Jopo 4

1

2

3

4

5

14

19

31

38

39

40

41

42

¹Elipaseme dopa leya. Namba pii laro dokopa emba mona kendarese? Nambame embena pii lapinyi sipunu dokome mee romo napyuo kararo ingya nalyamo.

³Embame wambu malu mana lamaiyuo karee kande. Dee embame wambu yulu pii nange kingi yukusi dupwa porainyi pyambuii kande.

⁴Wambu lapo poraiya nao luwaro sepala pao palipa piyaminyipa embame piimi lao minyalyuo karee kande.

⁵Wambo wambu dupwa randa nyiyaminyi nyisii kande epapu kapu kyepala randa emba keta epara panda silyamo. Dokopa papa lao rolao karapala emba apa piro lao see nalene.

⁶Wamba emba Anatu lakando karee dokopa emba keta koo mende pali naya. Dokona lao emba Anatu mende pyakara dokona suu pyale pyale karapengele ingilyamo.

⁷Wamba piyamo yulu dupwana lapo apa piya kande lao suu pyape. Suu pyapala akali rolae pingi mende doko anjuku wambana randa andake wakasa epeyamo neya lao suu pyapala langipi.

⁸Nambame kandeyono dokopa wambu lapome Satanena yuu dokona apyape pyao koo doko ee waingi dopale ingyuo wara pyuo kareyami. Doko lyuo nyingi mange dakepa yulu koo doko wane ingyuo manjo nyuo karaminyi kandelyo.

⁹Anatumi wambu dupwa banya imbu singi dokome yuu galame pili lenge.

¹⁰Mena laene dokome angamae manjo gaa lenge doko suu pyao wambu yulu koo andake pingi dupwame nenge sisi pyapala pii rekyae lenge. Dokopa Anatumi pii koo dupwa laa kaena lao kambu pyao pyarambulyasa nenge longo pingi.

¹¹Mena laene dupwame mena yango pyao naramili dupwa kara narami ramo dokopa nakama lopapala kumungi. Dopaleko ingyuo wambu yulu koo andake pingi dupwa kumulyaminyi dokopa nakamana wane wanake dupwa mee ralo karenge.

¹²Yuu mendepa pii wainde yalu pyuo elya kalo epeya. Ama pii isa isa randa nao serolinde lao epeya.

¹³Doko kukwa kombeya kopetame pyuo luu paleyono doko rokondakaya dopale ingiya.

¹⁴Pii doko sepala namba walu walu lao pungwa pungwa piya. Piyamo dokopa nambana yongo peparae paka renge nyuo walu leyo.

¹⁵Dokopa nambana lenge kambu dokona porambaiyende minyili leya. Minyili leyasa nambana yanenge doko kupwasa karo pakayo.

¹⁶Pakapala karo namba mende dumusa kararamo kandaroli lapala nambame kandaro siyu. Siyunupape angi dokoŋo lao lenge kambu maro laa naya. Enakana koo piku piku peyamo dokopa namba pii mende siyu.

¹⁷Dokona lao, Api mende Anatunya lenge kambu dorena rolae wakasa pyuo kararamo kandarase? Apimi baa pyuo wasiyamo dokona lenge kambu dorena poo pyasi ingyuo kararamo kando kararase?

¹⁸Anatumi banya yake pandana aŋala pii wai minyingi dupwa rolae angyako pyuo karaminyi lao mona pyamalya nange. Kyai pilyaminyi kandengeko.

¹⁹Embame suu pyapinyi dokopa wambu yuumi wasisi dupwa rolae angyako pyuo karaminyi lao mona pyamalyara lao suu pilisi? Wambu mee pyuku lasi maimai kuki kuki kumunginyili pyuo kumungi dupwa rolae ingyuo karaminyi lao mona pyamalyara lao silisi?

²⁰Akali mende yangama lete karelyamo kandenge doko alemanji see nalyaminyi mee kumungiko.

²¹Baa kumungi dokopa banya bange dupwa yaki nyuo kaenge. Dee baa keta mona palenge singinya renge doko otengeko.