2 Samuɛli 22 - Bibeli Luayãtaalá

2 Samuɛli 22

Click on verse(s) to share them!

¹Kɛ́ Dii kí Davidi bↄ̀ Saulu ń a ibɛɛ kĩniↄ ↄzĩ, à lɛdà ń Diio

²à mɛ̀: Dii mɛ́ ma gbɛsi ũ ń ma zɛgikĩio, ì ma misi.

³Ma Lua mɛ́ ma gbɛsi ũ, mi naaàzi. Ɔ̃mɛ ma sɛ̀ngbao ũ ma Suaban gbãa ń ma gulɛsĩo ũ, ma ulɛkĩi ń ma bↄkĩio ũ, ì ma si gbɛ̃́ pãsĩↄwa.

⁴Dii kà wà aà sáaukpa. Mi lɛzuaàzi, ì ma bↄ ma ibɛɛↄ ↄzĩ.

⁵Gó kpàlɛmanↄ, kaalɛ swa lɛ́ ma ble.

⁶Mia baↄ galakpàmɛɛ, ga baikpà ma aɛ.

⁷Ma yeelɛa guu ma Dii sìsi, ma lɛzù ma Luazi, ↄ̃ à ma yãmà za a bɛ, ma wii kàwà, à gɛ̃̀ aà swã́u.

⁸Tↄↄlɛ lùalua à zĩ̀azĩa, gbɛ̀sĩsĩↄ dèedee ń zĩ́nau. Aa lùalua kɛ́ aà pↄ pà yã́i.

⁹Súɛlɛ bↄ̀ aà níu, tɛ́ pↄkaalɛna bↄ̀ aà lɛ́u, a yↄ̃ↄ lɛ́ pipi aà aɛ.

¹⁰À gu kɛ̃̀aa musu à pìla, lou sìsi aà gbá zíɛ.

¹¹Àlɛ vua dia malaika gã̀sĩade kpɛ, àlɛ yàakpa ń ĩ́anao.

¹²À gusia kù azĩala, à luabɛsiana kɛ̀ a kúkĩ́i ũ.

¹³Za aà gawi pílɛau lou lɛ́ pílɛ pãsĩpãsĩ.

¹⁴Dii pàla za musu, Lua Musude lↄↄ dↄ louvĩa ũ.

¹⁵À ka fã̀ ma ibɛɛↄgu à ń fãaa, Lua sùmá à ń yá.

¹⁶Kɛ́ Dii pàlamá, ísia tↄↄlɛ bↄ̀ gupuau, kɛ́ à pↄbↄ̀ a níu, dṹnia zĩ́na bↄ̀ puizi.

¹⁷À ↄbↄ̀ za musu à ma kũ, à ma bↄ ísiu.

¹⁸À ma si ma ibɛɛ gbãawa ń ma wɛ̀lɛ pↄ́ an gbãa dɛmalaↄ.

¹⁹Aa ã̀naa ma wɛ̃nakɛgↄↄ, ↄ̃ Dii zɛ̀manↄ.

²⁰À ma bↄ à ma gba dɛ̀ɛpookĩi, à ma mìsi kɛ́ a yemazi yã́i.

²¹Dii yãkɛ̀mɛɛ ma nↄ̀sɛmaa lɛ́uɛ, à fĩabòmɛɛ ma gbãsĩsai lɛ́u.

²²Asa má Dii yã́ kũa, mi vãikɛ ma a Lua tò weo.

²³Aà ikoyã ìↄ dↄaaamɛɛ píi, mi bↄ yã́ pↄ́ a dìlɛↄ kpɛo.

²⁴Ma kua tàae vĩ Diiɛo, má azĩa kũa duunasai.

²⁵Dii fĩabòmɛɛ ma maakɛ lɛ́uɛ, asa a è má kú gbãsĩsai.

²⁶Ń náai vĩ náaideↄnɛ, tàaesaiden n ũ tàaesaideↄnɛ.

²⁷Ń wásawasa gbɛ̃́ wásawasaↄnɛ, ãma ni kↄ̃nikɛ gbɛ̃́ dↄ̀ↄsaiↄnɛ.

