Sɑmiyɛɛlɩ II 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ḿpʋ́ɣʋ́ Tɑfiiti tɑsɑ Ɩsɛɣɛlɩ yoolɑɑ tɑɑ yoolɑɑ kɛ kpeɣeluɣu kɛ yǝlɑɑ ɩsɩɩ iyisi hiu nɑ nɑɑnʋwɑ (30000).

²Ɩlɛnɑ pɑ́ tɛɛ timpi pɑ yɑɑ sɩ Pɑɑlɑ tɔɣɔ Yutɑ sɩ pɑ kpɑkǝɣɩ Ɩsɔ ɑtɑkɑɑ. Tɑcɑɑ Tomɑ tǝnɑ tʋ tǝnnɑ ɑtɑkɑɑ ɩnɩ nɑ ɩ tɔkɩ kɑwulɑɣɑ kɛ ɩsɔtɑɑ tɑŋlɑɑ tɔɔ.

³Ḿpʋ́ɣʋ́ pɑ kpɑɣɑ Ɩsɔ ɑtɑkɑɑ kɛ́ Apinɑtɑpɩ tɛɣɛ pulɑɣɑ tɔɔ nɑ pɑ́ tʋ-ɩ kɛɛkɛ kʋfɑlʋ tɑɑ, nɑ Apinɑtɑpɩ pǝyɑlɑɑ Ahiyo kɛ lɔlɔ nɑ Yusɑ kɛ kɔŋkɔŋ tɔɔ nɑ pɑ́ pɑɑsǝɣǝnɑ-ɩ.

⁵Nɑ pɑ́ mɑkɩ wontu nɑ hǝsɩ nɑ Tɑfiiti nɑ ɩ nyǝ́mɑ pɑ́ pɑɑkɩ.

⁶Pɑ tɑlɑ tǝfɑllɛ nte tǝ wɛ timpi pɑ yɑɑ sɩ Nɑkɔŋ tɔ, ɩlɛnɑ nɑɑŋ kpilisi kɛɛkɛ nɑ Ɩsɔ ɑtɑkɑɑ tɑŋ hotuɣu nɑ Yusɑ temi-ɩ.

⁷Tǝnɑɣɑlɛ Tɑcɑɑ mʋ-ɩ nɑ pɑ́ɑ́nɑ́ nɑ ɩ́ kʋ-ɩ tǝnɑɣɑ ɑtɑkɑɑ kite kɛ mpi pǝ tɔɔ ɩ tɑ nyɑnɑ Ɩsɔ ɑtɑkɑɑ tokinɑʋ tɔ.

⁸Amɑ Tɑfiiti lɑŋlɛ tɑ hɛɛnɑ Yusɑ kʋɣʋ mpɩ, nɑ pɑ́ hɑ lonte ntɛɣɛ hǝtɛ sɩ Yusɑ tǝkʋlɛ. Nɑ pɑ́ yɑɑkɩ-tɛɣɛ ḿpʋ́ɣʋ́ hɑlǝnɑ sɑŋɑ.

⁹Ḿpʋ́ɣʋ́ sɔɣɔntʋ kpɑ wulɑʋ nɑ ɩ́ tɔ sɩ: Ye mpʋ mɑɑ pǝsɩ mɑ ponɑ Ɩsɔ ɑtɑkɑɑ kɛ mɑ tɛɣɛlɛ?

¹⁰Ɩlɛnɑ Tɑfiiti kisi Ɩsɔ ɑtɑkɑɑ ponɑʋ kɛ ɩ tɛ nɑ ɩ́ ponɑ-ɩ Kɑtɩ tʋ wei pɑ yɑɑ sɩ Opɛtɩ-Ɩtɔm tɔ ɩ tɛ.

¹¹Nɑ ɑtɑkɑɑ cɑɣɑ ɑpɑlʋ ɩnɩ ɩ tɛɣɛ ɩsɔtʋnɑɑ tooso. Ɩlɛnɑ Tɑcɑɑ nɑ́ɑ́ kooli ɩ́lɛ́ nɑ ɩ tǝyɑɣɑ nyǝ́mɑ tǝnɑɣɑ kʋpɑntʋ.

¹²Ɩlɛnɑ pɑ́ tɑɣɑsɩ Tɑfiiti sɩ Tɑcɑɑ koolɑ Opɛtɩ-Ɩtɔm nɑ ɩ nyǝ́mɑ tǝnɑɣɑ kʋpɑntʋ kɛ Ɩsɔ ɑtɑkɑɑ tɔɔ. Ntɛnɑ wulɑʋ polo Opɛtɩ-Ɩtɔm tɛ nɑ ɩ kpɑɣɑ Ɩsɔ ɑtɑkɑɑ nɑ pɑ́ ponɑ ɩ tɛ nɑ ɑŋmɑɑlɑ.

