1Akũ Temana gbɛ̃ Ɛlifaza yã wèa à pì:
2Asa tó gbɛ̃ yã ònnɛ, ĩni pↄ fɛ̃roo? Zaakũ mani fↄ̃ màgↄ̃ yĩtɛnaro.
3Ǹ dↄn lákũ n lɛ́ dà gbɛ̃nↄa dasi nà, n gbɛ̃ kũ ń gbãna làkanↄ gbà swɛ̃̀ɛ.
4N yã gbɛ̃ kũ òtɛn funↄ sɛ̀ lei, n gbɛ̃ kũ ò busananↄ gbà gbãna.
5Kũ yã n le sà, akũ ntɛn fu, kũ à sùmma, n bídi kɛ̀.
6N vĩnakɛna Ludanɛ dí n laakari kpátɛroo? N kunna taari sari dì tó ǹgↄ̃ tãmaa vĩroo?
7Ǹ laasun lɛ́ ǹ gwa! Kisira taarisaride lè ziki ari à gà yá? Mán ò gbɛ̃ mananↄ kàkatɛn zikii?
8Gbɛ̃ kũ à yã vãni bú wì à yãkete tↄ̃̀a, ma è abire mɛ́ àdi butɛnɛ.
9Luda lɛ́'ĩa mɛ́ àdi a kakatɛ, a pↄ́ bona a yĩn mɛ́ àdi a dúgu zↄ̃.
10A pũtãna kũ kòto gbãnao lán músuu bà dì láka, Luda dì a saka woronɛ.
11Àdi ga lán músu kũ à nↄ̀bↄↄ wɛ̀tɛ à kùraii bà, a nɛ́nↄ ni gbasa ò fãkↄ̃a.
12Yã sùma kpãni asiri gũn, a ĩa gɛ̃̀ ma sãn.
13Gↄrↄ kũ matɛn nana bɛ̃̀nɛ o gwãani, gↄrↄ kũ gbɛ̃nↄ i ò ò kà zã̀,
14vĩna ma kũ matɛn lukaluka, ma mɛ̀gu sĩnda pínki tɛn luka.
15Ĩa ke buri ma pa ma ãnnwa, ma mɛ̀kãsɛsɛɛ fùtɛ à zɛ̀.
16Kũ à zɛ̀, mádi a taka dↄ̃ro, pↄ́ pì kú ma arɛ, akũ ma a kòto kpãni mà à pì,
17bisãsiri ni fↄ̃ àgↄ̃ de yãnnade ũ Ludanɛ yá? Gbɛ̃ ni fↄ̃ àgↄ̃ zɛ̃na a Kɛ̀ri arɛ yá?
18Zaakũ Luda dì a malaikanↄ náani kɛro, akũsↄ̃ àdi a zĩkɛrii pìnↄ taari le,
19ókↄ̃nↄ kũ ó mɛ̀ de lán ɛ̃ kpɛ́ bà, ó kasana de bùsu kori ũ akũsↄ̃ òdi ó dúgu zↄ̃ lán dã̀mboroo bà, oni ó pↄ́ o dↄ yá?
20Zaa kↄnkↄ ari ↄkↄsi gbɛ̃nↄ dì gaga, òdi kakatɛ ari gↄrↄ sĩnda pínki, òdi ń tàasi káro.
21Luda dì ń kuta lí gborońnɛ, akũ òdi ga ↄ̃ndↄ̃ sari.
