Sɑmiyɛɛlɩ II 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Wɑɑtʋ wei Tɑcɑɑ yɑpɑ Tɑfiiti kɛ Sɑyuli nɑ ɩ kolontunɑɑ lɛlɑɑ niŋ tɑɑ tɔɣɔ Tɑfiiti sɑmɑ Ɩsɔ nɑ yontu sɩ:

²Tɑcɑɑ kɛlɛ mɑ kʋkpɑmʋɣʋ nɑ mɑ tǝcɔɔsǝlɛ toŋ nyǝntɛ, nyɑ́ wɑɑsǝɣǝnɑ-m.

³Nyɑɣɑlɛ mɑ Ɩsɔ nɑ mɑ́ cɔɔsǝɣǝnɑ-ŋ. Nyɑɣɑlɛ mɑ kpɑlʋɣʋ nɑ toŋ wei ɩ wɑɑsǝɣɩ-m tɔ. Nɑ mɑ tǝcɔɔsǝlɛ nte tǝ wɛ pʋɣʋ tɑɑ tɔ, nɑ mɑ kpʋlʋɣʋ tǝtʋlɛ. N kɛ́ mɑ wɑɑsʋlʋ, n yɑkɩ-m mʋsʋntʋnɑɑ niŋ tɑɑ.

⁴Mɑ sɑmɑ Tɑcɑɑ nɑ kɑwilitɑɣɑ. Nyɑ́ yɑpǝnɑ-m kolontunɑɑ niŋ tɑɑ.

⁵Sǝm tɑmɑ-m kɛ́ ɩsɩɩ lʋm sɔsɔɔm holɑ, nɑ pǝ́ nyɑɑsǝɣɩ-m ɩsɩɩ pusi sɔsɔɔnsɩ.

⁶Atɛtǝlɛ kɑ hɔkɑ-m tǝ ŋmɩɩsɩ kɛ́. Nɑ sǝm nɑ́ɑ́ tuti-m nɑ pǝ puluɣu.

⁷Mɑ yɑɑ Tɑcɑɑ kɛ mɑ lɑŋwɑkǝllɛ wɑɑtʋ sɩ ń wɑɑsɩ-m. Mɑ kiisɑɑ nɑ ń nɩɩ mɑ nɔɣɔ kɛ nyɑ́ tǝyɑɣɑ tɑɑ.

⁸Pɑ́ɑ́nɑ́ kpɑ Ɩsɔ nɑ tɛtʋ sele, nɑ ɩsɔtɔnʋɣʋ kite ciɣiti, nɑ pɔɔŋ nɑ́ɑ́ sele ɩ kilɑ tɛɛ.

⁹Kɔkɔ nyɔɔsɩ lɩɩnɑ Ɩsɔ nyɑ́ mɩɩnɑ tɛɛ, nɑ ń tɔ kɔkɔ mɑmɑlɑ nɑ nɔɣɔ.

¹⁰N lumsɑ ɩsɔtɔnʋɣʋ nɑ ń tii, nɑ nyɑ́ nɔɔhɛɛ tɛɛ kɛ́ ɩsɔŋmʋntʋɣʋ kpɩɩsǝŋ nyǝŋkʋ.

¹¹Ɩsɔtɑɑ tɑŋlʋ kpɑɣɑnɑ-ŋ nɑ ń kʋlǝɣɩ hʋntʋ, nɑ heelim tɛɛkǝnɑ-ŋ.

¹²N tɑkɑ nyɑ́ tǝɣɩ sǝkpɛtʋɣʋ, nɑ ŋ wɛ tɛʋ ŋmʋntʋɣʋ tɛɛ.

¹³Nyɑ́ nyɑlɑmǝlɛ tɛɛ-ŋ nɔɣɔ nɑ tǝ tɔɔkɩ mɑmɑcǝɣǝlɑsɩ.

¹⁴Ɩsɔtɑɑ Ɩsɔ Sɔsɔ nɔɣɔ nɩɩ ɩsɔtɑɑ kɛ́ ɩsɩɩ tɛʋ holɑ.

¹⁵N tɔ mɑ kolontunɑɑ kɛ nyǝmɑ́ nɑ ń yɑsɩ-wɛ. N tisɑ pɑ tɔɔ kɛ́ cɑlɑnɑɑ nɑ pɑ́ se yem yem.

