Sɑmiyɛɛlɩ I 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ḿpʋ́ɣʋ́ Tɑcɑɑ tɔmɑ Sɑmiyɛɛlɩ sɩ: N kɑɑ yele Sɑyuli tɔɔ kɛ́ wulɑ kɛ mpʋ? Mɑ lɔ-ɩ kɛ́. Ɩ tɑ kɛ Ɩsɛɣɛlɩ nyǝ́mɑ wulɑʋ tɔtɔ. Suuli nyɑ́ hǝlʋɣʋ kɛ nim, nɑ mɑ́ tili-ŋ Pɛtǝlɛhɛm tʋ Sesee tɛ. Mɑ nɑwɑ ɩ pǝyɑlɑɑ tɑɑ kɛ́ wei mɑɑ kpɑ wulɑʋ tɔ.

²Ntɛnɑ Sɑmiyɛɛlɩ sɩ: Ɩsǝnɑɣɑlɛ mɑɑ lɑ nɑ mɑ́ polo mpʋ? Sɑyuli ɩ́ nɩɩwɑ ɩ kɑ́ kʋ-m. Kɛnɑ Tɑcɑɑ sɩ: Kpɛŋnɑ nɑʋ ɩfɑtɛ, ń tɑlɑɑ, ɩlɛ n tɔ sɩ: Mɑ kɔmɑɣɑ sɩ mɑ lɑkɩ Tɑcɑɑ kɛ kɔtɑɣɑ.

³Yɑɑ Sesee kɛ kɔtɑɣɑ tǝlɑtɛ. Ɩlɛ mɑɑ hʋlɩ-ŋ wei n kɑ kpɑ wulɑʋ nɑ ń pǝlɩ nim tɔ.

⁴Ḿpʋ́ɣʋ́ Sɑmiyɛɛlɩ tɛɛ Pɛtǝlɛhɛm ɩsɩɩ Tɑcɑɑ kɑ kɛɛsʋɣʋ tɔ. Ɩcɑtɛ sɔsɑɑ nɑ-ɩ nɑ sɔɣɔntʋ kpɑ-wɛ. Ɩlɛnɑ pɑ́ kpɑɣɑ ɑsewɑ nɑ pɑ́ sǝŋɩ-ɩ nɑ pɑ́ pɔɔsɩ-ɩ sɩ: Alɑɑfǝyɑ kɛlɛ n kɔmɑ?

⁵Ɩlɛnɑ ɩ́ cɔ sɩ: Ɛɛ ɑlɑɑfǝyɑ kɛ́. Mɑ kɔmɑɣɑ sɩ mɑ lɑkɩ Tɑcɑɑ kɛ kɔtɑɣɑ. Ɩ́ tɑɣɑnɩ mǝ tɩ nɑ ɩ́ kɔɔ kɔtɑɣɑ tǝlɑtɛ. Ḿpʋ́ɣʋ́ ɩ yɑɑ Sesee nɑ ɩ pǝyɑlɑɑ sɩ pɑ́ tɑɣɑnɩ pɑ tɩ nɑ pɑ́ kɔɔ kɔtɑɣɑ tǝlɑtɛ.

⁶Apɑlʋ ɩnɩ ɩ tǝyɑɣɑ nyǝ́mɑ sʋʋ kpɑkpɑɑ, nɑ Sɑmiyɛɛlɩ nɑ ɩ pǝyɑlʋ Iliyɑpɩ, ɩlɛnɑ ɩ́ mɑɣɑsɩ ɩ tɑɑ sɩ: Ɩsǝntɔ wei Tɑcɑɑ lǝsɑɑ tɔɣɔlɔ cǝnɛ.

⁷Kɛlɛnɑ Tɑcɑɑ tɔ Sɑmiyɛɛlɩ sɩ: Tɑɑ nyǝnɩ tɔɔ, nɑ tɑɣɑlǝŋ. Pǝ tɑɣɑ ɩnǝɣɩ mɑ lǝsɑɑ, mɑɑ pɑɑsǝɣǝnɑ tɔɔ ɩsɩɩ yʋlʋ. Amɑ lotu tɑɑ kɛ́ mɑ nyǝnǝɣɩ.

⁸Ḿpʋ́ɣʋ́ Sesee yɑɑ Apinɑtɑpɩ nɑ ɩ́ kɔɔ. Ɩlɛnɑ Sɑmiyɛɛlɩ tɔ sɩ: Pǝ tɑɣɑ ɩnǝɣɩ Tɑcɑɑ lǝsɑɑ.

⁹Nɑ Sesee yɑɑ Sɑmmɑ, ɩlɛnɑ Sɑmiyɛɛlɩ tɑsɑ sɩ: Tɑcɑɑ tɑ lǝsɩ ɩnɩ tɔtɔ.

¹⁰Ḿpʋ́ɣʋ́ ɩ yɑɑ ɩ pǝyɑlɑɑ nɑɑtosompɔɣɔlɑɣɑ ɩnɩ ɩ tǝnɑ, nɑ Sɑmiyɛɛlɩ tɔ sɩ: Tɑcɑɑ tɑ lǝsɩ pɑ tɑɑ nɔɣɔlʋ.

¹¹Ɩlɛnɑ Sɑmiyɛɛlɩ pɔɔsɩ Sesee sɩ: Nyɑ́ pǝyɑlɑɑ tǝnɑ ntɛ́? Ḿpʋ́ɣʋ́ sɩ pǝ kɑɑsɑ tǝnʋɣʋ, kʋlɛ kʋ polɑ ntiɣile kɛ́. Ntɛnɑ Sɑmiyɛɛlɩ sɩ: Tili ɩ wɑɑlɩ. Mpi tɔ, tǝ kɑɑ cɑɑlɩ kɔtɑɣɑ tɔɣɔnɑɣɑ tɔɣɔʋ nɑ ɩ́ tɑ kɔntɑ.

