Sɑmiyɛɛlɩ II 7

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Tɑcɑɑ yɑpɑ wulɑʋ kɛ ɩ kolontunɑɑ niŋ tɑɑ, ɩlɛnɑ ɩ́ mǝlɩ ɩ kɑwulɑɣɑ tǝyɑɣɑ kʋfɑlɑɣɑ tɑɑ nɑ hɛɛsʋɣʋ.

²Ḿpʋ́ɣʋ́ kʋyɑkʋ nɑkʋlɩ ɩ tɔmɑ Ɩsɔ kʋyɔɣɔtʋtʋ tɛlǝsʋlʋ Nɑtɑŋ sɩ: Pǝ tɑ mʋnɑ sɩ mɑ́ɑ́ wɛɛ kutuluɣu kʋpɑŋkʋ tɑɑ nɑ Ɩsɔ ɑtɑkɑɑ nɑ́ɑ́ wɛ cokǝle tɑɑ.

³Ntɛnɑ Nɑtɑŋ cɔ wulɑʋ sɩ: Polo nɑ ń lɑ pǝ tǝnɑ mpi n mɑɣɑsǝɣɩ nyɑ́ tɑɑ tɔ. Mpi tɔ, Tɑcɑɑ wɛ nyɑ́ wɑɑlɩ kɛ́.

⁴Ahoo yuwɑ ɩlɛnɑ Tɑcɑɑ tɔ Nɑtɑŋ sɩ:

⁵Polo nɑ ń heeli mɑ pǝyɑlʋ Tɑfiiti sɩ pǝ tɑɣɑ ɩnɩ ɩ kɑ ŋmɑnɑ-m tǝyɑɣɑ ŋkɑ kɑ tɑɑ mɑɑ cɑɣɑ tɔ.

⁶Hɑtoo mɑ lǝsʋɣʋ Ɩsɛɣɛlɩ nyǝ́mɑ kɛ Icipiti tɑɑ nɑ pǝ́ sɩɩnɑ sɑŋɑ tɔ mɑ tɑ sʋʋtɑ kutuluɣu tɑɑ. Cokǝle tɑɑ kɛ́ mɑ wɛ mpʋ.

⁷Too mɑ nɑ Ɩsɛɣɛlɩ nyǝ́mɑ tǝ lɩɩʋ tɔ, mɑ tɑ pɔɔsǝtɑ pɑ nyʋɣʋ nyǝ́mɑ mpɑ mɑ lǝsɑɑ tɔ pɑ tɑɑ nɔɣɔlʋ sɩ pepe tɔɔ kɛ́ pɑ tɑ ŋmɑ-m kutuluɣu kʋpɑŋkʋ.

⁸Mpʋ tɔ, heeli mɑ pǝyɑlʋ Tɑfiiti sɩ Tomɑ tǝnɑ tʋ Tɑcɑɑ mɑ́, mɑ yɔɣɔtɑɑ sɩ ntiɣile tɑɑ kɛ́ mɑ kpɑɣɑ-ɩ heeŋ wɑɑlɩ sɩ ɩ́ lɑ mɑ Ɩsɛɣɛlɩ nyǝ́mɑ wulɑʋ

⁹nɑ mɑ́ɑ́ wɛ ɩ wɑɑlɩ kɛ́ ɩ tɔntɛ tǝnɑ tɑɑ. Ɩlɛnɑ mɑ́ kpiisi ɩ kolontunɑɑ tǝnɑ nɑ mɑ́ kʋsɩ ɩ nyʋɣʋ ɩsɩɩ ɑtɛ sɔsɑɑ lɛlɑɑ.

