1Huan ya ni eltoc nopa huicat cati David huicac para TOTECO pampa quinmanahuijtoya ten nochi icualancaitacahua huan ten Saúl.
2Quiijto: “TOTECO, ipan ta nimotatía. Ta cati techmanahuía. Eltoc quej nielisquía calijtic ipan se cali ica tepamit cati tilahuac campa amo teno hueli nechajsis. Ta tinotemaquixtijca.
3NoTeco Dios, ta techyahualohua para amo huelis techajsise nocualancaitacahua. San ipan ta nimotemachis. Ta cati techyahualohua para techmanahuis ten mosisinijca tacame. NoTeco Dios, ipan ta nijmati nitemachti. Tinotemaquixtijca. Techmanahuía ten cati techmictisquía.
4Nijnotzas, TOTECO, cati quinamiqui tijhueyichihuase. Huan yaya techmaquixtis ten nocualancaitacahua.
5Quema nochi techyahualtzacuayayaj para techmictise, huan nijmatqui techtanisnequiyaya cati amo cuali, ica nochi ichicahualis, nimitztzajtzili.
6Quema nijmatiyaya nimiquisquía huan techtilanayaya campa mijcatzitzi, huan nimoixnamiquiyaya ica miquilisti,
7huajca ipan notaohuijcayo nijnojnotzqui TOTECO. Quena, nijtzajtzili noTeco Dios ma techpalehui. Huan yaya techtacaquili hasta nepa ipan ilhuicac. Quena, quitacaquili cati niquilhui, huan techpalehui.
8Huajca chicahuac mojmolini tali, huan nojquiya molini ilhuicacti campa motatzquilijtoc. Nochi mohuihuixojque pampa Toteco Dios cualanqui ica nocualancaitacahua.
9Elqui quej pocti quisayaya ipan iyacatzol. Huan icamaco quisayaya tilelemecti cati tetzontamiltiyaya. Quena, elqui quej lemeniyaya miyac ticuahuit, pampa tahuel cualantoc.
10Huan TOTECO quiechcapano ilhuicacti huan hualtemoc para techpalehuis. Nejnentihualajqui ipan mixti cati nelyayahuic.
11Elqui quej TOTECO tejcoc ipan ieltapal se querubín ilhuicac ejquet huan patantihualajqui ajacatipa.
12Yaya motzajqui ica tzintayohuilot, huan at quiyahualo para amo aqui quiitasquía.
13Cahuaniyaya itatanex TOTECO huan elqui quej tapetaniyaya iixpa. Huan itatanex lemeniyaya quej ticuahuit.
14Tatomonqui nelía chicahuac ten ilhuicac huan ajsic campa hueli, pampa TOTECO Cati Más Hueyi camanaltic.
15Quimajcajqui cuataminti huan nocualancaitacahua cholojque campa hueli. Tahuel tapetanalti huan quitamisosolo.
16Quema yaya tailpitzqui ica cualanti, quixejxelo nopa hueyi at cati tahuel huejcata, huan nopa ojme cati eltoc atatzinta monexti. Huan nesqui tanemijya nochi itzinpehualtil ni taltipacti, pampa TOTECO teajhuac chicahuac.
17TOTECO momaxitajqui ten ilhuicac huan techitzqui. Techmaquixti quema nimisahuiyaya ipan miyac at.
18Techmanahui ten nocualancaitacahua cati más tetique. Techmaquixti ten inijuanti cati techcualancaitayayaj, huan cati techpanoyayaj ica ininchicahualis.
19Inijuanti nechtehuijque quema nechajsitoya se hueyi tequipacholi. Pero TOTECO nechpalehui huan nechtali campa temachti.
20Techhuicac campa amo mahuilili. Techmaquixti pampa techicnelía.
21TOTECO techtaxtahuijtoc pampa nijchihua cati xitahuac iixpa. Techpalehui pampa quiitac para amo teno nijchijtoya.
22Quena, nijtoquilijtoc iojhui TOTECO, huan amo nijcajtoc. Amo nijcajtejtoc noTeco Dios para nijtoquilis cati amo cuali.
23Niquixmati itanahuatilhua, huan amo quema nimohuejcatalijtoc ten cati quiijtohua.
24Ninejnentoc xitahuac iixpa, huan nimomocuitahuijtoc para amo nitajtacolchihuas.
25Yeca TOTECO techtaxtahuijtoc, pampa nijchijtoc cati xitahuac. Techtiochijtoc pampa techitztoc para nitapajpacti iixpa.
