó mɑ́ɑ́nɛ̀mu ditɔ̃nnì yɛiri.

¹²Kɑ̀ɑ conɛ̀ kumuntũnkù kùù mɔ̀ńtɛ́ ku bí dɛ̀ tɔ̃ũnɛ̀ ɑ bo conɛ̀mɛ̀ kuyɛìnkù nɛ̀ ku yɛìntì.

¹³Bɛ̀ ɔ̃ɔ̃ dɔɔ̀ wè mɛsɑ̀ɑ̀ nkòo dɔɔ̀ mɛyɛi, mɛyɛi nyí iiti o cĩ́ɛ̃̀tɛ̀.

¹⁴Kɑ̀ɑ ketɛ́ dikpɑ̀nnì ɑ kpɛ̃̀tɛ́ kukpɛ̃́roo nku, yĩ́ yúóó kɛ dikpɑ̀nnì mu nyí ketɛ́.

¹⁵Kuyie nyí dɔ́ onìtìi cɑɑ̀rɛ̀ kɑ̀ɑ ò kòńnɛ́, kù mɛ nyí dɔ́ wè nnɑɑti kɑ̀ɑ dɔ̀ ò cɑ̀ɑ̀rɛ̀.

¹⁶Kuyɛìnkù yóó dɔɔ̀nɛ̀ bɑ idíítí, kù bo ì dontɛ́nɛ̀ mɛciì mmɑɑ̀? Kù í mɔkɛ dɛ kó mɛyɛ̀mmɛ̀.

¹⁷Onìtì ɑ nɛ́po ɔ̃ ndɑ dɔ́mu bɑ́ dìì mɔ̀nnì, kɑ̀ɑ kou dɑ teénnɛ̀ diyiè yɛiri.

¹⁸Kuyɛìnkù kuù ɔ̃ɔ̃ bɛ́i nkɛ́potɛ́ ku nɔ̀ùtɛ̀ kɛtenkɛ̀ kɛ dɔ̀ kù bo yietí otɔù kó dibɑ̀nnì.

¹⁹Wèè nɔnnɛ̀ yɛkpɑ̀rɛ̀ ò dɔ́ mɛyɛi mmɛ, wèè tɑ̃ omɑ́ɑ̀ ò dotimu.

²⁰Oniticiìntì bɑ́ɑ́ yɑ̀ diwɛ̀ì, kɛ̀ mɛyɛi mpĩĩ fɛnɔ́ndɛnyɛifɛ yiɛ̀.

²¹Wèè pɛitɛ́ kuyɛìnkù ò ɔ̃ mbonɛ̀ mɛyɛǹcɑɑ̀rìmɛ̀ mmɛ, kuyɛìnkù cicɛ í mɔkɛ diwɛ̀ì mɑrì.

²²Kuyɛǹnɑɑtí tú mutie mmu, kɛ̀ mɛyɛǹcɑɑ̀rìmɛ̀ yɔ̀ku onìtì.

²³Onitiyɛiwe ɔ̃ɔ̃ cɔutɛ́ ticuuti disɔ̀rì ndi, kɛ́cɑkɛ tibeéntì.

²⁴Mɛciì nyiɛ̀ nhɔ̃ nwúó mmɛciì nkpɛrɛ ndɛ, kɛ̀ kuyɛìnkù wùó ndɛdɛ́tirɛ̀ kù í yóó nintɛ dɛ̀.

²⁵Kuyɛìnkù cicɛ ɔ̃ mbonɛ̀ mɛyɛǹcɑɑ̀rìmɛ̀ mmɛ, kɛ̀ ku yɔ̃ bonɛ̀ iyĩ̀ɛ̃̀kɛ.

²⁶Dɛ̀ í wenni ɑ bo duɔ́mmɛ̀ kɛ̀ wèè í cɑ̀ɑ̀rɛ̀ kòò yietí, dɛ̀ mɛ nyí wenni ɑ bo puotímɛ̀ bɛkótíbɛ̀ bɛ sɑ̀ɑ̀ nkpɛ́í.

²⁷Wèè í nɑ́ɑntɛ nɑ́ɑntɛ sɔ̃́ntíkɛ ò mɔ̀kɛ mɛyɛ̀mmɛ̀ mmɛ, wèè miɛkɛ í pɛ́íkú ò ciìmu.

²⁸Bɑ́ kuyɛìnkù kɛ̀ kù cĩ̀ɛ̃́kɛ́ bɛ̀ ɔ̃ nyɛ̃́ kɛ tú kù ciìmu, wèè pĩ nho nùù ò ciìmu.