John 17

1

2

3

4

5

6

7

8

9

10

11

12

13

14

15

16

17

18

19

20

21

¹Nil Jesus.an wik inangan kanan thaw-a, nil um keny thath, aꞌ thaw, “Ayyang, Piip-ang, aakan kan-ngul wampan ngathar mul wunanakana. Than mak kan-kanam thathayn ngayang nhengk nungkaraman min paththam iiy-iiyang, than yipam thiichayn ngul nintan-a, wuut piꞌana, minam paththam.

²Nint puth thawan ngathar moom piꞌan iiyāng thant pam wanch maꞌmangkamant, aak umyompanam inana, ngay yipam ngangk aak umpuyam wunanakan theeꞌāng thant, wiy al-alantan, nintan miꞌan thanang ngathara. Than puth ngangk aak umpuyam ngul wunayn nungkaranga,

³than yipam kan-kanam thiichayn nintang ngul, nint puth piip God kan-kanama, nintam anman thonam, than puth yipam ngayang tham thiichayn, nhengk nungkaram inan, ngay Jesus Christ.an, nintan ngayang kuchan aak iikanakan. Keꞌ than kampan thanttaman thiichantan-a, than ngalangan yimanangan thiichayn.

⁴Ngay aak ingan-a, work kanam minchathangan nintan waaꞌanar, aꞌ than puth yotang kan ngaantam-ngeeyantan nintan wuut piꞌan aꞌ min paththam, keꞌ wiy yimanangan yaꞌa.

⁵Piip-ang, keenkanaman-a, aak keꞌan yippakan wun-a, ngay nungkarang nangman wun-wunangan, ngal puth-a, thonam anman, ngangk min anman. Nint ngayang minam ngaantam-ngeeyāna, keꞌ ngal keenkanaman wunala, yimanangan nganyang minam ngaantam-ngeeyān.

⁶“Pam inangan nintan miꞌan thanang ngathara, than yipam ngurp ngatharaman iiyayn. Than nungkar thampa, an puth nint miꞌan thanang ngathar. Ngay puth aak ingan meeꞌ thanttamang kanam wunangan, an puth thanan kan thathin, aꞌ puth wik ngeeyin nint want-wanttakan. Than puth wik nungkaraman min-minakam ngeey-ngeeyantan.

⁷Than puth kan-ngul ngaantam-ngeeyin ngayangan, yot ngayan yumpangan-a, thawangan thakan-a, an puth nintaman maꞌ-aath-aathan ngayang, puth thaaꞌ-aath-aathan ngayang thamp.

⁸Nint wik tham kuchan ngayang thant, ngay puth wikan kan waaꞌangan thant aꞌ than ngangk minangam ngeey-ngeeyin, wik nungkaraman. Than kan-ngul thiichin ngayan puth nungkaram nanpalan wampang, puth nintam kuchan ngayang.

⁹“Ngay pam il-ilantakaman meeꞌ-wuthanamang. Ngay inman keꞌ meeꞌ-wuthanamang pam wanch wiy al-alantana, ngay puth meeꞌ-wuthanamang thant il-ilantakaman nintan miꞌan thanang ngurp ngatharaman iiyayn. An puth pam inangan-a, nungkar thamp.

¹⁰Ngal puth karp piꞌ-piꞌanal thanang, than puth pam ngalantakam iiy-iiyantan. Than pam wanch wiy al-alangan thathayn thanang-a, ngurp ngatharam inangana, thanan ngul thaaꞌ-kuumpayn ngayang.

¹¹Ngay puth inan kan-ngul puy iiyāng nungk, ngay aak inan kan-ngul wantāng. Puth thananiy-a, pam ngalantam inangan-a, an ep than aak ingman wunayn. Ayyang, Piip-ang, nintan-a, wuut piꞌan aꞌ min paththam, keꞌ wiy yimanangan yaꞌa, nint pam inangan thath-thathān thanang, maꞌ thayanangam piꞌ-piꞌān thanang, pam inangan nintan waaꞌan thanang ngurp ngatharaman iiyayn. Nint thath-thathān thanang, than yipam karpam keꞌ kuchek thonamang ngaantam-ngeeyayn nintangan, keꞌ ngal yimanang thonam anman.

¹²Ngay ingman thanttang yippakan iiy-iiyangan-a, an ngay maꞌ thayanangam piꞌ-piꞌangan thanang, nintan puth maꞌ ngatharang thanang wantan. Ngay thanang maꞌmangkam minam piꞌ-piꞌangan, ngay puth keꞌam maꞌ wayathangan thananga, yotam minam anman piꞌ-piꞌangan thanang. Nil pam thonamangan ep want ngayang. Nil uthamowan-a, ngangk nungantaman maꞌ nungkarang keꞌ wunow, yaꞌa. Kan-ngulan-a, wik thanan keenkanaman waaꞌin nunang-a, lat ngench thayanangan-a, kan-kanam ngul wampow nungant.

