Jop 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elifas te Teman hanu bidi agai Jopgo wali po oda silama, agai po wei ponoyu, te po wali,

²“Jop, eno po dwasianu nage dali waibao. Ma, tama eno tama tiyu da, teda nago ena dali wado yaibawe, ma meniwe? Tiali goli, tagala, eno penane panialugobeo.

³Eno koneani, nago dwagi yai homu we bidi hauwabolo mani. Tama nago bomo menia we bidi bomo ma ilali. Tede nago homu kone palao.

⁴Te we bidi genuai sęgę selama, tǫba tulaluai goli, nago augwalibolo dwagi yai po mawai. Tama nago te pogo augwali ma hodolai dao. Tama augwali ma bomo elama dolalumainogo nago augwali tau sali.

⁵Tiali goli, hobede mu dwali. Megi dwai sęgęgo mu nage te mesegelai yaba. Tama nage noma siyu, nago homu sęgę genuai mu te eba. Awe, te sęgę nageba pedalubaso, nage noma mu sali.

⁶Nage Godigo po wali peyu, tama agade lotu po weyu, tama aga dologode naga bidiyu eyu yaide, nago dwagi yai doloba pai kolesaga tigidali sogo eyu ebo da. Tama megi me nago agade homu dąų walama, tama agai nage ma tau somainu yao,” wali.

⁷“Jop, nago koneani, we bidi me dwagi yai kolesaga eyu, dwai kolesaga menia, te bidi dolama isaliwe? Ma, te doloba pai we bidi olo dolaliwe? Teda meni homu eba.

⁸Tiali goli, eno suali, dwai kolesaga hauwa ebo bidi dabe da, te bage da dwai kolesaga wali peyu, augwali sęgę hauwa wali peyu ebo. Te e tiwai dao, bidigo aga gide dwagi yai nai wai bulama, tama te dwagi yai nai sabo tiwai, ma te bidigo dwai nai wai bulama, tama te dwai nai sabo tiwai.

⁹Godigo te dwai sę ebo bidi dali sębę elama, tama augwali mu dolama, tama augwali mu silibo dao. Te e tiwai dao, isigo ni ulama sia sabo tiwai dao.

¹⁰Dwai bidi dabego gasa bidi dolama, dwagi yai homu ebo, te bulu yowi laiongo bulu hasa ela munama, hai wabo tiwai ebo dao. Tiali goli, Godigo te bidi dabe aiyaba elaluama, sęgę mena tagalobo dao. Tama augwali te bulu yowi laion tiwai dao, te augwaligo kele degelama, te bulu hasa ma ela tuabo usu meni ebo dao.

¹¹Tama te bulu yowi laion aga tuabo nai meniama, tama isibosi, augwaligo wai dabe wi tedela pabo. Te tiwai te dwai bidi dabe tigide ebo dao,” Elifasgo te po wali.

¹²Tama Elifas agai po genina mu ma weyu, te po wali, “Me sogo po me dua digi mu ena pageba sabolali. Pąde mu tama te po odabo ąǫ ebe.

¹³Te po eno hulide sali. Te bidi dabe sese mu godege pilama tomo mu igi paide. Ena pila mubadi yaide, te haniani kolesaga eno tobolude iba oba ida wali.

¹⁴Tama tibadi yaide, magi nai mego eno tigi wi ilama, tama eno tigi noma geninama mu sali.

¹⁵Tama dwasianu wali eno gesabididu aselama, eno gesabidi pona sąyani. Teda ena wi genuai mu elama, tama eno tigi nisi hodaluali.

¹⁶Eno magi nai me dolalubo suali. Tama tibaso, eno gedu dilasa mu tonali. Tama te nai eno bugagia koneabo ąǫ ebe, tama eno kilikili me me odobe. Tiali goli, nosali eno po me odali, te pogo e tama wali,

¹⁷‘Godigo tigidali we bidi nigai dao. Tama augwali aga dologode bidibao. Tama God agai gedude doloba pai bidi me bidibeo, te God aga tiwai.

¹⁸Te Godigo ensel mobo bidi dabe God aga dali bidiyu, sę agade ebo. Tiali goli, me sogo augwaligo augwa sę bugagia me ebo menio. Godigo subo da, te ensel mobo bidi dabe me sogo bugagia me bidibo menio.

¹⁹Tiali goli, bidi dabe da, e tǫde olo nai dao. Nago homu bidigo ensel bidi edelama, Godigo gedude doloba pai bidi bidaibawe? Godigo e tǫde bidigo tigi nigai dao. Tama augwali polo isibo da, te ba bogǫų bidigo sągą agala sabo tiwai dao.

²⁰Bidi me deli kigamu bugagia bidiyu, tama pio aga isilama, tama me badu we bidigo aga mu gegeda palaiba, agawe?

²¹Te bidi dabe dwagi yai kolesaga sisąbadi yaide, te isibo augwaliba polo sabolobo dao, te sel ugwa be te bono pįsįgana palobo si, tǫba polo tulalubo tiwai ebo dao,” wali.