1Davide niima wuyei looni Ɠɔoɠɔ GALAGI ʋɛ, siɛgi zu naa unmɔɔni da, é kula sili nuiti kpein zeezu, ma un ge la ma mɛɛ ga Sayile.
2É ɠɛni ma: «Ɠɔoɠɔ GALAGI ɠa ga nà-fasai, nà-siɠigi, ùnmɔɔ nui,
3GALAGI nii é ga nà-fasai, ʋɛ gè lɔɔɠuzu ná, nà-kɔɔɠɔ zɛpɛgi, zobogi nii é kìzosu, nà-siɠi gaaɠoozagi, dɔ̀ɔɠuzuʋɛ, kìzo nui, nii é kìzosu tosu nuiti ma.
4Mamagi ɠa Ɠɔoɠɔ GALAGI ʋɛ! Siɛgi zu gè tolini da, gè vieni, gè ɠula sìli nuiti kpein zea.
5Mazɔlɔɔ saai ma ɗɛ lakpatakpagiti ti màaɓɔɔleni, é ɗa màalua, eɠɛʋelei kɔtuɗɛi la, é faa zuɠoloɠologi ɠɛɛzu.
6Gɔvɛalaazu ɠaluiti ti veleveleni mà, saai ná-tumɔiti ti ɠɛ tùɠɔ, ti ɗa màalua.
7Nà-kidaaʋiligi zu, gè wooɠulani Ɠɔoɠɔ GALAGI ma, gè wooɠulani nà-GALAGI ma, é yɛni ná-masa pɛlɛi wu, é gòomɛni, nà-kpee wooi looni goizu.
8Naazu, zooi ɓalini, é ɲiikpi, geeɠɔlɔgi ma wuulaagiti ti ɓalini, ti ɲiikpini ná-ziiɠaawanai maaʋele ma.
9Duului ɠa ɠulazu sokpayeɠeiti su, abui nii é galai wosu, naa ɗa ɠula daaʋɛ, ga tiɠilekai é ɗa ɠala.
10É geeɠɔlɔgi ziɛni su, é yei, tonaɓiin gaaɠiligai kɔɠɔi wu.
11É lɛɛni seeluɓɛin ɠɔma, é ɗa ɠoʋe, é ɠula kɛlɛma fiilɛi ɠoʋegiti kɔma.
12É ɓɔɠɔ maaveleveleni ga kpidii, é lɔɔɠu su, fiilɛ wolai ma ɓidii zu, tonaɓiin gaaɠiligai zu.
13Wozakalagi, nii é ɠɛni tuɠɔ, abulekaiti ti ɠɛni zosu ba.
14Ɠɔoɠɔ GALAGI ɠa zikɔzu geeɠɔlɔgi zu, GALA nii é Anii-Pɛ-Unda, naa wooi ɠa ɠulazu.
15É mɛɛinti pilini ga é sili nuiti suvaza, é mainmainti pilini, nii a kɛ ti ʋoluazo.
16Kpoloɗɛi ɓomaʋɛ ɠulani kɛlɛma, eteai ma wuulaagiti maa ɠɛ kala, ga Ɠɔoɠɔ GALAGI ná-kpaazaɠai maaʋele, ta sokpayeɠeiti su viilɛi!
17É yeemaaleni, é yɛ geezuʋɛ, é nɔ̀un so, é mɛ̀ɛn, é kùla ziɛ wolaiti ga.
18É kùlani sìli nu wolai ya, niiti ti wɔ̀inzeɠezu, tama ti zuɓaai nɔ̀un ba.
19Ti wuzeɠeni dàalɔɠɔma nà-kidaaʋili foloi, kɛlɛ Ɠɔoɠɔ GALAGI ɠa é loni pòlu.
20É kùlani faaɓaagi zu, é kùlani, mazɔlɔɔ nɛ̀ɛʋɛ bɛ.
21Ɠɔoɠɔ GALAGI vaani bu, é sò eɠɛʋelei nà-telebodai la, é kɛɛni bɛ̀, eɠɛʋelei zèeiti ɲade pelei la,
22mazɔlɔɔ gè Ɠɔoɠɔ GALAGI ná-peleiti sogɛ, gè la maaɠoozani nà-GALAGI ʋa, ga faa ɲɔu ɠɛɛ vaa maaʋele.
23Gàazu ɠa ná-tɔgiti ba yeenɔpɛ, gè la zeɠezu ná-deveiti ba.
24Gè ɠɛni ga ziimai ɠɛ nui, gè ɓɔɠɔ zoni ga gè mina faaɠaaza gola ɠɛ.
25Ɠɔoɠɔ GALAGI sàlani nà-telebo fai maaʋele ma, eɠɛʋelei nɔ̀un ɲadegai la tɔun gaazu.
26Zɔi é è ʋɛ ga wooɠɛɠila nui, ɗa ɠɛ naa ʋɛ ga wooɠɛɠila nui, zɔi peelalazu la ba, peelalazu la è ʋa naa letema.
