Sɑmiyɛɛlɩ II 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Pǝlɛ pǝ wɑɑlɩ kɛ́ Apǝsɑlɔm hikɑ yoou kɛɛkɛ nɑ kpɑɣɑnǝŋ nɑ tɑŋlɑɑ kɛ nɩɩlɛ nɑ nɑɑnʋwɑ (50).

²Tɑnɑŋ tɑnɑŋ kɛ Apǝsɑlɔm lɩɩkɑɣɑ lɔŋ nɑ ɩ́ puki ɩcɑtɛ nɔnɔɣɔ sɔsɑɣɑ mpɑɑʋ kpeeŋɑ, ye nɔɣɔlʋ hikɑ tɔm sɩ ɩ puki wulɑʋ tɛɣɛ hʋʋlɛ, ɩlɛ ɩ yɑɑ-ɩ nɑ ɩ́ pɔɔsɩ-ɩ sɩ: Ɩcɑtɛ nteɣe n lɩɩnɑ? Ye ɩ́lɛ́ ɩ cɔ-ɩ sɩ: Mɑ kɛ́ Ɩsɛɣɛlɩ kpekǝle tǝnɛ tǝ tʋ

³ɩlɛ ɩ tɔmɩ-ɩ sɩ: Nyǝnɩ, n wɛnɑ tɑmpɑnɑ kɛ́. Pǝ́cɔ́ ye n polɑ wulɑʋ tɛ nɔɣɔlʋ kɑɑ pɑɑsǝnɑ-ŋ.

⁴Kɑsɑ, ye mɑɑ kɛnɑ hʋʋlʋ ntɔ, mɑ kiŋ ntɛ́ tɔm nyǝ́mɑ kɑ kɔŋɑɣɑ nɑ mɑ tɑɣɑnǝɣɩ pɑ tɔmnɑɑ.

⁵Ye yʋlʋ ɩ́ kpǝtǝɣǝnɑ-ɩ sɩ ɩ hǝntǝɣɩ ɑtɛ ɩlɛ ɩ kpipi-ɩ nɑ ɩ́ wɑɣɑlɩ-ɩ.

⁶Ḿpʋ́ɣʋ́ Apǝsɑlɔm lɑkɑɣɑ Ɩsɛɣɛlɩ nyǝ́mɑ tǝnɑ mpɑ pɑ pukɑɣɑnɑ tɔmnɑɑ kɛ wulɑʋ tɛ tɔ. Nɑ Ɩsɛɣɛlɩ nyǝ́mɑ lɑŋɑ hɛɛkɑɣɑnɑ-ɩ kɛ́.

⁷Pǝnɑɣɑ liɣiti nyǝŋkɑ tɑɑ kɛ́ Apǝsɑlɔm tɔmɑ wulɑʋ sɩ: Tɑcɑɑ, yele nɑ mɑ́ polo Hepǝlɔŋ nɑ mɑ́ lɑ́ kɔtɑɣɑ ŋkɑ mɑɑ sɩɩ Tɑcɑɑ kɛ nɔɣɔ sɩ mɑɑ lɑpɩ-ɩ tɔ.

⁸Mpi tɔ, wɑɑtʋ wei mɑɑ wɛ Kesuu tɔɣɔ mɑ sɩɩ Tɑcɑɑ kɛ nɔɣɔ sɩ ye ɩ yelɑɑ nɑ mɑ́ mǝlɩ Yosɑlɛm, ɩnǝɣɩ mɑɑ lɑ tǝmlɛ.

⁹Ntɛnɑ wulɑʋ sɩ: Polo. Ɩlɛnɑ Apǝsɑlɔm kʋlɩ nɑ ɩ́ tɛɛ Hepǝlɔŋ.

¹⁰Mpʋɣʋlɛ Apǝsɑlɔm tilɑ tillɑɑ kɛ mukɑɣɑ kɛ Ɩsɛɣɛlɩ tɛtʋ tǝnɑ tɑɑ sɩ ye pɑ nɩɩ tutuɣu ɩlɛ pɑ yɔɣɔtɩ sɩ: Apǝsɑlɔm kɛlɛ wulɑʋ nɑ ɩ́ wɛ Hepǝlɔŋ.

