John 11

1

2

3

4

5

6

7

8

9

10

11

12

13

14

15

16

17

18

19

20

21

¹Be’ nib mo’on ni Lazarus fithingan, ni i par u lan yu Bethany, e yib e m’ar ngak. Mu Bethany e eram e re binaw nma par Maria nge walagen i Martha riy. (

²Ma cha’nem i Maria e eram fa’anem ni pu’og fare florida nga daken e rifrif u ay Somol nruw raba’ me faley nga piyan lolugen; ma aram e en ni walagen ni Lazarus e ke yib e m’ar ngak.)

³Me pi’ fa gali ppin ni walagen e thin nge yan ngak Jesus ni lungurow, “Somol, fare fager rom nrib t’uf rom e ke yib e m’ar ngak.”

⁴Ma nap’an ni rung’ag Jesus me yog ni ga’ar, “Ke yib e m’ar ngak Lazarus, machane wenegan e liliy ni keb ngak e dabi yan i aw ni yam’; ya ke yodorom ni fan e nganog e sorok ngak Got, me ir e ngkunog e sorok ngak Fak Got riy.”

⁵Me Jesus e rib t’uf Martha rok, nge Maria ni walagen Martha, nge Lazarus.

⁶Ma fa’ani rung’ag e thin nike yib e m’ar ngak Lazarus miki par Jesus l’agruw e rran ko gin ni ba’aram ni bay riy.

⁷Ma aram me ga’ar ngak pi gachalpen, “Marod ngad sulod nga Judea.”

⁸Me fulweg pi gachalpen ni lungurad, “Tamchib, dawori n’uw nap’an ni finey fa picha’ nu Israel ni ngar malang niged gur; me ere kam finey ni ngam sul ngaram?”

⁹Me ga’ar Jesus, “Ra reb e rran ma ragag nge l’agruw e awa ni bay riy fa? Ma fa’anra yan be’ nib rran ma dabi tun ay, ya be guy e tamilang ko re fayleng ney.

¹⁰Machane fa’anra yan nneap’ mra tun ay, ya dariy e tamilang rok.”

¹¹I yog Jesus e re bugithin ney me ul ul ngay ni ga’ar, “Fager rodad i Lazarus e ke mol, machane bay gu wan gu pug.”

¹²Me fulweg pi gachalpen ni lungurad, “Somol, fa’anra be mol ma bayi gol.”

¹³Machane aram e be yip’ Jesus fan nike aw e fan rok Lazarus; ma yad be finey ni aram e be yog Jesus ni be mol Lazarus.

¹⁴Ma aram me ri yog Jesus ngorad nrib tamilang ni ga’ar, “Ke aw e fan rok Lazarus;

¹⁵machane bochmed ma aram fan ni kug felan’ ngay nda ug moy rok, ya nge yag ni gu mich u wun’med. Ere ngdarod ngak.”

¹⁶Mi Thomas (ni yima pining Athlog ngak) e yog ngak e pi’in yad ni gachalpen Jesus ni ga’ar, “Gadad gubin ni ngad uned ngak Tamchib, ya ngad uned ngak ko yam’!”

¹⁷Ma nap’an ni taw Jesus, me pir’eg ni nga aningeg e rran nap’an ni kan mu’ i chibgiliy Lazarus.

¹⁸Ma yu Bethany e ba lich nga l’agruw e mayel mal’afngin u Jerusalem;

¹⁹ma aram e pire’ e girdi’ nu Israel ni karbad ni ngar guyed Martha nge Maria ni ngar puruy’gad ngorow ni bochan e yam’ nike tay walagrow ni pumo’on.

²⁰Ma fa’ani rung’ag Martha ni be yib Jesus, me yan ni ngar mada’gow; me par Maria u tabinaw.

²¹Me ga’ar Martha ngak Jesus, “Somol, fa’an mang e um moy u roy, ma dawori yim’ walageg!

²²Machane gu manang ni mus ko chiney ma demturug e tin ni ga ra ning ngak Got mra pi’ ngom.”

²³Me yog Jesus ngak ni ga’ar, “Bay ni faseg walagem ko yam’.”

²⁴Me fulweg Martha ni ga’ar, “Gu manang ni bay ni faseg ko yam’ ko chirofen ni ir e tomur ko rran.”

²⁵Me yog Jesus ngak ni ga’ar, “I gag owchen e fos ko yam’ nge yafos. Yigu ra ke yim’ be’ ni gub mich u wan’ mra fos;

²⁶ma en nra i par nib fos ni gub mich u wan’ e dabki yim’ bi’id. Ke mich u wun’um e re bugithin ney fa dawor?”

²⁷Me fulweg ni ga’ar, “Somol, errogon! Ke mich u wun’ug ni gur fare Messiah, ni Fak Got gur, ni fa’ani ir e nge yib nga fayleng.”

²⁸Ma nap’an ni mu’ i yog rok Martha e re bugithin ney me sul nge pining walagen ni bpin i Maria u fithik’ e girdi’ nga orel me weliy ngak ni ga’ar, “Fare Tamchib e ke yib ma be fithem.”

²⁹Ma fa’ani rung’ag Maria e re bugithin nem me sak’iy ngalang nge yan nib gurgur ni ngar mada’gow. (

³⁰Ma dawori taw Jesus ngalan binaw, ya kabay ko gin nra mada’gow Martha riy.)

³¹Ma picha’ nu Israel ni ur moyed rok Maria u naun ni yad be puruy’ ngak e ra leked ko ngiyal’ nra guyed ni sak’iy ngalang nge yan nga waen nib gurgur. Ya kar fineyed ni nge yan ko gin ni ka ni yan nchibgiliy fare yam’ ngay ngi i yor u rom.

