1Maing Sohp, komw seu pahn nsensuwedkihla ma I koasoiong komwi? pwe I solahr kak nennenla.
3Komwi me ketin padahkier aramas tohto, oh pil kakehlahda pehn aramas luwet akan.
4Ni emen eh kin dipekelekelki eh pwangadahr oh luwetalahr, omwi mahsen kan me kin koangngoangehki en uhda.
5A met, ni apwal eh lelohng komwiher, komw ahpw sohte kakohng oh kanengamahiong.
6Komw kin pwongih Koht oh omwi mour me mwakelekel mahso, eri met, komw pahn likih oh koapworopworki.
7Tamanda mahso. Mie aramas pwung men me lekdeklahr?
8I kilangehr aramas me kin padok me suwed, oh kamwarak me suwed, rasehng werentuhke nanpwel, duwen ar kin dolung suwed en ar wiewia kan.
9Koht kin ketin kamwomwkinirailla sapwellime engieng, rasehng melimel ehu.
10Me suwed akan kin weriwer oh wie ngiringir, rasehng laion kan, a Koht kin ketin katokeiraildi oh ketin kauwehla ngihrail kan.
11Re kin mehla oh neirail seri kan koaros kin tangpeseng, rasehng laion me sohte kin seike me en kang.
12Pak ehu ngiletik en mahsen pwoat ahpw peidohng ie, ngehi eri kerenieng sohte kak rongada.
13Likamwete ouraman ehu me kauwehla ei meir.
14Masak ahpw kipeiehdi, I ahpw wie rerrer; paliwereiet unsek iang rerrerkihda ei masak.
15Kisin engitik kis ahpw ipirada pohn meseiet, ahpw kidkidahrek nan kilih kat.
16I ahpw kilangada mwohmw ehu me kesikesihnen mwohi; mwohmw ehu me sohte nohn dehdeiong ie. Ngiletik ehu ahpw peidohng ie mahsanih,
17“Mie aramas emen me kak pwung mwohn silangin Koht de mwakelekel mwohn silangin Sounwiepe?
18Koht sohte kin ketin likih sapwellime lidun nanleng kan; e kin ketin diarada sapwung rehn sapwellime tohnleng kan.
19Eri a, ia duwen eh pahn ketin likih wiepen nin lime me wiawihda sang pwehl, me tepisang pwehl, rasehng kisin mahn kis me aramas kak padikpene kemehla?
20Aramas kak momour nimenseng, e ahpw kin mehla mwohn nin soutik; sohte me kin ese.
21Mehkoaros me e ahneki, kohsangehr; e mehla, ahpw e saikinte loalokongla.”
