Job 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eliphaz, tangada mai Teman, ga helekai, “Meenei Job, goe hagalee ga manawa gee, maa au ga leelee adu gi di goe? Au gu deemee di noho hua dee muu.

³Goe gu aago au daangada dogologowaahee, gei e hagamaaloo aga labelaa nia lima digau ala e paagege.

⁴Di madagoaa tangada ne duadua ga bagege gaa hinga, gei au helekai e hagamaaloo aga a mee gi duu aga labelaa.

⁵Dolomeenei di madagoaa ni oou e tale ginai nia haingadaa, gei goe gu manawa gee, gu deemee di duu maaloo gi di hagamada.

⁶Goe gu daumaha ang gi God, gei do mouli gu madammaa huoloo, gei dehee laa do manawa maaloo mo do hagadagadagagee dolomeenei?

⁷Haga maanadu ina malaa, ma iai tangada e donu guu hudu gi daha?

⁸Au gu gidee nia daangada ala e dogi nadau mee huaidu, ge e haga nonnono nadau huaidu gadoo be nia lii laagau gi lodo nia gelegele, gei digaula e hagi nia huwa o nadau huaidu mo nadau hangahaihai huaidu.

⁹God e hagahuaidu digaula gi dono hagawelewele gadoo be di madangi maaloo.

¹⁰Digau huaidu e ngoloolo nadau lee, ge wwolowwolo gadoo be nia laion, gei God ga haga deemuu digaula ga hadihadi nia niha digaula.

¹¹Digaula gaa mmade gadoo be nia laion nadau mee e daaligi gii made ai, ge nadau mee e gai ai, gei nia dama digaula ga modoho gi daha.

¹²“Dahi lee ne hanimoi be di lee haga moolee, gei au gu deemee di longono hagahumalia.

¹³Di lee deelaa la guu hai gadoo be di midi hagamadagudagu dangada dela ne oho dogu moe.

¹⁴Au gu madagu gu homouli ogu lodo, gei dogu huaidina hagatau gu bolebole i dogu madagu.

¹⁵Di angiangi guu tale mai gi ogu golomada, gei dogu gili guu wwana i dogu madagu.

¹⁶Au gu gidee di mee dela e duu i ogu mua, gei au e daumada di maa e de iloo e au be di maa di aha. Gei au ga longono di lee dela e hanimoi i di gowaa dela e kila loo, e helekai boloo:

¹⁷‘Ma iai tangada dangada i golo e mee di donu i mua nia hadumada o God, be e madammaa i mua nia hadumada o Tangada dela ne hai a mee?

¹⁸God hagalee hagadonu ana gau hai hegau ala i di langi, Mee guu gida ana huaidu i baahi ana gau di langi.

¹⁹Malaa, dehee laa dana hai ga hagadonu ana mee ne hai gi ono lima mai i nia gelegele, nia mee o di gohu gelegele ala e mee hua di llomi be di bege.

²⁰Tangada e mee di mouli luada, gaa made i mua di hiahi, deai tangada e iloo ia ai.

²¹Nia mee huogodoo ala e hai mee ginai mee la gu hagalee, mee guu made, gei mee digi iloo nia mee.’