1Ḿpʋ́ɣʋ́ Tɑfiiti yoolɑɑ nyʋɣʋ tʋ Sowɑpɩ cɛkǝnɑɑ sɩ wulɑʋ hɑɣɑ Apǝsɑlɔm nɑ pɑ́ɑ́nɑ́.
2Ɩlɛnɑ ɩ́ tili timpi pɑ yɑɑ sɩ Tɛkʋwɑ tɔ nɑ pɑ́ kɔnɑ-ɩ ɑlʋ lɑɣɑtʋ nɔɣɔlʋ nɑ ɩ́ heeli-ɩ sɩ: Cɛsɩ ɩsɩɩ nyɑ́ lɑŋlɛ wɑkǝlɑɑ nɑ ń suu lǝyɑɣɑ wontu ɩsɩɩ yʋlʋ cɑkʋɣʋ lǝyɑɣɑ nɑ pǝ́ tɑɑŋɩ tɔ, ɩlɛ tɑɑ sɑɣɑlɩ nim.
3Nɑ ɩ́ kɛɛsɩ-ɩ tɔm nti ɩ kɑ yɔɣɔtɩ wulɑʋ kiŋ tɔ.
4Ḿpʋ́ɣʋ́ ɑlʋ ɩnɩ ɩ polɑ wulɑʋ tɛ nɑ ɩ́ hoti ɩ tɛɛ nɑ ɩ́ tɔ sɩ: Hɑɩ, tɑ cɑɑ, yɑ-m.
5Ntɛnɑ wulɑʋ sɩ: Pepe lɑpɑ ye? Ntɛnɑ ɑlʋ sɩ: Hɑɩ, tɑ cɑɑ, mɑ pɑɑlʋ sǝpɑɣɑ nɑ pǝ́ yele-m leelu.
6Pǝyele mɑɑ wɛnɑ ɑpɑlʋpiyɑ kɛ nɑɑlɛ. Ḿpʋ́ɣʋ́ sɩ yoo tɑɑlɛ, nɔɣɔlʋ fɛɩ sɩ ɩ́ loli-sɩ. Ɩlɛnɑ lɛlʋ kʋ ɩ tɑɑpɑlʋ.
7Tǝnɑɣɑlɛ mɑ nyǝ́mɑ tǝnɑ kʋlɑɑ nɑ pɑ́ sǝŋ mɑ tɔɔ sɩ mɑ́ yele nɑ pɑ́ kʋ kʋlʋ. Sɩ pɑɑ kʋlʋ ɩnɩ ɩ kɑ kpɑɣɑnɑ ɩ cɑɑ wɛnɑʋ, ɩsɩɩ pɑ kʋ-ɩ. Ɩsǝlɛ kʋlʋmtǝlɛ nte tɩɩ kɑɑsɑ-m tɔɣɔlɛ pɑ tɛɛsǝɣɩ nɑŋtʋɣʋ. Pǝ kɑɑ kɑɑsɩ mɑ pɑɑlʋ kɛ́ pǝyɑɣɑ ŋkɑ pɑɑ yɑɑkǝnɑ ɩ hǝtɛ tɔɣɔ tɛtʋ tɑɑ.
8Ntɛnɑ wulɑʋ sɩ: Kpe nyɑ́ tɛ nɑ mɑ́ pɑɑsǝnɑ nyɑ́ tɔm.
9Mpʋɣʋlɛ ɑlʋ cɔ-ɩ sɩ: Pɑɑ mpi pǝ lɑpɑ pǝ́ wɛɛ mɑ nɑ mɑ cɑɑ tǝyɑɣɑ tɑ tɔm pǝ tɑɑ wɛɛ nyɑ́ nɑ nyɑ́ tǝyɑɣɑ mǝ nyǝntʋ.
10Mpʋɣʋlɛ wulɑʋ tɔmɑ sɩ: Ye nɔɣɔlʋ lɑkɩ nyɑ́ tɔm kɛ tɔm ntɩ tǝ tɑɑ, ɩlɛ n kɔnɑ-ɩ mɑ kiŋ, ɩ kɑɑ tɑsɑ-ŋ tokinɑʋ.
11Ntɛnɑ ɑlʋ tɑsɑ sɩ: Tɑ cɑɑ wulɑʋ, tuunɑ nyɑ́ Ɩsɔ Tɑcɑɑ sɩ yʋlʋ lɛɛtʋlʋ ɩnɩ ɩ kɑɑ kʋ mɑ pǝyɑɣɑ nɑ pǝ́ yele ncɑɑlɛ. Ḿpʋ́ɣʋ́ wulɑʋ nɑ́ tuuwɑ sɩ: Nɑ Ɩsɔ, nɔɣɔlʋ kɑɑ kpɑɣɑ nyɑ́ pǝyɑlʋ tɔɔ kɛ́ nyɩɩlʋɣʋ.
12Mpʋɣʋlɛ ɑlʋ sɩ: Hɑɩ, Tɑcɑɑ, yele nɑ mɑ́ tɑsɑ tɔmʋɣʋ kʋlʋmʋɣʋ kɛ yɔɣɔtʋɣʋ. Ɩlɛnɑ wulɑʋ sɩ: Yɔɣɔtɩ.