¹³“Ngay inan kan-ngul puy iiyāng nungk, puth wik inangan kon ngurp ngatharamantang thaw-thawang aak ingana, than yipam ngangk minam paththam iiyayn, ngangk kuupamayn ngatharaman.

¹⁴Ngay puth kanam wik nungkaraman waaꞌangan thant. An puth nanpalan than pam wiyangan ngangk-wayangam kal-kalin thanang ngurp ngatharam inangan. Than puth woyan pam wiyantaman keꞌam wak-wakantan, yaꞌa, keꞌ ngay yimanangan woyan thanttaman keꞌam wak-wakang, yaꞌ anman.

¹⁵Piip-ang, ngay nungk keꞌam thawangan puy thechathān thanang pam wanch wiy way al-alantaman, yaꞌa, ngay inan nungk ep thawāng nint min-minam piꞌ-piꞌān thanang oony way piꞌan alantaman, nil keꞌ yipam wayathow thanang.

¹⁶Than puth woyan pam wanch wiyantam keꞌam wak-wakantan, yaꞌa, keꞌ ngay yimanangan woyan thanttaman keꞌam wak-wakang, yaꞌ anman.

¹⁷Nint puth piꞌ-piꞌān thanang nungkarakam, yipam woyan min nungkaram anman wak-wakayn, than puth wik nungkaraman kan ngeeyin, wik min anangan kan-kanam paththam.

¹⁸Ngay kanam kuchang thanang work nungkaram yipam iiyayn thanttang, pam wanch wiy al-alantangan aak ingan wuntan, keꞌ nintan kuchan ngayang aak iikanakan.

¹⁹Ngay inaniya maꞌ nungkarang wantang ngatharakamana, puth wiyantangan yaꞌa. In puth min thant ngurp ngatharam il-ilantana, than ngulan yipam ngangk punch-aakam theeꞌwayn nungkarana, nintangam anman monkan-wak-wakayn, wiyan yaꞌa.

²⁰“Piip-ang, ngay puth ngurp ngatharam il-ilantan thonakam keꞌ meeꞌ-wuthanamāng, yaꞌa, puth thant wiy al-alantan thampang meeꞌ-wuthanamāng, than wikan ngeeyayn thanttam, aꞌ monkanan-wakayn ngayang ngulan.

²¹Ngay inaniy thawang nungk piipa, thanan yipam karpam keꞌ kuchek thonamang ngaantam-ngeeyayn nintang. Thanan ngangk ngalantamangan mak wun-wunayn, keꞌ ngay ngangk nungkarangan wun-wunang, aꞌ nintiy-a, ngangk ngatharamang wun-wunangan. Than mak thonamang ngul iiy-iiyayn, than pam wanch wiyangan yipam kan-ngul ngaantam-ngeeyayn nintan kuchan ngayang.

²²Nintan-a, pam min paththam waaꞌangan ngayang, aꞌ ngay yimanangan pam wanch min paththam waaꞌangan thanang, nintangan yipam ngaantam-ngeeyayn keꞌ kuchek thonamang yimanangan, keꞌ ngal thonam anman.

²³Ngay puth ngangk thanttamangan kan wun-wunang, nintan puth yimanang ngangk ngatharang wun-wunangan, thanan puth yipam thonamang anman iiy-iiyayn, than yipam pam wanch wiyangan thiichayn ngul nintan kuchan ngayang, aꞌ puth nintan kaangk wunangan thant keꞌ nint ngatharan kaangk wunangan.

²⁴“Piip-ang! Nint pam wanch inangan kanam miꞌan thanang than ngayang yipam monkan-wakayn. Thanan mak ngatharang wunayn aak-aakanakan ngayan iiyāng, thanan yipam min-min thathayn ngayang angman nungkarang, nhengk nungkaraman, keꞌ nint yimanangan, wuut piꞌan aꞌ min paththam, puth nint ngathar kaangk wunangan aak nathpalmana, aak inan keꞌaman yippak yumpala.

²⁵Piip-ang, nint min-minam paththama, minam anman iiy-iiyangan, way thonam keꞌ yumpanam. Than pam wanch al-alangan kaangk keꞌan monkan-wakayn nintang-a, al-alangan keꞌam thiichantan nintang, yaꞌa. Ngay ep piip nintang thiichangan, aꞌ ngurp ngatharam il-ilangan kan thiichin nintang nint ngayangan kuchan aak iikanakan.

²⁶Than kan thathin ngayang aak ingan wun-wunangan, aꞌ puth ngayan thaaꞌ-aath-aathangan thanangan, puth than nintangan kan-ngul thiichin. Aꞌ ngay putham wik nungkaraman ngul thaaꞌ-aath-aathāng thanang, nint yipam kaangk wunān thant, ngangkang ngoonchān thanttang, keꞌ nint ngatharan kaangk wunangan, aꞌ ngay thampang yipam ngangkang ngoonchāng thanttangana.”