Ioanes 11

1

2

3

4

5

6

7

8

9

10

11

12

13

14

15

16

17

18

19

20

21

¹Ma tika na tutana i mait, a iangina Lasaro, a te Betania, a pia na pal kai ra ura bartanavavina Maria ma Mata.

²Maria nam i ga ku ra Luluai ma ra varku, ma i ga u ra ura kakene ma ra pepe na uluna, ma go taina Lasaro i mait.

³A ura bartanavavina dir vartuluai tadav ia dari: Luluai, nina u mari ia, go i mait.

⁴Ba Iesu i valongore i biti: Pa na mat ta go ra minait, i mait upi da pite pa God, ma upi da pite pa Natu i God bula tana.

⁵Iesu i mari Mata ma tanavavina ma Lasaro bula.

⁶Ba i valongore ba i mait, i ki pa ra ivu bung mulai ta nam ra gunan i ki tana.

⁷Ma namur i tatike tai ra tarai na vartovo: Dat a vana mulai Iudaia.

⁸A tarai na vartovo dia biti tana: Tena Vartovo, go ko a Iudaia dia ga mainge ba diat a tupar i u; ma una vana mulai tana laka?

⁹Iesu i biti: Vakir a vinun ma a urua na pakana ta ra bung laka? Ba tikai i vanavana ta ra keake pa i tutukai, tago i gire ra kapa kai go ra rakarakan a gunagunan.

¹⁰Ba tikai i vanavana ra marum, i tutukai, tago pa ta kapa i ki tana.

¹¹I tatike go ra lavur magit, ma namur i biti ta diat: Talai dat, Lasaro, i tar va mat, ma iau vana upi ina vangun ia.

¹²A tarai na vartovo dia biti tana: Luluai, bali tar va mat, na lagar.

¹³Iesu i ga tata ure kana minat; ma dia nuk ia, ba i ga tatike ure ra ningo ta ra niva.

¹⁴Ma Iesu i ve bulu diat dari: Lasaro i tar mat.

¹⁵Ma iau gugu ure avat, ba pa iau ga ki abara, upi avat a nurnur; ma go dat a vana pirana.

¹⁶Tomas, di vatang ia bula ba a Kanga, i tatike tai ra tarai na vartovo: Dat a vana bula, upi dat a mat varurung me.

¹⁷Ba Iesu i tar pot, i matoto pa ba i tar va ra ivat na bung ta ra babang na minat.

¹⁸Betania i maravai Ierusalem, da ra utul a kilomita (ra ivu mail);

¹⁹ma mangoro na Iudaia dia ga vana pire Mata ma Maria, upi diat a vamaram dir ure tai dir.

²⁰Ba Mata i valongore ba Iesu i vanavana ur, i totongo upi ia; ma Maria i kiki na pal.

²¹Mata i biti tai Iesu: Luluai, gala u ga ki ati, gala taigu pa na mat.

²²Ma go iau nunure ba ta magit una lul ia tai God, God na tul tar ia tam.

²³Iesu i biti tana: Taim na laun mulai.

²⁴Mata i biti tana: Iau nunure ba na laun mulai ta ra tinut mulai ta ra bung kutu.

²⁵Iesu i biti tana: Iau ra nilaun mulai, ma iau ra nilaun tuna; ia nam i nurnur tagu, ba i mat, na laun mulai;

²⁶ma nina i laun ma i nurnur tagu, pa na mat muka. U nurnur laka damana?

²⁷I biti tana: Maia, Luluai, iau ga tar nurnur ba u ra Kristo, Natu i God, nina muka ba na vana rikai ta ra rakarakan a gunagunan.

²⁸Ma ba i tar tatike dari, i vana, ma i oro ive pa tanavavina, Maria, i biti: A Luluai go kari, i oro u.

²⁹Ma ba i valongore, i tut vuavuai, ma i vana tadav ia.

³⁰(Iesu pa i pot boko ta ra pia na pal, i ki boko ta nam ra pakana, Mata i ga barat ia tana.)

³¹A Iudaia, nina dia ga ki na pal me upi diat a vamaram ia, ba dia gire Maria i tut lulut ma i irop, dia mur ia, dia nuk ia ba na vana tadav ra babang na minat upi na tangtangi ie.