¹²Ntɛnɑ pɑ́ tili ɩ wɑɑlɩ. Ɩ ɩsɛntɑɑ kɑ hɛtɑɑ kɛ́ nɑ pǝ́ lɩɩwɑ, nɑ ɩ wɛnɑ ɑlɑɑfǝyɑ. Ntɛnɑ Tɑcɑɑ tɔ Sɑmiyɛɛlɩ sɩ: Ɩnǝɣǝlɛ, kʋlɩ nɑ ń pǝlɩ-ɩ nim ɩlɛ.

¹³Ḿpʋ́ɣʋ́ Sɑmiyɛɛlɩ kpɑɣɑ nim nɑ hǝlʋɣʋ nɑ ɩ́ pǝlɩ-ɩ ɩ tɑɑlʋnɑɑ ɩsɛntɑɑ. Tǝnɑɣɑ Tɑcɑɑ Feesuɣu tii Tɑfiiti tɔɔ kɛ́ pǝ kpɑɣɑʋ kʋyɑŋku tɔ nɑ pǝ́ puki. Ɩlɛnɑ Sɑmiyɛɛlɩ nɑ́ɑ́ kʋlɩ nɑ ɩ́ mǝlɩ ɩ tɛ Lɑmɑ.

¹⁴Ḿpʋ́ɣʋ́ Tɑcɑɑ lǝsɑ ɩ Feesuɣu kɛ Sɑyuli tɑɑ, nɑ ɩ́ tʋ-ɩ lǝmɑɣɑsǝlɛ ɩsɑɣɑlɛ nɑ tǝ́ cɔɔsǝɣɩ-ɩ.

¹⁵Ntɛnɑ ɩ tǝmlɛ nyǝ́mɑ tɔmɩ-ɩ sɩ: Nyǝnɩ, Tɑcɑɑ tʋ nyɑ́ tɑɑ kɛ́ lǝmɑɣɑsǝlɛ ɩsɑɣɑlɛ nɑ tǝ́ cɔɔsǝɣɩ-ŋ.

¹⁶Mpʋ tɔ, wulɑʋ, yele nɑ tǝ́ pɛɛkɩ-ŋ yʋlʋ wei ɩ nyǝmɑ́ cǝmʋɣʋ mɑpʋ kɛ teu tɔ. Ye lǝmɑɣɑsǝlɛ ɩsɑɣɑlɛ ɩ́ kʋlɑ nyɑ́ tɔɔ, ɩlɛ ɩ mɑ-ŋ cǝmʋɣʋ nɑ pǝ́ hɛɛsɩ nyɑ́ lɑŋlɛ.

¹⁷Mpʋɣʋlɛ Sɑyuli sɩ: Pǝ wɛ teu. Ɩ́ pɛɛkɩ-m kʋpɑŋ nɑ ɩ́ kɔnɑ.

¹⁸Tǝnɑɣɑlɛ tǝmlɛ nyǝ́mɑ tɑɑ nɔɣɔlʋ tɔmɑ sɩ: Mɑ nɑwɑ Pɛtǝlɛhɛm tʋ Sesee pǝyɑlɑɑ tɑɑ nɔɣɔlʋ, nɑ ɩ́ nyǝ́mɑ́ cǝmʋɣʋ mɑpʋ kɛ teu. Pǝ́cɔ́ ɩ kii ɩfepu kɛ́ nɑ ɩ́ wɛ kpelikpekɑ, nɑ ɩ nyǝmɑ́ yoou tɔm. Pǝyele ɩ nyǝmɑ́ tɔm yɔɣɔtʋɣʋ kɛ́. Ɩɩ yɔɣɔtǝɣɩ yem yem, nɑ ɩ ɩsɛntɑɑ lɩɩwɑ, nɑ Tɑcɑɑ wɛ ɩ wɑɑlɩ.

¹⁹Mpʋɣʋlɛ Sɑyuli tilɑɑ nɑ ɩ heeli Sesee sɩ: Kɔnɑ-m nyɑ́ pǝyɑlʋ Tɑfiiti wei ɩ tiikiɣi heeŋ tɔ.

²⁰Ntɛnɑ Sesee cɑɑ kpɑŋɑɣɑ, nɑ ɩ́ sʋkɩ-kɛɣɛ tɔɣɔnɑɣɑ, nɑ sʋlʋm huluŋ, nɑ pǝfɑtɛ nɑ ɩ́ tilinɑ Tɑfiiti sɩ ɩ́ ponɑ Sɑyuli.

²¹Tɑfiiti tɑlɑɑ nɑ ɩ́ sʋʋ Sɑyuli tǝmlɛ tɑɑ, ɩlɛnɑ ɩ́lɛ́ ɩ luɣu lɑpɩ-ɩ nɑ ɩ́ kpɑ-ɩ ɩ yoou wontu tɔkʋlʋ.

²²Ntɛnɑ Sɑyuli tili nɑ pɑ́ heeli Sesee sɩ: Mɑ luɣu lɑpɑ nyɑ́ pǝyɑlʋ ɩnɩ, yelinɑ-m-ɩ.

²³Wɑɑtʋ wei lǝmɑɣɑsǝlɛ ɩsɑɣɑlɛ ɩ́ kɔmɑ Sɑyuli tɑɑ, ɩlɛ Tɑfiiti kpɑɣɑ cǝmʋɣʋ nɑ ɩ́ mɑpɩ-ɩ nɑ pǝ́ cɛ ɩ tɔɔ nɑ ɩ lɑŋlɛ hɛɛ.