13Kɛlɛnɑ ɑlʋ tɔ sɩ: Nɑ pepe tɔɔ kɛ́ n cɑɑ n wɑkǝlɩ Ɩsɔ yǝlɑɑ kɛ mpʋ? Mpi tɔ, nyɑ́ kʋnɑ nyɑ́ tɩ tɔm kɛ timpi nn cɑɑkɩ sɩ ń mǝlǝnɑ nyɑ́ pǝyɑɣɑ ŋkɑ n tɔɣɔnɑɑ tɔ.
14Tɑ tǝnɑ tɩɩ sɩ teitei kɛ́ ɩsɩɩ pɑ pǝlʋɣʋ lʋm kɛ ɑtɛ nɑ pǝ́ fɛɩ kpɑʋ tɔ. Amɑ Ɩsɔ nɑɑ kʋɣɩ, ɩ́lɛ́ ɩ cɑɑkɩ kɛ́ sɩ pɑ́ hʋ́lɩ́ suulu kɛ wei pɑ lɔwɑ tɔ nɑ pɑ́ mǝlǝnɑ-ɩ.
15Tɑcɑɑ, nɔɔnɔɔ mɑ kɔm ɩsǝntɔ tɔ, mɑ tɑ kɔɔ yem, nyɑ́ yǝlɑɑ nyɑɑsǝnɑ-m. Pǝ tɔɔ kɛ́ mɑ kɔmɑ sɩ mɑ́ yɔɣɔtǝɣǝnɑ-ŋ nɑ ntɑnyɩ n kɑ tisi.
16N kɑ́ mʋ mɑ tɔm nɑ ń yɑ-m mpɑ pɑ lʋkɩ sɩ pɑ́ kpiisi mɑ nɑ mɑ pǝyɑɣɑ sɩ tǝ tɑɑ nɑ Ɩsɔ kpɑncoou tɔ pɑ niŋ tɑɑ.
17Mɑ tʋ mɑ tɑɑ sɩ nyɑ́ tɔm kɑ yele nɑ mɑ́ hɛɛsɩ. Mpi tɔ, Tɑcɑɑ, n wɛɛ kɛ́ ɩsɩɩ Ɩsɔ ɩsɔtɑɑ tillu. N fɑkɩ kʋpɑntʋ nɑ ɩsɑɣɑtʋ. Nyɑ́ Ɩsɔ Tɑcɑɑ ɩ́ wɛɛ nyɑ́ wɑɑlɩ.
18Ḿpʋ́ɣʋ́ wulɑʋ tɔmɑ ɑlʋ sɩ: Tɑɑ ŋmɛsɩ-m nti mɑ pɔɔsǝɣɩ-ŋ ɩsǝntɔ tɔ. Alʋ sɩ: Yɛɛ, yɔɣɔtɩ mɑ cɛ.
19Ɩlɛnɑ wulɑʋ sɩ: Ɩsǝntɔ Sowɑpɩ nɔɣɔ fɛɩ tɔm tǝnɛ tǝ tɑɑ? Ntɛnɑ ɑlʋ sɩ: Hɑɩ tɑ cɑɑ wulɑʋ, mɑ tuukinɑ-ŋ sɩ ntɔŋkpɛɛsɑɣɑ fɛɩ. Tɑmpɑnɑ yɑɑ, nyɑ́ tǝmlɛ tʋ Sowɑpɩ tʋnɑ-m tǝmlɛ tǝnɛ nɑ ɩ́ heeli-m tǝ tǝnɑ nti mɑ yɔɣɔtǝɣɩ ɩsǝntɔ tɔ.
20Sowɑpɩ tukɑ ɩtuule kɛ ḿpʋ́ɣʋ́ sɩ n kɑ́ cɛkǝnɑ nɑ ń mǝlǝnɑ Apǝsɑlɔm. Mpi tɔ, n kɛ́ lǝmɑɣɑsǝlɛ tʋ kɛ́ nɑ ń nyǝmɑ́ pǝ tǝnɑ mpi pǝ lɑkɩ tɔ ɩsɩɩ Ɩsɔ ɩsɔtɑɑ tillu.
21Pǝlɛ pǝ wɑɑlɩ kɛ́ wulɑʋ tɔmɑ Sowɑpɩ sɩ: Tɔm ntɩ tǝ tɛmɑ, polo nɑ ń kɔnɑ Apǝsɑlɔm.
22Tǝnɑɣɑlɛ Sowɑpɩ hotɑ wulɑʋ nɔɔhɛɛ tɛɛ kɛ́ kpɑkpɑɑ nɑ ɩ́ kooli-ɩ kʋpɑntʋ. Ɩlɛnɑ ɩ́ tɔ sɩ: Hɑɩ, Tɑcɑɑ, sɑŋɑ ntɛ́ mɑ nɑwɑ sɩ n hʋlɑ-m suulu kɛ timpi n tisuɣu mɑ tɔm tǝnɛ tɔ.
