Sɑmiyɛɛlɩ II 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ḿpʋ́ɣʋ́ Ɩsɛɣɛlɩ kpekɑ tǝnɑ kotɑ Tɑfiiti kiŋ kɛ Hepǝlɔŋ nɑ pɑ́ tɔmɩ-ɩ sɩ: Tɑ nɑ-ŋ tɑ cɑlǝm kʋlʋmǝm kɛ́.

²Pɑɑ hɑtoo wɑɑtʋ wei Sɑyuli kɑ kɛ́ tɑ wulɑʋ tɔ, kʋlʋm nyɑ́ ɩnɩ n pɑɑsɑɣɑnɑ Ɩsɛɣɛlɩ yoolɑɑ. Tɑcɑɑ kɑ tɛmɑ-ŋ heeluɣu kɛ ḿpʋ́ɣʋ́ sɩ ń pɑɑsǝnɑ Ɩsɛɣɛlɩ nyǝ́mɑ nɑ ń lɑ́ pɑ wulɑʋ.

³Ḿpʋ́ɣʋ́ Ɩsɛɣɛlɩ sɔsɑɑ kotɑ Tɑfiiti kiŋ kɛ Hepǝlɔŋ nɑ pɑ́ nɑ-ɩ pɑ́ pɛɛlɩ nɔɣɔ kɛ Tɑcɑɑ ɩsɛntɑɑ nɑ pɛlɛ pɑ́ pǝlɩ-ɩ nim nɑ ɩ́ pǝsɩ Ɩsɛɣɛlɩ wulɑʋ.

⁴Tɑfiiti pɩɩsɩ kɑ wɛ hiu nɑ nɑɑnʋwɑ kɛ wɑɑtʋ wei pɑ kpɑ-ɩ wulɑʋ tɔ. Ḿpʋ́ɣʋ́ ɩ tɔɣɔ kɑwulɑɣɑ kɛ pɩɩsɩ nɩɩlɛ.

⁵Ɩ tɔɣɔ kɑwulɑɣɑ kɛ Hepǝlɔŋ kɛ Yutɑ nyǝ́mɑ tɔɔ kɛ́ pɩɩsɩ nɑɑtosompɔɣɔlɑɣɑ nɑ ɩsɔtʋnɑɑ nɑɑtoso, nɑ Yosɑlɛm kɛ Yutɑ nɑ Ɩsɛɣɛlɩ pɑ́ kʋkpɛntʋɣʋ tɔɔ kɛ́ pɩɩsɩ hiu nɑ nɑɑnʋwɑ nɑ tooso.

⁶Ḿpʋ́ɣʋ́ wɑɑtʋ nɔɣɔlʋ Tɑfiiti nɑ ɩ yoolɑɑ pɑ polɑ Yosɑlɛm kɛ Yepusi nyǝ́mɑ mpɑ pɑ kɛ́ tɛtʋ nyǝ́mɑ tɔ pɑ yoonɑʋ. Tǝnɑɣɑlɛ pɛlɛ pɑ tɔmɑ-ɩ sɩ: N kɑɑ pǝsɩ nɑ ń sʋʋ tɑ ɩcɑtɛ tɑɑ. Pɑɑ yʋlʋmɑɑ nɑ kɑɑkɑlɑsɩ pɑɑ pǝsɩ nɑ pɑ́ tɑŋ-mɛ. Pǝ nyʋɣʋ ntɛ́ sɩ ɩcɑtɛ wɛ toŋ, Tɑfiiti kɑɑ pǝsɩ nɑ ɩ́ sʋʋ tǝ tɑɑ.

⁷Amɑ Tɑfiiti lɛɛkɑ koloŋɑ sɔsɑɣɑ ɩcɑtɛ nɑ ɩ́ kɑntɑ nɑ pɑ́ hɑ-tɛɣɛ hǝtɛ sɩ Tɑfiiti tɛ.

⁸Kʋyɑkʋ ŋkʋɣʋ Tɑfiiti tɔmɑ ɩ yoolɑɑ sɩ: Ye wei ɩ cɑɑ sɩ ɩ́ yoonɑ Yepusi nyǝ́mɑ pʋntʋ ɩ́ tǝŋ lʋm sɩɩlʋɣʋ nɑ ɩ́ kʋ́ mɑ kolontunɑɑ kɑɑkɑlɑsɩ nɑ yʋlʋmɑɑ mpɑ pɑ woŋɑɣɑ-m tɔ. Pǝ tɔɔ kɛ́ pǝ pǝsɑ ɩtuule sɩ: Kɑɑkɑlɑɣɑ yɑɑ yʋlʋm kɑɑ sʋʋ Tɑfiiti tǝyɑɣɑ tɑɑ.

⁹Ḿpʋ́ɣʋ́ Tɑfiiti lɛɛkɑ koluŋɑ sɔsɑɣɑ ɩcɑtɛ ntɛ́ nɑ ɩ́ cɑɣɑ tǝ tɑɑ nɑ ɩ́ hɑ-tɛ sɩ: Tɑfiiti tɛ. Ɩlɛnɑ ɩ́ ŋmɑ́ koluŋɑ nɑ Milo nɑ ɩ́ sɔɔsɩ kutuluŋ nɑ pǝ tɑɑ tɔɔ.

¹⁰Ɩlɛnɑ Tɑfiiti toŋ sɔɔsǝɣɩ nɑ pǝ́ puki nɑ Tɑcɑɑ Ɩsɔ Tomɑ tǝnɑ tʋ wɛ ɩ wɑɑlɩ.