¹¹Yosɑlɛm nyǝ́mɑ kɑ sɩɩ-ɩ yǝlɑɑ ŋmʋnʋɣʋ (200) pɛlɛ pɑ nɩɩnɑ-ɩ teu kɛ́, pɑ tɑ cɛkǝnɑ nti ɩ hɔkɑɑ tɔ.

¹²Wɑɑtʋ wei Apǝsɑlɔm lɑkɑɣɑ kɔtɑsɩ, ɩlɛnɑ ɩ́ tili nɑ pɑ́ yɑɑ Kilo tʋ Ahitofɛlɩ wei ɩ kɑ kɛ́ Tɑfiiti sɔpɑɑpɩ tɔ. Ḿpʋ́ɣʋ́ sɑmɑɑ hukɑ sɔsɔm kɛ ɩ kiŋ nɑ pɑ́ tɔŋnɑ wulɑʋ ɑcɑɣɑ kɛ cɑɣɑʋ.

¹³Ḿpʋ́ɣʋ́ nɔɣɔlʋ kɔmɑ nɑ ɩ́ cɩ Tɑfiiti kɛ sǝkpɑlʋɣʋ sɩ: Ɩsɛɣɛlɩ yǝlɑɑ kɛɛsɑ ɩsɛ nɑ Apǝsɑlɔm tɔɔ.

¹⁴Ɩlɛnɑ Tɑfiiti yɔɣɔtɩ ɩ wɑɑlɩ nyǝ́mɑ tǝnɑ mpɑ pɑɑ wɛ ɩ kiŋ kɛ Yosɑlɛm tɔ sɩ: Ɩ́ kʋlɩ nɑ tǝ́ se, tɔfɔ Apǝsɑlɔm ɩɩ yeki-tʋ. Ɩ́ lɑ tǝcɑʋ, ye pǝ tɑɣɑ mpʋ ɩ kɑ́ tuti-tʋ nɑ ɩ́ kʋ ɩcɑtɛ nyǝ́mɑ tǝnɑ.

¹⁵Ntɛnɑ wulɑʋ wɑɑlɩ nyǝ́mɑ tɔ sɩ: Ɛɛ, Tɑcɑɑ tɩɩ lɑ tǝ tǝnɑ nti n heeliɣi-tʋ tɔ.

¹⁶Ḿpʋ́ɣʋ́ wulɑʋ nɑ ɩ tǝyɑɣɑ nyǝ́mɑ tǝnɑ pɑ lɩɩwɑ, nɑ ɩ́ kɑɑsɩ ɑlɑɑ nɑɑnʋwɑ sɩ pɛlɛ pɑ́ tɑŋ tǝyɑɣɑ.

¹⁷Wulɑʋ lɩɩ mpʋ ɩlɛnɑ ɩ yǝlɑɑ tǝnɑ tʋ ɩ wɑɑlɩ nɑ pɑ́ sǝŋ tǝyɑɣɑ kɑntǝkɑɣɑ nyǝŋkɑ kiŋ.

¹⁸Ḿpʋ́ɣʋ́ ɩ tǝmlɛ nyǝ́mɑ tǝnɑ nɑ ɩ tɑŋlɑɑ tǝnɑ tʋ-ɩ hɛkʋ, nɑ Kɑtɩ yoolɑɑ nɑ́ɑ́ kɔɔ yǝlɑɑ nɑsǝtoso (600) nɑ pɑ́ tɛɛ-ɩ nɔɣɔ.

¹⁹Ḿpʋ́ɣʋ́ wulɑʋ pɔɔsɑ Kɑtɩ yoolɑɑ nyʋɣʋ tʋ Ɩtɑyi sɩ: Pepe tɔɔ kɛ́ mǝ kɔmɑ tɑ kiŋ tɔtɔ? Ɩ mǝlɩ Apǝsɑlɔm cɔlɔ. Mpi tɔ, mǝ kɛ́ cɔɔsǝlɑɑ kɛ́ ɩ tɑ kɛ́ tɛtʋ nyǝ́mɑ.