23Mpʋɣʋlɛ Sowɑpɩ tɛɛ Kesuu nɑ ɩ́ kɔnɑ Apǝsɑlɔm kɛ Yosɑlɛm.
24Kɛlɛnɑ wulɑʋ sɩ: Apǝsɑlɔm ɩ́ cɑɣɑ ɩ tǝyɑɣɑ tɑɑ, mɑ́ nɑ-ɩ tɑ ɩsɛ ɩ́ tɑɑ suli. Ɩlɛnɑ Apǝsɑlɔm mǝlɩ ɩ tǝyɑɣɑ, ɩ nɑ wulɑʋ pɑɑ nɑɑkɩ tǝmɑ.
25Nɔɣɔlʋ tɑ hɑŋnɑ Apǝsɑlɔm kɛ teu kɛ Ɩsɛɣɛlɩ tǝnɑ tɑɑ. Ɩ ŋmɑtʋ tǝnɑ kɑ tewɑɣɑ, ɩ tiili fɛɩ pɑɑ kpǝtiyɑ mɑɣɑmɑɣɑ.
26Ɩ kɑ wɛnɑ nyɔɔsɩ kɛ sɔsɔm kɛ́, nɑ pɩɩ wɛɛ sɩ pɑ́ hʋmɩ-ɩ pɑɑ pǝnɑɣɑ ŋkɑ. Mpi tɔ, ɩ nyɔɔsɩ ɩ́ kɔmɑ sɩ wɛ yuŋ kɛ́. Ye pɑ hʋmɑ-ɩ sɩ yuŋ wɛɛkɩ kiloonɑɑ nɑɑlɛ nɑ hɔɣɔlʋɣʋ ɩsɩɩ wulɑʋ mɑɣɑsǝlɑɣɑ wɛʋ tɔ.
27Apǝsɑlɔm lʋlɑ ɑpɑlʋpiyɑ tooso nɑ ɑlʋpǝyɑɣɑ kʋlʋmɑɣɑ. Pɑ yɑɑ-kɛ sɩ Tɑmɑɑ, kɑ ɩsɛntɑɑ kɑ lɩɩwɑɣɑ.
28Ḿpʋ́ɣʋ́ Apǝsɑlɔm cɑɣɑ pɩɩsɩ nɑɑlɛɣɛ Yosɑlɛm. Ɩlɛ ɩ́ nɑ wulɑʋ pɑɑ keesiɣi tǝmɑ.
29Ɩlɛnɑ ɩ́ yɑɑ Sowɑpɩ sɩ ɩ tiliɣi-ɩ wulɑʋ kiŋ nɑ ɩ́lɛ́ ɩ kisi, nɑ ɩ́ tɑsɑ-ɩ yɑɑʋ kɛ tɔm nɑɑlɛ nyǝm nɑ ɩ́lɛ́ ɩ kisi tɔtɔ.
30Ntɛnɑ Apǝsɑlɔm tɔ ɩ tǝmlɛ nyǝ́mɑ sɩ: Sowɑpɩ tɑɑlɛ ntɛ́ mɑ nyǝntɛ kɔŋkɔŋ tɑɑ, ɩ́ polo nɑ ɩ́ sɔ-tɛɣɛ kɔkɔ. Ɩlɛnɑ pɛlɛ pɑ polo nɑ pɑ́ sɔ-tɛɣɛ kɔkɔ.
31Mpʋɣʋlɛ Sowɑpɩ polɑ Apǝsɑlɔm tǝyɑɣɑ tɑɑ nɑ ɩ́ pɔɔsɩ-ɩ sɩ: Pepe tɔɔ kɛ́ nyɑ́ tǝmlɛ nyǝ́mɑ sɔpɑ mɑ tɑɑlɛ kɛ kɔkɔ?
32Kɛlɛnɑ Apǝsɑlɔm sɩ: Mɑ tilɑ nyɑ́ wɑɑlɩ kɛ́ tɔm pɑɣɑlɛ sɩ ń kɔɔ nɑ mɑ́ tili-ŋ wulɑʋ kiŋ nɑ ń pɔɔsɩ-ɩ sɩ pepe tɔɔ kɛ́ ɩ tilɑ mɑ wɑɑlɩ kɛ Kesuu? Pɩɩ kǝlɑ teu sɩ mɑ́ sɑɑlɩ tǝnɑ. Mɑ cɑɑ sɩ mɑ nɑ wulɑʋ tǝ́ nɑ́ nɑ ye mɑ lɑpɑ-ɩ ɩsɑɣɑtʋ nti ɩ kʋ-m.
33Ḿpʋ́ɣʋ́ Sowɑpɩ nɑ́ polɑɑ nɑ ɩ́ heeli-tǝɣɩ wulɑʋ. Ɩlɛnɑ wulɑʋ yɑɑ Apǝsɑlɔm nɑ ɩ́ kɔɔ nɑ ɩ́ hǝntɩ wulɑʋ kɛ ɑtɛ nɑ ɩ́lɛ́ ɩ wɑɣɑlɩ-ɩ.