¹⁶Tɑcɑɑ ń mʋ pɑ́ɑ́nɑ́ nɑ ń woso nyɑ́ mɩɩnɑ tɛɛ, nɑ teŋku tɛtʋ nyɩɩ nɑ pǝ́ nɑ́ ɑntulinyɑ kite.

¹⁷Ɩlɛnɑ ń tisi nyɑ́ niŋ nɑ ɩsɔtɑɑ nɑ ń lǝsɩ-m lʋm sɔsɔɔm tɑɑ.

¹⁸Nɑ ń yɑ-m kolontunɑɑ toŋ nyǝ́mɑ mpɑ ɩnɩ pɑ tɛɛ-m tɔ pɑ niŋ tɑɑ.

¹⁹Mɑ wɑhɑlɑ wule kɛ pɑ tutɑ-m. Ɩlɛnɑ Tɑcɑɑ wɑɑsɩ-m.

²⁰N sɔɔlɑ-m tɔɣɔ n wɑɑsɑ-m sɩ mɑ́ cɑɣɑnɑ mɑ tɩ.

²¹Mɑ tǝŋɑ tɑmpɑnɑ tɔɣɔ n lɑpɑ-m mpʋ, mɑ kʋsiɣisim lɑpʋ kɑsǝyɑɣɑ ntɛ́.

²²Mɑ tǝŋɑ Tɑcɑɑ tɔm kɛ́, mɑ tɑ wɑkǝlǝnɑ-ŋ.

²³Mɑ tǝŋɑ nyɑ́ kʋsǝsɩɩtʋ tɔɣɔ. Mɑ tɑ yɔkɩ nyɑ́ kiiu nɑkʋlɩ.

²⁴Mɑ luɣu fɛɩ tɑɑlɩ nɔɣɔlʋ, tɔɣɔ mɑ kpɑ mɑ tǝɣɩ ɩsɑɣɑtʋ tǝlɑtɛ.

²⁵Ɩlɛnɑ Tɑcɑɑ fɛlɩ-m mɑ tɑmpɑnɑ tǝŋʋɣʋ tɔɔ. Mɑ kʋsiɣisim lɑpʋ kɑsǝyɑɣɑ ntɛ́.

²⁶Kʋpɑntʋ kɛ Tɑcɑɑ n fɛlǝɣɩ tǝ lɑtʋ, nɑ ń tǝŋ tɑmpɑnɑ nɑ ń lɑnɑ ɑ tǝŋlʋ.

²⁷Yʋlʋ ɩ́ wɛ tǝnɑŋŋ ḿpʋ́ɣʋ́ n lɑkɩ-ɩ, ɩlɛnɑ ń kisi ɩsɑɣɑʋ.

²⁸N wɑɑsǝɣɩ tǝpɑsǝlɑɑ, ɩlɛnɑ ń tisiɣi kɑlɑmpɑɑnɩ nyǝ́mɑ nɑ ɩsɛ cɩɩlʋɣʋ.

²⁹Tɑcɑɑ kɛlɛ mɑ nyɑɑlǝm, nɑ ń kɛɛlǝɣɩ mɑ sǝkpɛtʋɣʋ.

³⁰Nyɑ́ toŋ kɛ mɑ ŋmɑɑkǝnɑ kolontunɑɑ koloosi nɑ mɑ́ sʋʋkɩ.

³¹Tɑcɑɑ nyɑ́ kʋlɑpʋtʋ wɛ kɛ́ tǝcʋŋŋ, nɑ nyɑ́ kʋyɔɣɔtʋtʋ fɛɩ sikɑ. N kentiɣi mpɑ pɑ cɔɔsǝɣǝnɑ-ŋ tɔ ɩsɩɩ kpɑ́lʋ́ɣʋ́.

³²Tɑcɑɑ nyɑ́ tike tǝkoŋ ntɛ́ Ɩsɔ. Tɑ Ɩsɔ tike tǝkoŋ ntɛ́ kʋkpɑmʋɣʋ ŋku kʋ kentiɣi-tʋ tɔ.

³³Nyɑɣɑlɛ mɑ koluŋɑ ɩcɑtɛ toŋ nyǝŋkɑ. Nɑ ń tiikiɣi-m mpɑɑʋ kʋsiɣisuɣu tɑɑ.

³⁴Nɑ ń yeki nɑ mɑ́ pǝsǝɣɩ sewɑ kɛ pulɑsɩ tɔɔ ɩsɩɩ nɑm nɑ nɑɑni.

³⁵N fɑlǝsɑ mɑ niŋ nɑ yoou, nɑ mɑ́ nyɩ tɔɔʋ toŋ nyǝŋkʋ tɔʋ.

