2.Samiyel 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Daawuda woy na Aji Sax ji gannaaw ba ko Aji Sax ji xettlee ci mboolemi noonam, xettli ko it ci Sóol. Kàdduy woy wa lii la.

²Mu ne: Aji Sax ji laay sës, mu di ma aar, di ma wallu.

³Mooy sama Yàlla, ji ma sës, yiiru, fegu, mucc, làqu, raw, mucc fitna.

⁴Ki yelloo cant, Aji Sax ji, moom laa woo, mucc ci samay noon.

⁵Gannaxi ndee mëdd ma, walum kasara naq ma.

⁶Buumi njaniiw laaw ma, dee ne jaas, di ma fiir.

⁷Ma jàq, woo Aji Sax ji, ne sama Yàlla wallóoy, mu dégge këram. Ma yuuxu, muy dégg.

⁸Mu mer, suuf yëngu, di ker-keri, kenuy asamaan jaayu, di reg-regi.

⁹Saxar di sël-sëlee ca wakkan ya, sawara boye ca gémmiñ ga, xal yu yànj tàkke ca.

¹⁰Mu firi asamaan, wàcc, niir yu fatt lal tànk ya.

¹¹Ma nga war malaakam serub, di naaw, daayaarloo laafi ngelaw.

¹²Ma nga bàddoo lëndëm, làmboo jali ndox aki xàmbaar.

¹³Leer a ko jiitu, ay xali sawara topp ca.

¹⁴Aji Sax jee dënoo asamaan. Aji Kawe jee àddu,

¹⁵soqiy fitt ak jumi melax, tasaare leen, fëlxe.

¹⁶Aji Sax ji gëdd, nokki, mu riir; xuri géej ne fàŋŋ, kenuy suuf ne duŋŋ.

¹⁷Moo yóotoo fa kaw, jàpp ma, seppee ma ca xóotey ndox ma,

¹⁸musal ma ca noon yu mag, ya ma bañ te man ma.

¹⁹Ñu dajeek man, bés ba ma jàqee, Aji Sax ji taxawu ma,

²⁰yaatal ma, bége ma, ba xettli ma.

²¹Aji Sax jee ma yool sama njekk, samay loxoo set, mu fey ma.

²²Sàmm naa yooni Aji Sax ji, bonuma, di moy sama Yàlla.

²³Dama ne jàkk ndigalam yépp, dëdduwma dogali yoonam.

²⁴Seede na, may jëfeg mat, di moyoo tooñ.

²⁵Aji Sax jee ma yool sama njekk, rafetlu sama mucc ayib.

²⁶Yaw Aji Sax ji, ku gore, fekk la gore; ku matale, fekk la matale;

²⁷ku sellal, fekk la sell; ku dëng, fekk laak say feem.

²⁸Yaw yaay musal xeet wu néew doole, kuy daŋŋiiral, nga detteel.

²⁹Yaw Aji Sax ji, kay, laay niitoo, Aji Sax jeey leeral sama lëndëm.

³⁰Maak yaw kay, ma song gàngoor. Maak sama Yàlla, ma tëb um tata.

³¹Yàllaa mat, kàddug Aji Sax jee wér te wóor. Mooy feg képp ku ko làqoo.

³²Ana kuy Yàlla ku moy Aji Sax ji? Ku jara sës ku dul sunu Yàlla?

³³Yàllaa may làqe dooleem, xàllal ma, yoon mat.

³⁴Moo ma gaawal ni kéwél, taxawal ma fu kawe.

³⁵Moo may tàggat ngir xare, may bank xalag xànjar.

³⁶Aji Sax ji, yaa may feg, musal ma, yaa may nangul, darajaal ma.

³⁷Yaa ma xàllalu yoon, duma tërëf.

³⁸Maay dàq noon yi, falaxe, jekkli, doora dëpp.

³⁹Ma rajaxe, nemmali, jógatuñu, xanaa fëlëñu, ma joggi.

⁴⁰Sol nga ma dooley xare, sukkal ñi ma jógal, ñu féete ma suuf.

⁴¹Yaa ma won ndoddi noon, ma boole bañ yi, bóom.

⁴²Ñu ne wallóoy, wall amul, ñu woo Aji Sax ji, faalewu leen.

⁴³Ma wol, ba ñu doon pënd, dër, note ni banu mbedd.

⁴⁴Yaa ma xettli ci bokk yiy fippu, def ma, ma jiite ay xeet; waaso wu ma xamul sax nangul ma,

⁴⁵ku ma ci dégg, déggal ma, ay doomi doxandéem di ma raamal,

⁴⁶ne yàcc, génne seeni tata, di lox.

⁴⁷Aji Sax jeey Kiy dund. Kii ma sës moo jara sant. Yàlla sama cëslaay ji may musal moo màgg!

⁴⁸Mooy Yàlla ji may feyul, di ma suufeelal xeet yi.

⁴⁹Xettli nga maak ku ma bañ ak ku ma jógal, kaweel ma, ma tiim leen, xettleeti ma cib soxor.

⁵⁰Kon Aji Sax ji, ma sant la ci biir xeet yi, kañ la!

⁵¹Yaay may sa buuru ñoñ ndam lu réy, yaay ji ngor ki nga fal, muy man Daawuda, di sama askan ba fàww.