Job 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne midtavak si Bildad is tig-Shua te,

²“Job, keenu nu ves ed-engkezi te egkaǥi heeyan is ebpengeǥiyen nu? Purungi nu is kegkaǥi nu su wey zey sikew melelaǥi.

³Ed-isipen nu ve he iring key te menge vaka he wazè dan kedsavut?

⁴Ebpesekitan nu zà is keugelingen nu pinaaǥi te pauk nu. Mid-isip nu ve he tenged dà kenikew ebey-anan te Megbevayà is kelibutan etawa idhalin din is menge vatu puun te nesevukan dan?

⁵“Benar iyan, he siguradu he ebpatey is lalung he etew. Iring sikandin te sulù he kenè en edsiǥa.

⁶Ebpekeiring sikandin te tulda he merusirem en su egkeevukan is sulù diyà te seled din.

⁷Dutun te nehuna he timpu meupiya is lengkazan din, iyan, guntaan ebpekeziregdireg sikandin. Kandin mismu he paaǥi is ebpekezezaat kandin.

⁸Iyan sikandin midhipanew pehendiyà te litag, ne nelitag sikandin.

⁹Ne kenè ne egkehekazan is menge paa zin.

¹⁰Idlitag heini ziyà te ebeyaan din, ne nekeeles heini ziyà te tanà.

¹¹Neliǥuy sikandin te igkahandek din ne henduen be te edal-as heini kandin.

¹²Is bangkit henduen be te etew he egkevitil he egkesuat he ed-eveleng kandin. Is kezeetan andam en he edezaat kandin.

¹³Is lundis din egketketen te ebpekepatey he zaru ne egkeredak is menge paa wey menge velad din.

¹⁴Ibpaawà sikandin diyà te ubpeey zin he ebpekepengalang kandin, ne ed-uwiten diyà te mekahandekhandek he hadì.

¹⁵Egkaawà is ubpeey zin su egkevinsulan heini te egkeregreg he esupri.

¹⁶Egkeiring sikandin te kayu he egkeǥangu is menge zalid wey menge subpang din.

¹⁷Ne wazè en ebpeketanud kandin kayi te kelibutan. Egkepurung en sikandin egkelipati.

¹⁸Edsegseǥen sikandin puun kayi te merayag he kelibutan pehendiyà te merusirem he lugar te menge minatey.

¹⁹Wazè din menge anak etawa menge kevuwazan, ne wazà egkesamà he uuyag diyà te pemilya zin.

²⁰Is menge etew ziyà te minsan hendei he lugar, egkengeinuinu wey egkengehandek tenged te nehitavù kandin.

²¹Tutuu he iyan heeyan egketemanan te lalung he etew, he wazà megkilala te Megbevayà.”