Job 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Temán runa Elifazga Jobta niran:

²«Job, imallatapis parlaparcuptë capaschari rabyacunquipis. Nogapis manami upällallaga cacömannachu.

³Gamga achcajtami willapar tantiyachej canqui. Callpaynajno caycajta yanapaj canqui.

⁴Mana alliman chayajcunata shacyächir yanapaj canqui. Mana alliman chayananpaj caycajta tantiyachir willapaj canqui.

⁵Quiquiqui mana alliman chayashpayqui ichanga mana awantanquichu; llaquisha caycanqui.

⁶Gamga llapan shonguyquipami Tayta Diosta sirbinqui. Llapantapis allillatami ruranqui. ¿Imanirtaj llapan shonguyquipa mana yäracunquichu?

⁷Masqui yarpäriy, ¿piraj juchaynaj caycar mana alliman chayasha? ¿Mayllachöga ricashcanchïchu juchaynaj runa ñacajta?

⁸Nogaga musyämi, wañuchicojcunatawan jucta mana allita rurajcunataga ima päsashantapis. Quiquincunamanmi ayñiga cutin.

⁹Tayta Diosga mana alli runacunatami rabyar castigan. Castigar ushajpämi illgächin.

¹⁰Liyuncunano wagaptin, gaparpaptinpis, Tayta Diosga quiruncunatapis paquir-rämi upällachenga.

¹¹Paycunaga wañongapaj cäsata mana tarej liyuncunanömi. Wamrancunana machiypa-machir aywaconga.

¹²«Pacayllapami willapämasha. Shap-shapyayllapa rimajta yangallami wiyashcä.

¹³Llapan runacuna wañusha puñuycänan örami manchariypajcunata suyñupäcurä.

¹⁴Chaymi fiyupa mancharirä. Tullöcunapis sicsicyaycaran.

¹⁵Jämay wall-wallyamojta mayashcä. Chauraga intërömi shiriricäcuran.

¹⁶Ñaupächo juc caycajtanömi mayashcä. Llantusyajllatami ricashcä. Ichanga manami pï cashantapis rejsishcächu. Mana imapis cashanpitami wiyarcurä cayno rimarcamojta:

¹⁷‹Juc runaga Tayta Diospa ñaupancho ¿juchaynaj canmanchuraj? Camajninpa ñaupanchöga ¿limyu canmanchuraj?

¹⁸Janaj pachacho sirbiycajcunatapis manami pasaypaga yäracunchu. Anjilnincunatapis «mana allita ruran» niycarga

¹⁹¡masrächari runataga «juchayoj» nenga! Runaga caycan manacajllami, ñuchu allpa janancho mitupita wasita jatarachishanöllami. Puyuno llapiriyllapämi caycanpis.

²⁰Runaga illajpitami illaraycan. Imaypis mana cawarimojnami wañucun. Quëdaj runacunapis gongaycärinnami.

²¹Chutaycaptin jïlu rachicäcojnömi runaga usharaycan. Yachaj cayman manaräpis chayallarmi wañun› nir.