³²Ba Maria i pot abara, Iesu i ki ie, ma i gire, i va timtibum pire ra ura kauna, ma i biti tana: Luluai, gala u ga ki ati, gala taigu pa na mat.

³³Ba Iesu i gire i tangtangi, ma nam ra Iudaia bula dia ga varagur me dia tangtangi, i riri ta ra tulungeana, ma i ngarao tana,

³⁴ma i biti: Ava ga vadiop ia ave? Dia biti tana: Luluai, una mai, una gire.

³⁵Iesu i tangi.

³⁶A Iudaia dia biti: Gire i mari ia muka!

³⁷Ma ta umana dia biti: Go ra tutana i ga vanana pa ra ura kiau na mata i ra pula, ma dave pa i ga valagar pa go ra tutana bula upi koko na mat?

³⁸Ma Iesu i kaina mulai ra balana, ma i tadav ra babang na minat. Nam ra babang a niiga, ma di ga vung bat ia ma ra vat.

³⁹Iesu i biti: Avat a tak vue ra vat. Mata, tai nina i ga mat, i tatike tana: Luluai, gori i angina; tago i tar mat a ivat na bung iat.

⁴⁰Iesu i biti tana: Pa iau ga tatike laka tam ba ona u nurnur, una gire ra minamar kai God?

⁴¹Ma dia tak vue ra vat. Iesu i tadaraka, ma i biti: Tama, iau pite pa u tago u tar valongore iau.

⁴²Iau ga nunure ba u valongore vatikene iau; ma iau ga vatang ia, tago ra kor dia turtur kikil iau, upi diat a nurnur, ba u ga tulue iau Uti.

⁴³Ba i tar tatike damana, i manga oro dari: Lasaro, una vana rikai.

⁴⁴Ma nam i ga mat i vana rikai, di ga vi ra ura limana ma ra ura kekene ma ra mal na minat; ma di rau ra matana bula ma ra mal. Iesu i biti ta diat: Avat a pala ia, upi na vana.

⁴⁵Mangoro ta diat a Iudaia, nina dia ga ki pire Maria, ma dia ga gire nam i ga pait ia, dia nurnur tana.

⁴⁶Ma ta ra umana ta diat dia vana tadav ra umana Parisaio, ma dia varve diat ta ra lavur magit Iesu i ga pait ia.

⁴⁷A umana tena tinabar ngalangala ma ra umana Parisaio dia oro varurue ra kivung, ma dia biti: Ava da pait ia? Go ra tutana i pait mangoro na vakilang.

⁴⁸Ba da nur vue dari, a tarai par diat a nurnur tana; ma ra tarai Rom diat a vut, diat a kale kada pia na pal ma kada vuna gunan bula.

⁴⁹Ma tikai ta diat, Kaiapas, ia ra tena tinabar i lualua ta nam ra kilala, i biti ta diat: Pa ava nunure ta magit,

⁵⁰ma pa ava nuk ia ba i topa avat, ba tikai na mat ure ra tarai, ma koko ra vuna gunan mutu na virua.

⁵¹Ma vakir i ga tatike vakuku go; tago ia ra tena tinabar i lualua ta nam ra kilala, ma i ga tata na propet ba Iesu na mat ure ra vuna gunan;

⁵²ma vakir ure ra vuna gunan ika, upi na varurue bula ra lavur natu i God dia ki varbabaiai vurvurbit, upi diat a tikai ka.

⁵³Ma papa ta nam ra bung dia varpit upi diat a doka.

⁵⁴Ma Iesu pa i vanavana kapa mulai pire ra Iudaia, i vana ta ra gunagunan maravai ra bil, ta ra pia na pal, a iangina Epraim; ma dia kiki tana ma ra tarai na vartovo.

⁵⁵Ma i maravai ra lukara na bolo lake kai ra Iudaia; ma mangoro ta ra gunagunan dia lua urama Ierusalem ba pa di pait boko ra lukara, upi diat a vagomgom diat mulai.

⁵⁶Ma dia tikan upi Iesu, ma ba dia turtur na pal na vartabar dia tata vargil ure, dia biti: Ava ava nuk ia? Pa na vana laka ta ra lukara?

⁵⁷Ma ra lavur tena tinabar ngalangala ma ra lavur Parisaio dia ga vartuluai, ba tikai i nunure ba i ki ave na ve tar ia, upi diat a kinim ia.