1Sipu harupia Zihova se Devita koe Saula meke koari doduru nana kana pule, si kera la nia Devita sa kinera hie koe Zihova.
2E Zihova sa qua patu aqoroana, ke koa tome koa Sa si rau, meke loke kana si boka ṉoṉovalau.
3Sa qua Tamasa si na qua vinasare, na qua patu heheda, meke koa Sa si aqorae si rau. Na qua lave; lavelave hukata nau na kopu nau na harupau Sa. Na ṉiniraṉira meke sa ṉatina sa qua tinaharupu si Asa; kopu nau Sa meke harupau Sa koari na tie ṉoṉovala.
4Tepa tinokae si rau koe Zihova, sapu garona pude tava lavata meke harupau Sa koari na qua kana. Vahesia se Zihova!
5Tata tava mate hokara si rau, gugua rina bogusu variva mate sapu varidikue nau; sari na bogusu tinahuara si nobi tamunau si arau.
6Sari na tinasuna variva matedi si koa pa vari likohaequ, meke sa tinapusi tana minate si soqo au.
7Pa korapa qua tinasuna si tepa la koe Zihova si rau; tepa la tinokae si rau koa sa qua Tamasa. Pa korapa Nana Zelepade si avosia Sa sa mamalaiṉiqu, meke toka nau Sa sipu avosia Sa sa qua kinabo.
8Meke ziziziri na niniu sa pepeso; sa sinokiraedi rina toqere si niniu, sina bugoro sa Tamasa!
9Na tuṉaha si vura pa isuna, meke na nika huruṉuna, meke na motete leradi si vura pa ṉuzuna.
10Sira tukelia Sa sa maṉauru meke gore mae, na lei huporona si koa pa kauru nenena.
11Koi pa keke mateana tapuruna, meke gore mae si Asa, rerege mae si Asa koasa givusu.
12Va poko pule nia si Asa koasa huporo; meke sari na lei muhodi pu siṉia na kolo si koa pa vari likohaena Sa.
13Sa malakapina sa kapi si huruṉu vura mae pa ṉinedalana Sa.
14Beto asa si lulusu guana paka maṉauru se Zihova, meke ta avoso sa mamalaiṉina sa Tamasa Ululuna Hola.
15Gona ni Sa sari Nana tupi meke ta hurakatae sari Nana kana; sa malakapina sa kapi si va goveti Sa si arini.
16Sari na lolomo pa hubi lamana si ta dogoro hokara mo, meke sari na sinokiraedi rina pepeso si lopu tava paere, sipu norei Zihova sari Nana kana, meke va bubugorae lai Sa.
17Qaqama gore mae se Zihova panaulu, meke harupau Sa, meke daku vura nau Sa pa lamana peava.
18Harupau Sa si rau koari na qua kana ṉiṉiradi hola, meke koari doduru pu kukiti nau; ura ṉiṉira hola nau rini si arau.
19Sipu korapa koa si rau pa tinasuna, si mae rapata nau rini, ba va sare au e Zihova.
20Toka nau Sa meke va seu au Sa pa tinasuna; harupau Sa sina qetu nau Sa.
21Pia au Zihova si arau sina tavete va toṉoto si rau; mana nau Sa si rau sina viaqu, lopu sea si arau.
22Ele va tabea rau sa tinarae te Zihova; meke lopu va mudia rau sa qua Tamasa.
23Kopu betoni rau sari doduru Nana tinarae; lopu hite sekei rau sari Nana ginarunu.
24Loke tinazutuqu si rau pa kenuna Sa, meke ele kopu pule nau si rau pude lopu tavete va sea.
25Meke gua asa ke pia au Sa si arau, sina tavete va toṉoto si rau, meke gilania Sa sapu loke qua sinea si arau.
26Kei Zihova, ta ronuemu si Goi koarini pu soto va nabu koa Goi, meke va dogoro nia Goi sa Mua tinoṉoto koari na tie toṉoto.
27Via si Goi koarini pu via, ba koari na tie sekesekei si guana tie sekesekei guni Nigo rini.
28Harupi Goi saripu va pepekae, ba kanai Goi saripu vahesi puleni, osolae koa va pepekae si arini.
29Zihova, Agoi mo, sa qua kalalasa; ele va kalalasa ia Goi sa qua hinuporo.
30Ele poni nau Goi sa ṉiniraṉira pude rapati sari na qua kana meke sa vinarane pude boka va kilasia rau sa dia vasina varipera ṉiṉirana.
31E Tamasa si toleṉe gua toṉotodi sari Nana tinavete; ta ronu hola sari Nana zinama! Guana lave si Asa koa ri doduru pu tome koa Sa.
32E Zihova mo telena sina Tamasa; Asa mo telena sa nada Patu aqoroana.
33Asa mo sa Tamasa sapu va ṉiṉira au, toka nau Sa pa siraṉa gotogotona.
34Va boka au Sa pude ene koari na vasina tasunadi pa toqere, meke lopu kaqu hite ta tubarae si arau.
35Va tumatumae nau Sa pude varipera, ke boka ṉavea rau sa bokala ṉiṉirana hola.
36Kei Zihova, lavelave hukata nau Agoi meke toka nau pude va kilasi sari na qua kana; koasa Mua vinapepekae si tava lavata si rau.
37Ele va labe poni au Goi sa siraṉa, ke lopu vagi au ri na qua kana, meke lopu hite hoqa si arau.
38Hadu luli rau sari na qua kana meke va kilasi rau si arini; lopu hite noso si rau osolae va mate betoi rau si arini.
39Seke va hoqai rau si arini, ke lopu boka turu pule; mate eko mo pa kenuqu rau si arini.
40Ele poni nau Goi sa ṉiniraṉira pa vinaripera, meke va todoṉi sari na qua kana pa kenuqu rau.
41Ele va govete taloai Goi koa rau sari na qua kana; meke ele va matei rau saripu kukiti nau.
42Tepa tinokae, ba loke tie harupi si arini; Tepa la koe Zihova si arini, ba lopu olaṉi Sa.
43Muzara va umumi rau si arini, meke ta evaṉae guana kavuru; neti va konekonei rau si arini guana kosiri pa siraṉa.
44Ele harupau Goi si rau koari na tie va karikaridi; meke ele va baṉara au Goi koari na butubutu; sari na tinoni pu lopu gilani rau ba nabulu nau rini.
45Sari na tie karovodi si mae todoṉo pa kenuqu rau; pana avosau rini si arau, si va tabe mo si arini.
46Matagutu hola meke neneqara vura mae gua tu koari na dia vetu varipera ta bara va ṉiṉiradi si arini.
47Toana se Zihova! Mani tava lavata sa qua patu aqoroana! Maqu vahesia sa Tamasa, sa patu aqoroana, sa qua hinarupu!
48Poni nau Sa sa minataqara koari na qua kana; toka nau Sa pude va kilasi sari na votiki butubutu,
49meke harupau Sa si rau koari na qua kana. Ke Zihova, Agoi ele va mataqarau si rau koari na qua kana. Meke lavelave hukata nau Goi koari na tie ṉoṉovala.
50Gua asa, ke kote vahesigo rau si Goi pa vari korapadi ri na butubutu huporodi; meke kera vahesia rau sa Pozamu Zihova!
51Ponia Tamasa sa minataqara lavata koasa Nana baṉara; vata dogoro nia Sa sa Nana tataru nabuna koasa pu ele vizatia Sa. Koe Devita meke koari na tutina ninae rane.