¹³Atɑkɑɑ sǝɣǝllɑɑ ɩ́ kpɛsɑ nɔɔhɛɛ nɑɑtoso nɑ ɑlɑɑfǝyɑ, ɩlɛ kɔtǝlɑɑ lɑ nɑʋ nɑ nɑʋle nim nyǝntɛ kɛ kɔtɑɣɑ.

¹⁴Ɩlɛnɑ Tɑfiiti fɛlɩ pɑɑlɛ kɛ teu kɛ ɑtɑkɑɑ ɩsɛntɑɑ nɑ ɩ́ suuwɑ kɔtǝlɑɑ toko tike.

¹⁵Ḿpʋ́ɣʋ́ ɩ nɑ Ɩsɛɣɛlɩ nyǝ́mɑ tǝnɑ pɑ ponɑ Tɑcɑɑ ɑtɑkɑɑ kɛ Yosɑlɛm nɑ ɑkɑntɛɛ nɑ lɑŋhʋlʋmlɛ kɑkiisɑsɩ.

¹⁶Pɑ tɔŋnɑ Ɩsɔ ɑtɑkɑɑ sʋʋnɑʋ kɛ wulɑʋ ɩcɑtɛ tɑɑ, ɩlɛ Tɑfiiti ɑlʋ Mikɑɑlɩ Sɑyuli pɛɛlɔ sǝŋnɑ pǝtote ntɛ́ nɑ ɩ́ nɑ́ ɩ pɑɑkɩ nɑ ɩ́ ŋmɑɑkɩ ɑtɑkɑɑ ɩsɛntɑɑ. Ḿpʋ́ɣʋ́ Mikɑɑlɩ tʋʋ Tɑfiiti kɛ ɩ tɑɑ.

¹⁷Pɑ tɑnɑ Ɩsɔ ɑtɑkɑɑ ɩlɛnɑ pɑ́ sɩɩ-ɩ ɩ lonte tɑɑ kɛ́ cokǝle nte Tɑfiiti kɑ lɑpɑ tɔ tǝ tɑɑ, nɑ pɑ́ lɑ́ kɔtɑsɩ nsi kɔkɔ lusɑ sɩ tǝnɑ tɔ nɑ ciikuɣu nyǝnsɩ.

¹⁸Pɑ tɛmɑ kɔtɑsɩ nsǝɣɩ lɑpʋ ɩlɛnɑ Tɑfiiti kooli yǝlɑɑ tǝnɑɣɑ kʋpɑntʋ kɛ Tomɑ tǝnɑ tʋ Tɑcɑɑ hǝtɛ tɑɑ.

¹⁹Ɩlɛnɑ Tɑfiiti tɑlɑ ɑpɑlɑɑ nɑ ɑlɑɑ mpɑ pɑɑ kotɑ tǝnɑ tɔɣɔ tɔɣɔnɑɣɑ. Pɑɑ wei kɛ potopoto, nɑ nɑntʋɣʋ, nɑ sʋlʋm, nɑ pɑ́ kpe.

²⁰Tɑfiiti mǝlɑ tǝyɑɣɑ sɩ ɩ kooliɣi ɩ nyǝ́mɑ kɛ kʋpɑntʋ, ɩlɛnɑ Mikɑɑlɩ lɩɩ nɑ ɩ́ sǝŋɩ-ɩ nɑ ɩ́ tɔmɩ-ɩ sɩ: Amɑ Ɩsɛɣɛlɩ wulɑʋ teeli ɩnɛɣɛ sɑŋɑ pɔpɔtʋ kɛ́. N wɔɣɔsɑ nyɑ́ kɑwulɑɣɑ wontu nɑ ń pɑɑkɩ nyɑ́ wɑɑlɩ nyǝ́mɑ yomɑɑ ɑlʋ nyǝ́mɑ ɩsɛntɑɑ ɩsɩɩ yʋlʋ kɛ yem.

²¹Ntɛnɑ Tɑfiiti cɔ-ɩ sɩ: Tɑcɑɑ wei ɩ kisɑ nyɑ́ cɑɑ nɑ ɩ́ lǝsɩ-m sɩ mɑ́ lɑ Ɩsɛɣɛlɩ nyǝ́mɑ wulɑʋ tɔ ɩ ɩsɛntɑɑ kɛ́ mɑ pɑɑwɑ.

²²Mɑ cɑɑ mɑ pɑsɑ mɑ tɩ nɑ mɑ́ pǝsɩ kpɛtɛ nɑ pǝ́ kǝlɩ mpʋ. Pɑɑ nɑ mpʋ tɔ, mɑ nyʋɣʋ kɑ́ kʋlɩ yomɑɑ ɑlʋ nyǝ́mɑ mpɑ n yɔɣɔtǝɣɩ tɔ pɑ ɩsɛntɑɑ kɛ́.

²³Sɑyuli pɛɛlɔ Mikɑɑlɩ nɑ ɩ sǝm tɔ ɩ tɑ lʋlɩ pǝyɑɣɑ.