26Ta, TOTECO tiquintasojta cati tetasojtaj. Tiquinchihuilía nel xitahuac cati nejnemi xitahuac.
27Timonextía titapajpactic ica cati tapajpactic. Pero timonextía tahuel tichicahuac ica inijuanti cati fiero inintalnamiquilis.
28Ta tiquinmaquixtía cati mocuesohuaj, pero tiquintachilía masehualme cati mohueyimatij, huan tiquinicnotalía.
29TOTECO, tinotaahuil. Techtaahuilía ipan tzintayohuilot.
30Ica mochicahualis Toteco Dios huelis niquintanis miyac soldados cati nocualancaitacahua. Huelis nihuitonis para nipanos iixco nopa tepamit ipan inialtepe.
31Xitahuac nochi iojhui Toteco Dios. Nochipa quisa melahuac cati quiijtohua icamanal TOTECO. Yaya quinmanahuía nochi cati motemachíaj ipan ya.
32Amo aqui seyoc Dios, san yaya TOTECO. Amo aqui seyoc quipiya tetili para techmanahuis quej Toteco Dios.
33Yaya Toteco Dios cati techchicahualismaca. Quichihua temachti noojhui.
34TOTECO quichihua noicxihua ma elica sonectzitzi. Quinchihua temachti quej iniicxi chivojme cati motalohuaj campa tepeixco. Techtalijtoc huejcapa huan niya ica temachili.
35TOTECO techmaca noyajatil para huelis nitatehuis. Nechfuerzajmaca hasta ica nomax huelis nijcuilpachos se tepos huitoli cati tetic cati quichijtoque ica bronce.
36Ta techmanahuía quej se teposti cati techyahualohua. Quena, techmaquixtía huan ica motaicnelil techhueyichijtoc.
37Noojhui tijchijtoc patahuac para amo niohuijtis, huan para amo nimopeyahuas quema ninejnemis.
38Niquintoquili nocualancaitacahua, huan niquintzontamilti. Amo nitacuepili hasta nochi niquinmicti.
39Niquintzontamilti nochi para amo aqui huelis sempa motananas. Inijuanti huetzque noicxita.
40Ta techmacac tetili para huelis nitatehuis. Ta techtanilijtoc nocualancaitacahua huan mocajtoque noicxita.
41Huan ta tijchijqui para nochi nocualancaitacahua ma choloca noixpa. Niquintzontamiltijtoc nochi cati techcualancaitayayaj.
42Inijuanti tatzajtzilijque para acajya ma quimaquixtiqui, pero amo aqui quinpalehui. Hasta nojquiya quitajtanijque TOTECO ma quinpalehui, pero amo quintacaquili.
43Huajca na niquinchijqui quej taltepocti. Niquintaijyohuilti huan ininpani nimoquejquetzqui quej soquit ipan ojti.
44Techmanahuijtoc ten nopa fiero tacame cati mopantíaj ipan noaltepe. Techtalijtoc para ica temachili nielis niinintanahuatijca miyac talme. Ama techtequipanohuaj masehualme cati ehuani ipan talme cati achtohuiya amo niquinixmatiyaya.
45Huan cati ehuani ipan sequinoc talme huihuipicaj noixpa. Techneltoquilíaj quema quicaquij ten nochicahualis.
46Sequinoc tali ehuani momajmatíaj, huan quisaj ten campa motatijtoque, huihuipicatihualahui noixpa.
47TOTECO itztoc. Ma tijpaquilismacaca yaya ipan cati nimotatía. Ma tijhueyichihuaca Toteco Dios, pampa yaya cati techmaquixtía.
48Toteco Dios quincuepilía nochi nocualancaitacahua. Quintantoc nochi altepeme huan quinchijtoc ma techtepanitaca.
49Quena, TOTECO techmanahuijtoc ten nocualancaitacahua. Techtalijtoc más huejcapa que nopa tacame cati techajsisnequiyayaj. Techmaquixtijtoc ten nopa tacame cati mosisiníaj ica na.
50Yeca nimitztascamati, TOTECO. Nimitzhueyitalis iniixpa cati ehuani ipan nochi talme. Nimitzhuicatis ni huicat para nimitzpaquilismacas.
51TOTECO, ta techmanahuijtoc huan techtalijtoc nimotanahuatijca. Techtasojtatoc na, niDavid, cati ta techtapejpenijtoc. Ta tiquintasojtas nochi noteipan ixhuihua para nochipa.”