¹¹Ḿpʋ́ɣʋ́ Tiii wulɑʋ Hilɑm ponɑ Tɑfiiti kɛ tǝmlɛ nyǝ́mɑ nɑ kpoŋkpolonɑɑ kʋpɑmɑ nɑ kɑɑfǝntɑnɑɑ nɑ pɛɛ sɑɑkǝlɑɑ nɑ pɑ́ ŋmɑ́ Tɑfiiti kɛ kɑwulɑɣɑ tǝyɑɣɑ.

¹²Tǝnɑɣɑ ɩ cɛkǝnɑɑ sɩ Tɑcɑɑ kpɑ-ɩ Ɩsɛɣɛlɩ nyǝ́mɑ wulɑʋ. Pǝyele ɩ kʋsɑ ɩ kɑwulɑɣɑ nyʋɣʋ kɛ ɩ kɑ sɔɔlɑ ɩ yǝlɑɑ Ɩsɛɣɛlɩ nyǝ́mɑ tɔ pǝ tɔɔ.

¹³Tɑfiiti tɑlɑ Yosɑlɛm ɩlɛnɑ ɩ́ kpɑɣɑ ɑlɑɑ nɑ pɛlɛ pɑ́ lʋlɩ-ɩ piyɑ kɛ tǝnɑ.

¹⁴Pɑ hǝlɑ ntɛ́ Sɑmʋwɑ nɑ Sopɑpɩ nɑ Nɑtɑŋ nɑ Sɑlʋmɔŋ

¹⁵nɑ Ɩpɑɑlɩ nɑ Ɩlisuwɑ nɑ Nefɛkɩ nɑ Yɑfiyɑ

¹⁶nɑ Ɩlisɑmɑ nɑ Ɩliyɑtɑ nɑ Ɩlifɛlɛtɩ.

¹⁷Ḿpʋ́ɣʋ́ Filiisi nyǝ́mɑ nɩɩwɑ sɩ pɑ kpɑ Tɑfiiti kɛ Ɩsɛɣɛlɩ nyǝ́mɑ wulɑʋ. Ɩlɛnɑ pɑ́ polo pɑ tǝnɑɣɑ ɩ wɑɑlɩ. Tɑfiiti nɩɩ mpʋ, ɩlɛnɑ ɩ́ sʋʋ koloŋɑ ɩcɑtɛ tɑɑ.

¹⁸Filiisi nyǝ́mɑ tɑlɑɑ, ɩlɛnɑ pɑ́ wɑtɩ Lefɑyim tɛtɛkǝlɛ tɑɑ.

¹⁹Ɩlɛnɑ Tɑfiiti pɔɔsɩ Tɑcɑɑ sɩ: Mɑ́ polo Filiisi nyǝ́mɑ wɑɑlɩ? N kɑ́ tʋ-wɛɣɛ mɑ niŋ tɑɑ? Tɑcɑɑ sɩ: Ɛɛ, polo, mɑɑ tʋ-wɛɣɛ nyɑ́ niŋ tɑɑ.

²⁰Ḿpʋ́ɣʋ́ Tɑfiiti polɑ Filiisi nyǝ́mɑ kiŋ kɛ timpi pɑ yɑɑ sɩ Pɑɑlɩ-Pelɑsim tɔ nɑ ɩ́ kʋ-wɛ. Ɩlɛnɑ ɩ́ tɔ sɩ: Tɑcɑɑ hɛɛ-m mpɑɑʋ kɛ mɑ kolontunɑɑ cɑŋɑ tɑɑ ɩsɩɩ lʋm fɑkʋɣʋ ɑkʋlɑ sɔsɔɔnɑ tɔ. Pǝ tɔɔ kɛ́ ɩ hɑ lonte ntɛɣɛ hǝtɛ sɩ Ɩsɔ mpɑɑʋ tǝfɑɣɑlɛ.

²¹Filiisi nyǝ́mɑ sewɑ nɑ pɑ yele pɑ tɩɩŋ ɩlɛnɑ Tɑfiiti nɑ ɩ yǝlɑɑ pɑ kpɑɣɑ nɑ pɑ́ wɔ kɔkɔ.

²²Ḿpʋ́ɣʋ́ Filiisi nyǝ́mɑ tɑsɑ wɑtʋɣʋ kɛ Lefɑyim tɛtɛkǝlɛ sɩ pɑ yookinɑ Ɩsɛɣɛlɩ nyǝ́mɑ.

²³Tɑfiiti pɔɔsɑ Tɑcɑɑ, ɩlɛnɑ Tɑcɑɑ heeli-ɩ sɩ: Tɑɑ ponɑ pɑ ɩsɛntɑɑ tɔɔ. Cɛ nɑ ń lɩɩnɑ pɑ wɑɑlɩ tɔɔ kɛ́ tuluŋɑ kɛ tɩɩŋ tɑɑlɛ ɩsɛntɑɑ.

²⁴Ye n kɔmɑ nɑ ń nɩɩ yǝlɑɑ nɔɔhɛɛ kɛ tɩɩŋ ɩnɩ ɩ tɑɑ ɩsɩɩ yoolɑɑ nɔɔhɛɛ, ɩlɛ n tii pɑ tɔɔ kɛ́ kpɑkpɑɑ. Mpi tɔ, Tɑcɑɑ tɛɛnɑ-ŋ nɔɣɔ sɩ ɩ yookinɑ Filiisi nyǝ́mɑ.

²⁵Ḿpʋ́ɣʋ́ Tɑfiiti lɑpɑ ɩsɩɩ Tɑcɑɑ heelɑ-ɩ tɔ, nɑ ɩ́ kʋ́ ɩ kolontunɑɑ kɛ pǝ kpɑɣɑʋ Kepɑ tɔ hɑlǝnɑ Kesɛɛ.