²⁰Anɩ nɔɔnɔɔ kɛlɛ ɩ tɑpɑ, ɩlɛnɑ mɑ́ɑ́ kpɑkǝɣɩ-mɛɣɛ kpɑkpɑɑ nɑ mɑ́ cɔɔkǝnɑ. Pǝ́cɔ́ mɑ mɑɣɑmɑɣɑ mɑ tɑ nyɩ mɑ tǝpote. Mpʋ tɔ, ɩ́ mǝlɩ. Tɑcɑɑ ɩ́ pɑɑsǝnɑ-mɛ nɑ ɩ́ lɑ-mɛɣɛ kʋpɑntʋ.

²¹Tǝnɑɣɑlɛ Ɩtɑyi cɔ wulɑʋ sɩ: Mɑ tuunɑ Ɩsɔ nɑ nyɑ́ sɩ: Timpi n kɑ polo tɔ tǝnɑɣɑ tɩɩ polo, pɑɑ sǝm mɑɣɑmɑɣɑ tɩɩ sɩ.

²²Ntɛnɑ wulɑʋ tɔ Ɩtɑyi sɩ: Ye mpʋ tɛɛ nɔɣɔ. Ɩlɛnɑ Ɩtɑyi nɑ ɩ yǝlɑɑ tǝnɑ nɑ ɩ piyɑ tǝnɑ pɑ́ tɛɛ nɔɣɔ.

²³Ḿpʋ́ɣʋ́ wulɑʋ nɑ ɩ yǝlɑɑ pɑ tʋ mpɑɑʋ nɑ pɑ́ tɛɛkɩ. Ye ɩ tɑlɑ ɩcɑtɛ nte, tǝlɛ tǝ yǝlɑɑ pǝlɩ ɩsǝlʋm nɑ pɑ́ mɑkɩ kɑpusi. Ɩlɛnɑ wulɑʋ nɑ́ɑ́ tɛɛ Setǝlɔŋ lɔɔʋ nɑ ɩ yǝlɑɑ nɑ́ɑ́ tǝŋnɑ wʋlɑɣɑ tɛtʋ tɔɔ tɔɔ.

²⁴Kɔtʋlʋ Sɑtɔkɩ nɑ Lefii nyǝ́mɑ mpɑ pɑ sǝɣǝlɑɣɑ Ɩsɔ ɑtɑkɑɑ tɔ pɑɑ wɛ tǝnɛ ɩnɩ tɔtɔ. Ḿpʋ́ɣʋ́ pɑ sɩɩ Ɩsɔ ɑtɑkɑɑ nɑ Apiyɑtɑɑ sǝŋɑɑ nɑ yǝlɑɑ tɔŋɑ lɩɩʋ kɛ ɩcɑtɛ tɑɑ.

²⁵Ɩlɛnɑ wulɑʋ tɔ Sɑtɔkɩ sɩ: Mǝŋnɑ Ɩsɔ ɑtɑkɑɑ kɛ ɩcɑtɛ tɑɑ. Ye Tɑcɑɑ kɑ́ hʋlɩ-m suulu, ɩ kɑ́ mǝlǝnɑ-m nɑ mɑɑ tɑsɑ-ɩ nɑʋ kɛ ɩ lonte tɑɑ.

²⁶Amɑ ye ɩ kɑ tɔ sɩ: Aɑɩ, mɑɑ cɑɑkɩ-ŋ, ɩlɛ ɩ́ lɑ-m ɩsǝnɑ ɩ cɑɑkɩ tɔ.

²⁷Ḿpʋ́ɣʋ́ wulɑʋ tɑsɑ Sɑtɔkɩ kɛ heeluɣu sɩ: Nyɑnɑ nyɑ́ pǝyɑlʋ Ahimɑɑsɩ nɑ Apiyɑtɑɑ pǝyɑlʋ Yonɑtɑŋ ɩ́ mǝlǝnɑ lɑŋhʋlʋmlɛ kɛ ɩcɑtɛ tɑɑ nɑ ɩ́ feŋiɣi.