¹⁰Ɩlɛnɑ mɑ́ hɑ mɑ Ɩsɛɣɛlɩ nyǝ́mɑ kɛ tǝcɑɣɑlɛ sɩ pɑ́ cɑɣɑ teu nɑ pʋlʋ ɩ́ tɑɑ peɣeli-wɛ. Yǝlɑɑ ɑsɑɣɑɑ ɩ́ tɑɑ tɔɣɔ pɑ ɩsɛ,

¹¹ɩsɩɩ sɑɑ wei mɑɑ kpɑ pɑɑsǝnlɑɑ kɛ mɑ yǝlɑɑ Ɩsɛɣɛlɩ nyǝ́mɑ tɔɔ tɔ. Pǝyele mɑ yɑpɑ-ɩ ɩ kolontunɑɑ tǝnɑ niŋ tɑɑ sɩ ɩ́ hɛɛsɩ. Tɑcɑɑ sɩ: Pʋntʋ ɩnɩ ɩ kɑ sɩɩnɑ-m tǝyɑɣɑ, pǝ tɑɣɑ Tɑfiiti kɑ́ ŋmɑnɑ-kɛ.

¹²Ye pǝ tɑlɑ nyɑ́ kʋyɑkʋ nɑ n sǝpɑ ɩlɛ mɑɑ lǝsɩ nyɑ́ piyɑ mpɑ n lʋlǝnɑ nyɑ́ tɑpʋɣʋ tɔ pɑ tɑɑ nɔɣɔlʋ nɑ mɑ́ kpɑ-ɩ wulɑʋ.

¹³Ɩnɩ ɩ kɑ́ ŋmɑnɑ-m tǝyɑɣɑ nɑ mɑɑ yele nɑ ɩ kɑwulɑɣɑ kumte wɛɛ tɑm tɔɔ.

¹⁴Ɩ kɑ́ nyǝnǝɣɩ-m ɩ cɑɑ nɑ mɑɑ nyǝnǝɣɩ-ɩ mɑ pǝyɑɣɑ. Ye ɩ pǝntǝnɑ-m mɑɑ hɔ ɩ kpɑŋʋɣʋ ɩsɩɩ pɑ lɑkʋɣʋ pǝyɑɣɑ tɔ.

¹⁵Amɑ mɑ kɑɑ yele-ɩ pɛɛlɛɛ hʋlʋɣʋ ɩsɩɩ mɑ lɑpʋ Sɑyuli nɑ mɑ́ lɔ-ɩ nɑ mɑ́ lɛɛtɩ-ŋ ɩ lonte tɔ.

¹⁶Nyɑ́ kɑwulɑɣɑ nɑ nyɑ́ kumte nɑ nyɑ́ piitim pɩɩ wɛɛ tɑm tɔɔ kɛ́.

¹⁷Nti nti Ɩsɔ heelɑ Tɑfiiti nɑ Ɩsɔ kʋyɔɣɔtʋtʋ tɛlǝsʋlʋ Nɑtɑŋ nɔɣɔ tɔɣɔlɛ.

¹⁸Mpʋɣʋlɛ Tɑfiiti polɑ Ɩsɔ cokǝle tɑɑ nɑ ɩ́ yɔɣɔtǝnɑ Ɩsɔ sɩ: Hɑɩ, Tɑcɑɑ tɑ Ɩsɔ, mɑ́ nɑ mɑ tǝyɑɣɑ tǝ kɛ́ we nɑ ń kɔŋnɑ-m timpi tɑɑ mɑ wɛ ɩsǝntɔ tɔ?

¹⁹Pǝlɛ pǝ pɑɑsi nɑ ń tɑsǝɣɩ mɑ tǝyɑɣɑ sɩɩʋ tɔm nɑ? Ye pǝ tɑɣɑ Ɩsɔ, yʋlʋ kɑɑ pǝsɩ nɑ ɩ́ yɔɣɔtɩ mpʋ pǝ tɑkɑ.

²⁰Wentiɣi mɑ tɑkɑ mɑ wɛnɑ sɩ mɑ heeliɣi-ŋ? N nyǝmɑ-m kɛ́.

