Ol Provep 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Aa medame nipuna ona naaki nogonu raapu lo-robaa padane sua piralimiri nimumi eta ragota page pa salimi. Go-me mo adaa eta yawo neme onaa-me pemea page rabuniaya.

²Gore kogono naaki medame epe kone sua kogono palia rabu nipuna surube aana si-rupa piralia. Mo surube-aana wae naaki nipu mo kogono naaki-na rolo-para piralia. Goa pua mo surube aa omalia rabu oyae nipuna nogo naaki ruru raapu rumaalimi.

³Adaa Aa-me niaa wae aa yapae epe aa yapae loa rumaa adolalo pea. Gore golo silva yapame adolalo repena egaa-para iritimide-rupa niaa epeta pae ota pae lo adolalo pea.

⁴Wae agaa lo ipa awaalae agaa teme aanu nimumi mo nimuna wae agaa lape mada aane luyapainaloa waru pageme.

⁵Gote-me onaa raayo warisa. Aa medalomame naara aanu-para ero loa wae agaa temere nimumi Gote-para teme. Aa medame aa yago medana kedaa rialia rabu raname omalia-dare go paliade pedome nipuna bipa nipu wae yoto mealia.

⁶Aa meda nipu ogae yalia pare nipuna akuaa naaki-nu piralimiri raana waru omalia. Gore akolo ya? Gomere nimu adaa bi kata rabu nogo naakimi nimuna agi aaraanu raname omeme.

⁷Epe kone sua agaa temere kone na-i aanuna agaa-rupada nateme. Ora agaa riaare yaa agaa teme aanuna agaada dia.

⁸Omeme pua waea pape madaa aa medalomame mone oyae meme pare nipumi aba adea. Go monere ona rakia nonapiane meapa yana kone sua nipuna raana epea-rupa ratea.

⁹Aa medame nipuna adami aanu raapu epe-rupa pirano kone saliare nipumi aba pisade pupitagi pename namea salia. Aa medame aba pisade wae yaenu madaa agaa pamu teare mo aa nipu ratu yawalia.

¹⁰Neme epe kone i aa meda raapu agaa maredo yaatalo palipiri agaa rana padane te rabu nipumi makuae yae aipapulu mealia. Go yapare neme wae kone i aa maredepo yatalo pali-dare nipu kalaipu ma-epeali. Goa pali pare nipuna kone aipapulu na-epealia.

¹¹Waea pi aame-re yada papena agaa agu marekaaya. Goa pea rabu wae aa meda ipua nipu radaa waru pina talia.

¹²Neme mena-beana si ripina mua mea epali rabu kiraa mena nipu poraania madaaliri ne epaa tu naalia-rabu adaa radaa nali. Goa palia pare aa meda epe kone nasua waea pulalo pea aa poraa adali rabu ne tu-nalia.

¹³Gore nimumi aa meda epea pulalo paliri go aame wala wae yaeme abutea rabu oro yalo nipuna onaa nogo naaki luabu wae-rupa pirualimi.

¹⁴Aa medame ratu yawe kone marekaliare ipa naaku robo sua ipa popenaloa poaya-rupa mada. Goa palia-dare nipu gimoa waea naepalia rabu epealia.

¹⁵Adaa Aa-me go kone laapo gimi omea. Pupitagi ne aa pa pirina teme page waeanu napi aa madaa pama kedaa mea kateme page gimea.

¹⁶Naaki meda epe kone nasaliare nipuna aalu waeame regepe ta-pulu nipu makuae yae mada namealia. Gore mo aana alu regepetaga sukulu kabape mone wala akolo mea epenaya?

¹⁷Niaana adami aanumi oro yalo niaa raaname omeme. Goa pua kedaa ritima rabu niaana kedaa rabamu ritalo nimumi managola pimi.

¹⁸Kone waru na-i aanumi aa medana yago nimumi abulalima loa nimumi mada na-abulape yapare pama yaa agaa teme.

¹⁹Waea pape madaa raaname omea aamere wala yada pape madaa raana omo yada marekaaya. Go page aa medame nipuna bi minasaaliare go aa nipuna bipa nipu omape yae asapea.

²⁰Aa medame oro yalo wae kone su wae agaa agu teare nipu oro yalo epe-rupa mada napitia. Dia nipu wae-rupa agu pirualia.

²¹Aa medana simi epe kone nasaliare oro yalo aaraa nipu lo-robaa keda mu aalia.

²²Lo robaa kuma pua raana piamere marasini noa epe-rupa pimi-rupa mada pia. Go yapare aa meda nipuna kone oyaliare wae yainame mo aa nipu ripinalia rabu uni-para yaina aawa maadapalia.

²³Waea pi aa nipu koso pagape yapidi medame pa laga taliare omeme pua kabe reke mua koso maoyaalia. Goa pua nipumi mo koso ma-oyaatalo mone mua raaname waru omalia.

²⁴Waru makuae aamere epe kone page epe pora waru ratea-pulu nipumi makuaya. Go yapare waea aame epe kone naia-pulu oyae rado rado luabu pamu yota.

²⁵Aame wae maeyae kone rataliare go naakina agi aaraame lo robaa kedaa adaa mua nimuna kone-para oyalia.

²⁶Koso epe-rupa ta aa-para koso kabena temere gore naepeta. Aa mudunumi epea palaina nimu wala aipuyaame talimiri gore naepeta.

²⁷Makuae yae waru mea aamere nipu agaa bebo nata. Epe kone i aamere aipapulu ratu yawape page gimea.

²⁸Epe kone na-i aamere agaa loralia. Go rabu onaame go aare epe kone waru-i aa-yana kone salimi.