²⁸Ni zĩabusanaↄ suaba, ni gbɛ̃́ pↄ́ aaì ńzĩa sɛ lɛsĩↄ busa.

²⁹Mpi Dii, ḿmɛ ń ma filia ũ, Dii, ni ma gusia lilɛ gupua ũ.

³⁰Ń n gbãao má fↄ̃ kuadi kaawa, ń ma Lua dↄnlɛo má fↄ̃ vĩ gĩa.

³¹Luapi sↄ̃, aà yãkɛaↄ bↄ̀lɛi, Dii yã́ sãa vĩo. A dɛ sɛ̀ngbao ũ gbɛ̃́ pↄ́ nàaziↄnɛ.

³²Dii bàasio, démɛ Lua ũi? Wá Lua bàasio, démɛ ulɛkĩi ũi?

³³Lua mɛ́ ì ma gba gbãa, ↄ̃mɛ ì zɛpoomɛɛ súsu.

³⁴Ì to ma wá nakũ lán tuewa, ì to màↄ bɛ bùsu gulɛsĩↄ musu.

³⁵Ì zĩkaa dadamɛɛ, e ma gã̀sĩ a fↄ̃ mↄgotɛ̃ sá gá.

³⁶Ni n zĩblesɛ̀ngbao kpaa, ni naalɛ ǹ ma tↄbↄ.

³⁷Ni ma zɛ́ yàasa kũmɛɛ, ↄ̃ ma gbá lí gbãlɛo.

³⁸Ma pɛlɛ ma wɛ̀lɛↄzi ma ń bãdɛ̀, mi kpɛkpao e ma gɛ ma ń dɛdɛò.

³⁹Ma ń wiwi míↄmiↄɛ, aai e fɛ̀lɛo, aa kwɛ̀ gↄ̃̀ kálɛa ma gbá zíɛ.

⁴⁰N ma gba gbãa ma zĩkàò, ń tò ma ibɛɛↄ mikpàa.

⁴¹Ń tò ma wɛ̀lɛↄ kpɛkpà, ↄ̃ ma a zangudepiↄ kàalɛ.

⁴²Aa wiilɛ̀, gbɛ̃e i ń suabao, aa lɛzù Diizi, i yãmamáo.

⁴³Ma ń kɛ́ búɛbuɛ lán bùsutiwa, ma táa'òmá lán zɛ́ guu pɛ̀lɛawa.

⁴⁴N ma bↄ ma gbɛ̃́ pↄ fɛ̀lɛmanↄↄ ↄzĩ, n ma kɛ buiↄ mide ũ. Gbɛ̃́ pↄ́ má ń dↄ̃oↄ ì zↄblemɛɛ,

⁴⁵bui zĩ̀loↄ ì vlãnaumɛɛ. Tó aa ma yã'o mà, aaì misiilɛmɛɛ.

⁴⁶Buipãleↄ kúsu ì kwɛ́, aaì bↄ ń zɛgikĩiↄu ń lualuao.

⁴⁷Dii ku! Báaaden ma gbɛsi ũ! Wà Lua ma gbɛsi ma Suabana tↄbↄ!

⁴⁸Lua mɛ́ ì tↄsimɛɛ, ì buiↄ totomɛɛ,

⁴⁹ì to mà pili ma ibɛɛↄwa. N ma gba gbãa dɛ ma wɛ̀lɛↄla, n ma bↄ gbɛ̃́ pãsĩↄ ↄzĩ.

⁵⁰A yã́i tò má ń sáaukpa buiↄnɛ, má n táasilɛ Dii.

⁵¹Ì zĩ̀ zↄ̃ↄ ble kí pↄ́ á sɛ̀ɛ, ì gbɛ̃kɛkɛ kía pↄ́ a kpàpiɛ, ma Davidi ń ma buiↄ e gↄↄpii.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

2 Samuɛli 22123456789101112131415161718192021222324

2 Samuɛli 22
1
2
3
4
5
6
7
8
9
10
11
12
13
14
15
16
17
18
19
20
21
22
23
24