²¹Nyɑ́ mɑɣɑmɑɣɑ n sɔɔlǝnɑ nɑ ń lɑ tǝmɑ sɔsɔɔnɑ ɑnɛ, nɑ ń kuli-m tɔm tǝnɛ tǝ tɔɔ ɩsɩɩ n kɑ yɔɣɔtʋɣʋ tɔ.

²²Tɑcɑɑ Ɩsɔ n kɛ́ Sɔsɔ kɛ́. Mpi tɔ, nɔɣɔlʋ tɑ nǝɣǝsǝnɑ-ŋ. Ye tǝ kɛɛsǝnɑ nti ɩnɩ tǝ nɩɩnɑ tɑ ŋkpɑŋŋ tɔ nɔɣɔlʋ ɩ fɛɩ ɩsɩɩ nyɑ́.

²³Piitim nɑpǝlɩ pǝ fɛɩ nɑ pǝ́ nǝɣǝsǝnɑ nyɑ́ yǝlɑɑ Ɩsɛɣɛlɩ nyǝ́mɑ mpɑ n kɔmɑ nɑ ń yɑ sɩ tǝ pǝsɩ nyɑ́ nyǝ́mɑ nɑ nyɑ́ hǝtɛ yɑɑ nɑ ń lɑ-tʋɣʋ piti tǝmɑ nɑ kɔkɔlɔ nyǝm nɑ ń yɑ-tʋɣʋ Icipiti tɑɑ nɑ ń tɔɣɔnɩ piitimnɑɑ lɛlɑɑ nɑ pɑ tɩɩŋ.

²⁴Nɑ tǝ pǝsɩ nyɑ́ nyǝ́mɑ kɛ tɑm tɔɔ, nɑ nyɑɑ pǝsɩ tɑ Ɩsɔ.

²⁵Mpʋ tɔ, Tɑcɑɑ Ɩsɔ yele nɑ tɔm nti n yɔɣɔtɑ mɑ nɑ mɑ tǝyɑɣɑ tɑ́ tɔɔ tɔ tǝ́ lɑ nɑ tǝ́ wɛɛ ḿpʋ́ɣʋ́ tɑm tɔɔ.

²⁶Nyɑ́ hǝtɛ ɩ́ wɛɛ sɔsɔɔlɛ nɑ yǝlɑɑ pʋɣʋlǝɣɩ tɑm sɩ: Ɩsɛɣɛlɩ nyǝ́mɑ Ɩsɔ kɛlɛ Tomɑ tǝnɑ tʋ Tɑcɑɑ nɑ ń pɑɑsǝɣǝnɑ mɑ tǝyɑɣɑ.

²⁷Mpi tɔ, Tɑcɑɑ Ɩsɛɣɛlɩ nyǝ́mɑ Ɩsɔ, nyɑ́ tʋnɑ nyɑ́ tɔm kɛ mɑ ŋkpɑŋŋ tɑɑ sɩ n kɑ́ sɩɩ mɑ tǝyɑɣɑ. Pǝ tɔɔ kɛ́ mɑ kɑɑsɑ mɑ tɩ nɑ mɑ́ sǝlǝmɩ-ŋ sǝlǝmʋɣʋ kʋnɛ.

²⁸Tɑcɑɑ Ɩsɔ, n kɛ́ Ɩsɔ kɛ́. Nɑ ń yɔɣɔtɑ nti n lɑkɩ-tǝɣɩ. Nyɑ́ kɛɛsǝnɑ-m nyɑ́ kʋpɑntʋ tǝnɛ tǝ tɔm.

²⁹Kooli mɑ tǝyɑɣɑ kɛ kʋpɑntʋ nɑ kɑ́ wɛɛ tɑm tɔɔ ɩsɩɩ n yɔɣɔtʋɣʋ tɔ, nɑ kʋpɑntʋ ntɩ tǝ́ wɛɛ kɑ tɔɔ kɛ́ tɑm.