Sɑmiyɛɛlɩ II 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ḿpʋ́ɣʋ́ Tɑcɑɑ pɑ́ɑ́nɑ́ tɑsɑ Ɩsɛɣɛlɩ nyǝ́mɑ kɛ huunɑʋ, nɑ ɩ́ tʋ́ Tɑfiiti tɑɑ sɩ ɩ́ kɑlɑ Ɩsɛɣɛlɩ nyǝ́mɑ nɑ Yutɑ nyǝ́mɑ.

²Ɩlɛnɑ Tɑfiiti tɔ ɩ yoou wulɑʋ Sowɑpɩ sɩ: Cɔɔ Ɩsɛɣɛlɩ kpekɑ tǝnɑ kɛ pǝ kpɑɣɑʋ Tɑŋ nɑ pǝ́ polo Pɛɛsepɑ tɔ nɑ ń kɑlɑ yǝlɑɑ nɑ mɑ́ nyɩ pɑ nyʋɣʋ.

³Mpʋɣʋlɛ Sowɑpɩ sɩ: Tɑcɑɑ ɩ́ lɑ nɑ Ɩsɛɣɛlɩ yǝlɑɑ huki tɔm nɩɩnʋwɑ (100) nɑ ń nɑ́. Ɩlɛ pepe tɔɔ kɛ́ n tɩɩ kɑlǝɣɩ yǝlɑɑ?

⁴Ntɛnɑ wulɑʋ sɩ: Sowɑpɩ ɩ́ kɑlɑ kɛ ɩ́ kɑlɑ. Ɩlɛnɑ Sowɑpɩ polo nɑ ɩ́ kɑlɑ Ɩsɛɣɛlɩ yǝlɑɑ.

⁵Ḿpʋ́ɣʋ́ ɩ tɛsɑ Yɑɑtɑnɩ nɑ ɩ́ polo ɩ siki timpi pɑ yɑɑ sɩ Alʋwɛɛ tɔɣɔ ɩcɑtɛ nte tǝ wɛ Kɑtɩ tɛtɛkǝlɛ tɑɑ tɔ tǝ ntɔɣɔŋ tɔɔ kɛ Yɑsɛɛ cɔlɔ.

⁶Ḿpʋ́ɣʋ́ pɑ polɑ Kɑlɑɑtɩ tɛtʋ tɑɑ nɑ pɑ́ polo Hiti nyǝ́mɑ tɛtʋ tɑɑ nɑ Kɑtɛɛsɩ nɑ Tɑŋ-Yɑɑŋ kɛ Sitɔŋ cɔlɔ,

⁷nɑ pɑ́ polo Tiii koluŋɑ ɩcɑtɛ tɑɑ nɑ Hifi nyǝ́mɑ nɑ Kɑnɑɑŋ nyǝ́mɑ pɑ ɑcɑlɛɛ tɑɑ nɑ pɑ́ tɛɛsǝnɑ Yutɑ ilim tǝtʋlɛ ntɔɣɔŋ tɔɔ kɛ́ Pɛɛsepɑ.

⁸Ḿpʋ́ɣʋ́ pɑ cɔɔ tɛtʋ tǝnɑ nɑ pɑ́ mǝlɩ Yosɑlɛm. Ɩlɛ pǝ yoosɑ ɩsɔtʋnɑɑ pɔɣɔlɑɣɑfɛɩ nɑɑnʋwɑ, nɑ kʋyɛɛŋ hiu.

⁹Ɩlɛnɑ Sowɑpɩ heeli wulɑʋ sɩ: Ɩsɛɣɛlɩ yoolɑɑ wɛ yǝlɑɑ iyisi nɑsǝnɑɑsɑ (800000) nɑ Yutɑ nyǝ́mɑ kɛ yoolɑɑ iyisi nɑsǝlɛ nɑ nɩɩnʋwɑ (500000).

¹⁰Tɑfiiti tɛmɑ kʋkɑlʋɣʋ ŋkʋ ɩlɛ ɩ lɑŋlɛ wɑkǝlɑɑ kɛlɛ nɑ ɩ́ tɔ sɩ: Tɑcɑɑ, mɑ lɑpɑ mpʋ tɔ mɑ wɑkǝlɑɑ kɛ́, ɩlɛ wii-m mɑ ɩsɑɣɑtʋ ntɩ. Mɑ lɑpɑ kʋmɛlɛntʋ kɛ́.

¹¹Ḿpʋ́ɣʋ́ Tɑcɑɑ heelɑ Tɑfiiti lɑɣɑtʋ tɑsǝlʋ Ɩsɔ kʋyɔɣɔtʋtʋ tɛlǝsʋlʋ Kɑtɩ sɩ:

¹²Polo ń heeli Tɑfiiti sɩ mɑ sɩɩ wɑhɑlɑnɑɑ tooso sɩ ɩ́ lǝsɩ wei ɩ sɔɔlɑɑ tɔ. Nyɔɣɔsɩ ɩ́ lɩɩ-ɩ pɩɩsɩ nɑɑtosompɔɣɔlɑɣɑ, yɑɑ ɩ́ se ɩ kolontunɑɑ kɛ ɩsɔtʋnɑɑ tooso, yɑɑ yʋlʋkʋsǝkʋ ɩ́ lɩɩnɑ kʋyɛɛŋ tooso? Wulɑʋ ɩ́ cɔ-m nɑ mɑ́ heeli Tɑcɑɑ. Tɑfiiti femɑ tɑnɑŋ tɛɛ ɩlɛnɑ Ɩsɔ kʋyɔɣɔtʋtʋ tɛlǝsʋlʋ kɔɔ.