³⁶N yɑpɑ mɑ nyʋɣʋ nɑ pǝ́ wɛɛ ɩsɩɩ kʋkentuɣu. Nɑ mɑ pǝsɩ sɔsɔ kɛ nyɑ́ kʋpɑntʋ tɔɔ.

³⁷Nyɑ́ hɑsǝɣǝnɑ mɑ nɔɔhɛɛ tɛɛ. Pʋlʋpʋ ɩɩ tuuliɣi-m.

³⁸Mɑ tɔɣɔnǝɣɩ mɑ kolontunɑɑ nɑ mɑ́ wɑkǝlǝɣɩ-wɛ. Ye mɑ tɑ kpiisi-wɛ mɑɑ mǝlǝɣɩ.

³⁹Mɑ wɑkǝlǝɣɩ-wɛɣɛ nɑ mɑ́ kpiisi-wɛ, nɑ pɑ́ wɛɛ mɑ nɔɔhɛɛ tɛɛ, pɑɑ tɑsǝɣɩ kʋlʋɣʋ.

⁴⁰Nyɑ́ hɑɑkǝnɑ-m yoou toŋ, nɑ ń yeki nɑ mɑ kolontunɑɑ hǝntǝɣɩ-m ɑtɛ.

⁴¹N yeki nɑ pɑ́ seeki-m, nɑ mɑ́ wɑkǝlǝɣɩ-wɛ tǝnɑŋnɑŋ.

⁴²Pɑ cɑɑkɩ pɑ tɑɑ nɑ pɑ wɑɑlɩ pɑɑ nɑɑ wɑɑsʋlʋ. Ɩlɛnɑ pɑ wiinɑ Tɑcɑɑ nɑ ɩ́lɛ́ ɩ kisi cɔʋ.

⁴³Mɑ nuɣutiɣi-wɛ nɑ pɑ́ pǝsɩ mʋsʋɣʋ. Nɑ mɑ́ fɛlɩ-wɛ nɑ pɑ́ pǝsɩ ɩsɩɩ mpɑɑʋ ɑfǝlɑ.

⁴⁴N yɑpɑ-m mɑ yǝlɑɑ nɔɔhɔntɛ tɑɑ, nɑ ń sɩɩ-m kɑteŋɑsɩ yǝlɑɑ nyʋɣʋ tʋ. Yǝlɑɑ mpɑ mɑ tɑɑ nyɩ tɔ pɑ lɑpɑ-m tǝmlɛ.

⁴⁵Kpɑɩ nyǝ́mɑ piyɑ seekinɑ-m, nɑ mɑ́ nyǝnɑ-wɛɣɛ ɩsǝlɛ pɑ nɩɩkɩ kɛ́.

⁴⁶Pɑ nɑntʋ tiliɣi kɛ́, nɑ pɑ́ lɩɩkǝnɑ pɑ tǝŋmɛllɛ nɑ seluɣu.

⁴⁷Tɑcɑɑ wɛnnɑ. Nyɑɣɑlɛ mɑ kʋkpɑmʋɣʋ ŋku kʋ kentiɣi-m tɔ mɑɑ sɑ-ŋ. Mɑ tɑlɑ mɑ Ɩsɔ mɑ wɑɑsʋlʋ.

⁴⁸Nyɑ́ lɛɛtǝɣǝnɑ nɑ mɑ nɔɣɔ. Nɑ ń tisiɣi piitimnɑɑ kɛ mɑ tɛɛ.

⁴⁹Nyɑ́ fitiɣinɑ-m mɑ kolontunɑɑ niŋ tɑɑ, nɑ ń lɑkɩ nɑ mɑ́ kǝlǝɣɩ-wɛ, nɑ ń yɑkɩ-m mʋsʋŋtʋ niŋ tɑɑ.

⁵⁰Pǝ tɔɔ kɛ́ mɑɑ sɑ-ŋ piitimnɑɑ tɑɑ nɑ mɑ́ pʋɣʋlɩ nyɑ́ hǝtɛ.

⁵¹N tʋɣɩ nyɑ́ wulɑʋ kɛ ɑkɑɩtʋ sɔsɔɔntʋ. Nɑ ń lɑ kʋpɑntʋ kɛ nyɑ́ kʋlǝsʋ nɑ Tɑfiiti, nɑ ɩ́lɛ́ ɩ piitim nyǝ́mɑ kɛ tɑm tɔɔ.