³²Ma fa’ani taw Maria ko gin ni bay Jesus riy me guy, me yan i paraw u to’oben i ay Jesus nga but’. Me ga’ar, “Somol, fa’an mang e um moy u roy, ma dawori yim’ walageg!”

³³I guy Jesus Maria ni be yor, nge fapi cha’ nu Israel ni yad be lek ni ku yad be yor; me ri taganan’.

³⁴Me fithrad ni ga’ar, “Bu uw e gin’en ni kam marod mchibgiliyed ngay?” Miyad fulweg ni lungurad, “Moy, Somol, ngam guy.”

³⁵Me yor Jesus.

³⁶Ma aram me yog fa picha’ nu Israel ni lungurad, “A mu guyed nga feni t’uf Lazarus rok!”

³⁷Machane me yog boch i yad ni lungurad, “Gathi ir fa’anem ni chuweg e malmit rok fare mo’on? Ere gur dabiyag rok ni nge tay Lazarus ni dabi yim’?”

³⁸Me yib e kireban’ nib gel ngak Jesus bayay, me yan ko fa gin ni kan chibgiliy fa’anem riy, nib yiy ni kan ning nga ba gaf i malang.

³⁹Me yog Jesus ni ga’ar, “Mu chuweged e re gaf i malang nir!” Mi Martha, ni ir e walagen fa’anem ni kem’ e fulweg ni ga’ar, “Somol, ra yib gol’ochngin nib kireb. Ya ke gaman aningeg e rran nchibgiliy!”

⁴⁰Me ga’ar Jesus ngak, “Gathi gog ngom faram ni ga ra guy e tin nrayag ni nge rin’ Got ni yira ngat ngay ni fa’anra mmich Got u wun’um?”

⁴¹Miyad chuweg fare gaf i malang u langan fare yiy. Me sap Jesus ngalang me ga’ar, “Chitamag, kari mmagaer, ni ga be rung’ag lungug.

⁴²Gu manang ni gubin ngiyal’ ni ga ma rung’ag lungug, machane kugog e re bugithin ney ni bochan e pi girdi’ ney ni yad bay u roy, ni fan e nge mich u wun’rad ni gur e ka mol’oegeg ku gub.”

⁴³Ma nap’an ni mu’ i yog rok e re bugithin ney me pong ni ba ga’ gaman ni ga’ar, “Lazarus, moy nga waen!”

⁴⁴Me yib fare yam’ nga waen, ni kan ing pa’ nruw raba’ nge ay ko mad ko gum’eyag, ma ka ni bachiy bangi mad nga owchen. Me yog Jesus ngorad ni ga’ar, “Mpithiged e mad u downgin nge yan.”

⁴⁵Ma bo’or boch i yad fapi cha’ nu Israel ni fa’an rabad ni ngar guyed Maria nra guyed e n’en ni ngongliy Jesus, me mich Jesus u wun’rad.

⁴⁶Machane boch i yad e ra sulod ngak fapi Farise ngrogned ngorad e n’en nike ngongliy Jesus.

⁴⁷Ma aram me yan fapi Farise nge pi tolang ko prist ngar puruy’gad girdi’en e mu’ulung rorad me lungurad, “Mang e ngad rin’ed? Ya ke yo’or e maang’ang nike ngongliy e re mo’on nem!

⁴⁸Fa’anra da paged ngi i yodorom ma urngin e girdi’ ni bayi mich e cha’nem u wun’rad, ma aram me pigicheal e am nu Roma ngar kireb niged e Tempel nge nam rodad!”

⁴⁹Ma bagayad ni Kaifas fithingan ni ir fare Prist ni Th’abi Ga’ e re duw nem e ga’ar, “Dariy ban’en ni gimed manang!

⁵⁰Der pat nga lanin’med ni kabfel’ ni ngam paged ta’abe’ nge yim’ ni fan ngak e girdi’ ko bin ni ngan kirebnag e re nam ney ni polo’?”

⁵¹Machane bin riyul’ riy e de yog e re bugithin ney ni ir e sum u laniyan’; ya ba’aray rogon, i ir fare Prist ni Th’abi Ga’ e re duw i n’em, ma aram e be yi’iynag nike chugur ni nge yim’ Jesus ni fan ngak piyu Israel,

⁵²ni gathi kemus ni go’ yad e fan ngorad, machane ku fan e ngan ta’ab girdi’nag urngin pifak Got ni yad ba wear u fayleng.)

⁵³Ma fa picha’ nu Israel ni yad ma tay murung’agen e girdi’ nu Israel e ka chirofen nem i yan ngam’on e ur puruy’ niged rogon e n’en nra rin’ me yag nli’ Jesus ngem’.

⁵⁴Aram fan ndakiyag ni ngi i milekag Jesus u lan yu Judea nder mith, me chuw nge yan ngabangi ban’en nib chugur ngabangi ted ni desert u bbinaw ni Efraim fithingan, ni ir e ra pired pi gachalpen riy.

⁵⁵Ma aram e ke chugur e madnom ni Paluk’af rok piyu Israel, me yan e girdi’ ni pire’ u arow i yan nga tolang nga Jerusalem, ni ngan ngongliy rogoy ngan be’ech ni ka yalen ni yima rin’ u m’on ko re madnom nem.

⁵⁶Ma aram mu ur changar niged Jesus, ma nap’an nra mu’ulunggad ngalan e Tempel mu ur fithed yad u fithik’rad ni be lungurad, “Uw rogon ni gimed be finey? Sana dabi yib ko re madnom ney fa?”

⁵⁷Ma aram e ke wereg e pi tolang ko prist nge pi Farise e thin ni fa’anra manang be’ e gin ni bay Jesus riy ma thangri yog ngorad ngranod ra koled ngar feked.