27Zɔi ɲadegai, ɗa ɗa-ɲadedai lɛɛzu ga naa, niiti ti ga yaava nuiti, ɗa ɗa-ɠimalai lɛɛzu ga naati.
28Ɗa maanɔɠɔ nuiti kizosu, ɗa wɛlɛzu gaazulɛɛ nuiti ba, è ti maayei.
29Ɗa ɠa è ga nà-wozakalagi, ee, Ɠɔoɠɔ GALAGI! Ɠɔoɠɔ GALAGI ɠa nà-kpidii zu ɠɛ kala.
30Ni ɗa bà, nà ʋili salaʋusu ɓulugi zaama, ni nà-GALAGI ɠa bà, nà ʋili gè ɓudɛ siɠigi maazu.
31GALA ná-peleiti daazeeliʋɛ, Ɠɔoɠɔ GALAGI laawooi ɠoleʋɛ. GALA ka ga kɔɔɠɔ zɛpɛgi naati kpein bɛ, niiti ti lɔɔɠuzu tɔun polu.
32Mazɔlɔɔ ɓɛ ɠa é ga GALA, ni Ɠɔoɠɔ GALAGI laade? Ɓɛ ɠa é ga fasai, ni gá-ƓALAGI laade?
33GALA ka é ga nà-siɠi gaaɠoozagi, nii zeeɠaaɓaai, é nà-pelei ɓɛtɛ ga pagɔ.
34Toɠa kɔ̀ɠɔiti kɛɛzu, eɠɛ dopai ɠɔɠɔiti, é tò ada ɠaaɠoozagiti.
35Toɠa é màalɛlɛzu ga kɔɔɠɔ vai, kilɛgi é ga kɔlu ɓɔigi kpili fai ɓaai, zèeiti ta mɛɛin ʋilisu ga naa.
36Unmɔɔgi è bosu ga ze, naa ɠa é ga nà-kɔɔɠɔ zɛpɛgi, ɗa-ɓɔbaiti ta sɛ̀bɛlɔɔzu.
37È-zaalai zu, nà ziɛzu valafala, kɔ̀ɠɔiti ti la liizu ga.
38Nà ʋilɛsu sìli nuiti polu, gè ti zuɠoloɠolo, gè la ɠalega ma, ni gè la ti-ma zuwu ɠaaleʋeni.
39Gè ti-ma zuwu ɠaaleʋeni, gè ti ʋali ga, ti la mɔ wuzeɠea, ti loo kɔ̀ɠɔ wu.
40Ɗa sàamaɠilizu ga zɛbɛi kɔɔɠɔ vai ma, ɗa sìli nuiti toozu bu bɛ̀.
41Ɗa sìli nuiti kpɛɛzu tùɠɔ, nà wɔ̀inzeɠe nuiti koloɠolo.
42Ti kpɔba nu ɠaiziaa, ti la sɔlɔɔni, ni ta Ɠɔoɠɔ GALAGI lolina, naa la ti wooɠaaʋotesu!
43Nà ti ɠɛɛzu ga zooi ma vufiligi, gè ti wolowolo, gè ziɛ ti zu, eɠɛ pele zu ʋalaʋalai.
44È kùla nà-nuɓusɛiti ta-ɓaka fai laawu, è màkɛga ga zii ɠiligiti ta-ɠundiɠii. Nuɓusɛiti gè la ti ɠwɛɛ, naati ta botii ɠɛɛzu bɛ̀.
45Wɛɛinti ta ʋaazu, ti ɗa tɛ̀ su. Nà ti levena nɔ feya, ti ɠolo bɛ̀ gaamanɔ.
46Wɛɛinti ta iɲɔteʋei zu, ti zasu ɗa ɓali, ta ɠɛna ɠulaa ta-ziɠigi zu.
47Ɠɔoɠɔ GALAGI ɠa vulua! Mamagi ɠa bɛ, toɠa é ga nà-fasai! Ɛsɛ pɛ ge nà-GALAGI maamusɛ, nà-kizo fasai.
48GALAGI é zobo feezu bɛ̀, gè nɔ̀nɔ ʋotokula, é ziiti kolozu bɛ̀,
49ɗa kùlazu sìli nuiti zea. Ɗa sèizu wɔ̀inzeɠe nuiti unda, è kùla nu ɲɔiti zea!
50Naa ɠa é ba, nà è maamusɛ zii ɠiligiti saama, ee, Ɠɔoɠɔ GALAGI! Nà guyei loo è-laaseigi lɛbi vaa ma.
51Ɠɔoɠɔ GALAGI unmɔɔ faa wolai ɠɛa ná-masagi ʋɛ. Toɠa wooɠɛɠiladai ɠɛɛzu naa ʋɛ, nii gulɔ ɲadegai ziaai ma, nii é ga Davide, ta mavofodai, eyɛsu ɠɔ!»
