Taalie 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Taami xuntunyi sɔtɔfe bɔɲɛsa kui na nan fisa sube gbegbe sɔtɔfe bɛ lantareya na dɛnnaxɛ.

²Walikɛ xaxilima sɛnbɛ gbo dangife wali kanyi xa di ra, naxan fe mayaagixi rabama. Na walikɛ mɔɔli tan kɛ sɔtɔma nɛ na denbaya kui.

³Xɛɛma nun gbeti matose na tɛ nan na, kɔnɔ Alatala nan adama bɔɲɛ matoma.

⁴Fe kobi raba wɔyɛn tinxintare ramɛma, a a tuli matima wule falɛ ra.

⁵Mixi naxan yoma setaree ma, na bara setare Daa Marigi yelebu. Mixi naxan yelema a boore xa tɔɔrɛ ma, na ɲaxankatɛ nan sɔtɔma.

⁶Mamadie findixi forie xa sɛɛwɛ nan na, babae fan findixi e xa die xa sɛɛwɛ nan na.

⁷Mangɛ xa wɔyɛnyi mu lan xaxilitare dɛ i, wule mu lan mangɛ dɛ i.

⁸Ki tife naadɛe rabima nɛ, a fe birin sɔɔnɛyama nɛ.

⁹Diɲɛfe konbi ma a marafanyi nan na gboma, kɔnɔ na ifalafe a xanuntenmae tagi isoma.

¹⁰Tantanyi masenfe lɔnnila bɛ a fahaamui fima nɛ a ma, dangife lɔnnitare bɔnbɔfe luxusinyi ya kɛmɛ ra.

¹¹Mixi ɲaaxi naxan mangɛ matandima tun, sɔɔri kinikinitare nan xɛɛma a xili ma.

¹²Naralanfe sube xaaɲɛ ra, naxan xa die baxi a yi, na fisa naralanfe xaxilitare ra, naxan ɲɛrɛma a xa xaxilitareɲa kui.

¹³Mixi naxan fe fanyi ɲɔxɔma fe ɲaaxi ra, fe ɲaaxi mu makuyama na xa banxi ra.

¹⁴Gere fɔlɔfe luxi nɛ alɔ bogoni ibɔɔfe. Na kui beenun sɔnxɔɛ xa mini, keli naa.

¹⁵Mixi naxan nɔndi fima fe kobi rabama, nun mixi naxan tinxintɔɛ tɔɔɲɛgɛma, e mu rafan Alatala ma.

¹⁶Hali kɔbiri lu lɔnnitare yi ra, a mu na rawalima lɔnni sɔtɔfe ra.

¹⁷Mixi a dɛfanboore xanuma tɛmui birin, a a ngaxakerenyi malima a tɔɔrɔ tɛmui.

¹⁸Lɔnnitare naxan xaxili mu na, na nan gbansan taanima a boore bɛ.

¹⁹Gere rafan mixi yo ma, yunubi fan nafan na kanyi ma. Mixi naxan a yɛtɛ igboma, xunnakanɛ nan a lima.

²⁰Mixi yo madaxui tima, na mu hɛɛri sɔtɔma, Mixi yo wɔyɛn kobi falama, na tɔɔrɔma nɛ.

²¹Mixi yo di lɔnnitare bari, na fama nɛ tɔɔrɔde. Mixi yo di xaxilitare sɔtɔ, na mu sɛɛwama.

²²Bɔɲɛ sɛɛwaxi, seri fanyi na a ra, xaxili sunnunxi tan xɔrie nan xun nakanama.

²³Mixi ɲaaxi see rasuxuma gundo ra, alako kiiti tinxinxi xa mafindi.

²⁴Lɔnni makɔrɛ xaxilima ra, kɔnɔ xaxilitare ya tixi fe makuyaxi nan na.

²⁵Di xaxilitare findima tɔɔrɛ nan na a baba bɛ, a findi xɔnɛ ra a nga bɛ.

²⁶A mu lan kɔbiri xa ba tinxintɔɛ yi ra, a mu lan kuntigi xa bɔnbɔ a xa tinxinyi xa fe ra.

²⁷Xaxilima a dɛ nan suxuma, a bɔɲɛ mu tema.

²⁸Xaxilitare nɔma a maɲɔxunde lɔnnila ra xa a dunduxi, a nɔma a maɲɔxunde fahaamula ra xa a sabarixi.