Job 18

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chaypita Shúa jutiyoj parti runa Bildad yapay niran:

²«¿Imaycamataj chaynölla rimaycanqui? Yarpayniquiman cutisha captiquega parlashwanmi.

³¿Imanirtaj animalcunatano ricamanqui? ¿Imanirtaj upa runatano ricamanqui?

⁴Fiyupa rabyarga quiquillayquimi ushacuycanqui. Chayno rurar ¿yarpanquichu cay pacha chunyaj ricacunanta, gagacunapis juc-läman witicurinanta?

⁵«Rasunpami fiyu runacunapa achquenga upicäconga. Ninanpis mananami ratapanganachu.

⁶Achqui tübun upicäconga. Wasinchöpis chacajllanami canga.

⁷Alli japaycaptinmi chaquinpis sicsicyacäconga. Quiquin rurayta yarpashancunallami mana alliman chayachenga.

⁸Purinanmanmi togllata churapayconga. Chaura chaychömi watacäconga.

⁹Cachi-putunpitami togllaga shegucurconga. Chaquinpitami fiyupa chanaj chutacurconga.

¹⁰Togllaga purinan nänichömi mana ricacaj caycanga päsaycajta shegucurcunanpaj.

¹¹Wacpita caypitami mancharachin. Imay örapis mancharishami gueshpin.

¹²Yargayllawanmi callpanpis mana cannachu. Mana alli chayananpänami caycan.

¹³Gueripäcuywan wallca wallcalla aychan shicwaycan. Wañuyman apacoj gueshyami cuerpuncunatapis ushaycan.

¹⁴Fiyu runataga wasincho alli goyäcuycajtami apacun. Nircorga manchacuypaj murtiwanmi tincuchin.

¹⁵Wasincho cajtaga ima-aycantapis ninami ushacurcun. Tiyashanchöga ishancawan shirallanami juntasha.

¹⁶Chay runaga chaquisha sapiyoj yöranömi, rämanpis garwashtashanömi.

¹⁷Chay runata cay pachachöga gongayconganami. Chay runapa jutintapis manami parlanganachu.

¹⁸Cay pachapitaga jitarenga. Achicyajcho caycajtapis chacajmanmi gaycurenga.

¹⁹Wasinchöga manami jucnayllapis quëdangachu. Paypita mirajcuna marcancho manami ni jucnayllapis cangachu.

²⁰Imano chay runata päsashantapis musyaycur may-chaychöpis fiyupami mancharenga.

²¹Chaynömi ushacanga fiyu runacunaga, Tayta Diosta manacajman churaj runacunaga.»