¹⁴Ntɛnɑ Tɑfiiti cɔ-ɩ sɩ: Mɑ lɑŋlɛ pǝsɑɑ kɛ́. Ɩlɛ Tɑcɑɑ kɛ tǝ pɛtɑ tɑ tɩ. Sɑnɑ ɩnɩ ɩ́ hɔ tɑ ŋkpɑŋŋ nɑ mpi yʋlʋ kɑ hɔmɩ-ɩ tɔ. Mpi tɔ, Tɑcɑɑ pǝtɔɔtǝlɛ tɔɔwɑɣɑ.

¹⁵Ḿpʋ́ɣʋ́ Tɑcɑɑ yelɑɑ nɑ yʋlʋkʋsǝkʋ sʋʋ Ɩsɛɣɛlɩ tɑɑ kɛ́ hɑtoo tɑnɑŋ tɛɛ nɑ pǝ́ polo wɑɑtʋ wei ɩ sɩɩwɑ tɔɣɔ pǝ kpɑɣɑʋ Tɑŋ nɑ pǝ́ polo Pɛɛsepɑ tɔ, nɑ yǝlɑɑ iyisi nɩɩtoso nɑ nɑɑnʋwɑ (70000) sɩ.

¹⁶Ɩsɔtɑɑ tillu tiikɑɣɑ Yosɑlɛm ɩcɑtɛ tɔɔ sɩ ɩ wɑkǝlǝɣɩ-tɛ, ɩlɛnɑ Tɑcɑɑ yele ɩ pɑ́ɑ́nɑ́ nɑ ɩ́ heeli-ɩ sɩ: Yele mpʋ, pǝ mɑɣɑnɑɑ. Wɑɑtʋ ɩnɩ tɔ nɑ ɩsɔtɑɑ tillu wɛ Yepusi tʋ Alɑfǝnɑ tǝfɑllɛ.

¹⁷Tɑfiiti nɑwɑ ɩsɔtɑɑ tillu nɑ ɩ́ kʋɣɩ yǝlɑɑ ɩlɛnɑ ɩ́ tɔ Tɑcɑɑ sɩ: Hɑɩ, mɑ́ wɑkǝlǝnɑ, yǝlɑɑ mpɛ pɑ tɑ lɑ pʋlʋ. Kʋ mɑ́ nɑ mɑ cɑɑ tǝyɑɣɑ nyǝ́mɑ.

¹⁸Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ polɑ Tɑfiiti kiŋ kɛ kʋyɑkʋ ŋkʋ nɑ ɩ́ tɔmɩ-ɩ sɩ: Polo Alɑfǝnɑ tǝfɑllɛ nɑ ń ŋmɑ́ Tɑcɑɑ kɛ kɔtɑɣɑ tǝlɑtɛ.

¹⁹Ɩlɛnɑ Tɑfiiti polo ɩsɩɩ Tɑcɑɑ heeluɣu-ɩ tɔ.

²⁰Ḿpʋ́ɣʋ́ Alɑfǝnɑ lɩɩwɑ nɑ ɩ́ loosi wulɑʋ nɑ ɩ wɑɑlɩ nyǝ́mɑ nɑ pɑ́ puki ɩ tɛ, ɩlɛnɑ ɩ́ polo nɑ ɩ́ hǝntɩ-ɩ ɑtɛ.

²¹Ɩlɛnɑ ɩ́ pɔɔsɩ wulɑʋ sɩ: Hɑɩ, tɑ́ cɑɑ, ɑlɑɑfǝyɑ kɛlɛ? Kɛlɛnɑ wulɑʋ sɩ: Mɑ kɔŋ kɛ́ sɩ mɑ yɑkɩ nyɑ́ tǝfɑllɛ nɑ mɑ́ ŋmɑ́ Tɑcɑɑ kɛ kɔtɑɣɑ tǝlɑtɛ nɑ mpusi ɩnɛ ɩ́ kɛɛlɩ yǝlɑɑ tɔɔ.

²²Ntɛnɑ Alɑfǝnɑ sɩ: Tɑ cɑɑ, kpɑɣɑ-tɛ nɑ ń lɑ kɔtɑsɩ nsi n nɔkɑɑ tɔ. Kpɑɣɑ nɑɑŋ ɩnɛ nɑ ń hɛtɩ ɑkuɣu kpɑtǝŋ nɑ ń lɑ kɔtɑɣɑ ŋkɑ kɔkɔ lusɑɑ tɔ.

²³Pǝ tǝnɑɣɑ ɩ hɑ wulɑʋ nɑ ɩ́ tɔmɩ-ɩ sɩ: Nyɑ́ Ɩsɔ Tɑcɑɑ ɩ́ mʋ nyɑ́ sǝlǝmʋɣʋ.

²⁴Tǝnɑɣɑlɛ wulɑʋ cɔ-ɩ sɩ: Aɑɩ, mɑɑ yɑnɑ liɣitee kɛ́, mɑ kɑɑ hɑ Tɑcɑɑ kɛ mpi pǝ tɔɔ mɑ tɑ wɩɩ tɔ. Ɩlɛnɑ Tɑfiiti fɛlɩ tǝfɑllɛ nɑ nɑɑŋ pǝ tɔɔ kɛ́ liɣitee nyǝɣǝtʋ nɩɩlɛ nɑ nɑɑnʋwɑ.

²⁵Ḿpʋ́ɣʋ́ ɩ ŋmɑwɑ kɔtɑɣɑ tǝlɑtɛ nɑ ɩ́ lɑ Tɑcɑɑ kɛ kɔtɑɣɑ ŋkɑ kɔkɔ lusɑɑ tɔ nɑ ciikuɣu nyǝnsɩ. Ɩlɛnɑ Tɑcɑɑ pɑ́ɑ́nɑ́ hɛɛ nɑ mpusi kɛɛlɩ Ɩsɛɣɛlɩ tɛtʋ tɑɑ.