²⁸Tɩɩ tɑŋ wʋlɑɣɑ tɛtʋ pɔɣɔ tǝtɛsǝlɛnɑɑ, nɑ mɑ́ nɩɩ ɩcɑtɛ ɑlɑɑfǝyɑ tɔm.

²⁹Ḿpʋ́ɣʋ́ Sɑtɔkɩ nɑ Apiyɑtɑɑ pɑ mǝlǝnɑ Ɩsɔ ɑtɑkɑɑ kɛ Yosɑlɛm nɑ pɑ́ cɑɣɑ tǝnɑ.

³⁰Ḿpʋ́ɣʋ́ Tɑfiiti tɑkɑ ɩ ɩsɛntɔɔ kɛ sɑɑlɑɣɑ nɑ ɩ́ wiiki nɑ ɩ́ kpɑɑkɩ Olifinɑɑ pulɑɣɑ tɔɔ kɛ́ nɔɔhɛɛ kpɛtɛ. Nɑ ɩ wɑɑlɩ nyǝ́mɑ nɑ́ɑ́ tɑkɩ pɛlɛ pɑ ɩsɛntɔɔ nɑ pɑ́ wiiki mpʋ tɔtɔ.

³¹Ɩlɛnɑ pɑ́ kɔɔ pɑ́ heeli wulɑʋ sɩ Ahitofɛlɩ tǝŋɑ Apǝsɑlɔm. Ntɛnɑ Tɑfiiti sɩ: Hɑɩ, Tɑcɑɑ, wɑkǝlɩ Ahitofɛlɩ lɑɣɑtʋ.

³²Wɑɑtʋ wei Tɑfiiti tɑlɑ pulɑɣɑ nyʋɣʋ tɑɑ timpi pɑ sɛɛkɩ Ɩsɔ tɔ, ɩlɛ ɩ tɑɑpɑlʋ nɑ ɩ lɑɣɑtʋ tɑsʋlʋ Akii tʋ Husɑyi kɔmɑɣɑlɛ nɑ lɑŋwɑkǝllɛ nɑ ɩ cɑpɑ cǝlɑɑ nɑ ɩ nyʋɣʋ nɑ tɛtʋ.

³³Ntɛnɑ Tɑfiiti sɩ: Ye n tǝŋǝɣɩ-m pǝ kɑɑ wɑɑsɩ-m.

³⁴Mǝlɩ ɩcɑtɛ tɑɑ nɑ ń heeli Apǝsɑlɔm sɩ n kɑ kɛ́ mɑ tǝmlɛ tʋ kɛ lɔŋ kɛ́, ɩlɛ nɔɔnɔɔ n cɑɑ sɩ ń nyǝnǝɣɩ ɩnǝɣɩ nyɑ́ cɑɑ. Wɑɑtʋ ɩnǝɣɩ n kɑ wɑkǝlɩ lɑɣɑtʋ nti Ahitofɛlɩ tɑsǝɣɩ-ɩ tɔ.

³⁵Pǝlɛ pǝ pɑɑsi kɔtǝlɑɑ Sɑtɔkɩ nɑ Apiyɑtɑɑ pɑ wɛ tǝnɑɣɑ. Ye n nɩɩ ntiɣi Apǝsɑlɔm pɑ tɔɔ n polo ń heeli-wɛ.

³⁶Pɑ pǝyɑlɑɑ Ahimɑɑsɩ nɑ Yonɑtɑŋ pɑ wɛ tǝnɑɣɑ, n kɑ tili-wɛ nɑ pɑ́ kɔɔ pɑ heeli-m.

³⁷Ḿpʋ́ɣʋ́ Tɑfiiti tɑɑpɑlʋ Husɑyi mǝlɑ ɩcɑtɛ tɑɑ kɛ́ wɑɑtʋ wei Apǝsɑlɔm kɔmɑ tɔ.