1Dikiri pì Samuɛlinɛ: Ĩnigↄ̃ ↄ́ↄ dↄ Solu yã musu ari bↄrɛmɛɛ? Ma ginɛ à kí ble Isarailanↄa. Ǹ nísi ká bɛ̃nɛn à pa ǹ da zɛ́n. Ma n zĩ Bɛtilihamu gbɛ̃ Yɛsɛ kĩnaa, zaakũ a nɛ́nↄ doken ma sɛ̀ à gↄ̃ kína ũ.
2Akũ Samuɛli pì: Deran mani kɛ mà gɛ́ gwee? Tó Solu mà, ani ma dɛ. Akũ Dikiri pìnɛ: Ǹ zùnunu sɛ́ ǹ gɛ́o ǹ pi n su ma gbagbamɛ.
3Ǹ Yɛsɛ sísi sa pì onaa gũn, mani yã kũ ĩni kɛ onnɛ, ĩni nísi kúmɛnɛ gbɛ̃ kũ mani mↄnnɛ mìia.
4Samuɛli yã kũ Dikiri òarɛ kɛ̀. Kũ àtɛn ká Bɛtilihamu, lakutu pì gbɛ̃ zↄ̃kↄ̃nↄ gɛ̀ɛ ò dàalɛ. Vĩna ń kũ, akũ ò a là ò pì: Aafiaamɛ n su la yá?
5À pì: Aafiaamɛ. Ma su Dikiri gbagbamɛ. À gbã̀ bo á zĩdanɛ à gɛ́ kũmao sa o. Akũ à gbã̀ bò Yɛsɛnɛ kũ a nɛ́gↄ̃gbɛ̃nↄ à ń sísi sa'onaaa.
6Kũ ò kà, Samuɛli Ɛliabu è, akũ à laasun lɛ̀ à pì: Gbɛ̃ kũ Dikiri sɛ̀ mɛ́ à zɛna a arɛ gwe.
7Akũ Dikiri pìnɛ: Ǹsun a zɛna ke a gbã̀nakɛ gwaro, ma giimɛ. Madì gbɛ̃ gwa lákũ bisãsiri dì gwa nàro. Bisãsiri dì gbɛ̃ gwa a mɛ̀ɛamɛ, makũ sↄ̃, swɛ̃̀ɛn madì gwa.
8Akũ Yɛsɛ Abinadabu sìsi, à sù Samuɛli arɛ, akũ à pì: Dikiri dí gbɛ̃ díkĩna sɛ́ro.
9Akũ Yɛsɛ Sama sìsi, à sù Samuɛli arɛ dↄ, akũ à pì: Dikiri dí gbɛ̃ díkĩna sɛ́ro.
10Akũ Yɛsɛ a nɛ́gↄ̃gbɛ̃ gbɛ̃nↄn supplanↄ sìsi, ò sù Samuɛli arɛ, akũ à pì: Dikiri dí ń gbɛ̃ke sɛ́ro.
11Akũ à Yɛsɛ là à pì: N kɛfɛnnanↄ lɛ́n dí ń pínki yá? À wèa à pì: Ń gbɛ̃ kpɛde mɛ́ à kú laro, àtɛn sã dãmɛ. Akũ Samuɛli pìnɛ: Ǹ gbɛ̃ zĩ ò a sísi. Óni pↄ́ke kɛro séto à sù.
12Akũ à gbɛ̃ zĩ̀a, à sù. Nɛ́ pì bi gbɛ̃ tɛ̃ramɛ, a pɛtɛna mana akũsↄ̃ a ãn kɛ̃kↄ̃ana. Akũ Dikiri pì: Ǹ futɛ ǹ nísi kú a mìia, zaakũ àpiin gwe.
13Akũ Samuɛli bɛ̃nɛ pìi sɛ̀ à nísi kù a mìia a vĩ̀ninↄ wára. Zaa zĩ birean Dikiri Nini sù Daudaa. Abire gbɛra Samuɛli ɛ̀ra à tà Rama.
14Dikiri Nini gò Solua, akũ Dikiri tò tãna pãsĩ sùa.
15A ìbanↄ pìnɛ: Luda tò tãna pãsĩ tɛn wɛ́ tãmma.
16Kína, ǹ tó ókↄ̃nↄ n ìbanↄ ò gbɛ̃ kũ à mↄrↄlɛna dↄ̃ wɛtɛ. Tó Luda tò tãna pãsĩ pìi sùmma, anigↄ̃ mↄrↄ lɛ́nnɛ, ń le ǹ kɛ sã̀na.
17Akũ à pì a ìbanↄnɛ. À gbɛ̃ kũ à mↄrↄlɛna dↄ̃ manamana wɛtɛ à su kãaomɛnɛ.
18Akũ a ìbanↄ doke pìnɛ: Ma Bɛtilihamu gbɛ̃ Yɛsɛ nɛ́ ke è, à mↄrↄlɛna dↄ̃. Zĩ̀kari wↄ́rↄgↄdemɛ, akũsↄ̃ à yã'ona dↄ̃. Gↄ̃ manamɛ, akũsↄ̃ Dikiri kú kãao.
19Akũ Solu gbɛ̃nↄ zĩ̀ Yɛsɛa, ò gɛ̀ɛ ò pìnɛ: Solu pì ǹ n nɛ́ Dauda kũ àdi sãnↄ dã gbarɛarɛ.
20Akũ Yɛsɛ burodii dì zaakinɛ kũ sèwɛ̃o tùru do kũ blèkofĩninɛ bↄ̀rↄↄo, à a nɛ́ Dauda gbàrɛo Solua.
21Kũ à kà Solu kĩnaa, à gↄ̃̀ a zĩkɛri ũ. Solu yei manamana, akũ à a dìtɛ a zĩ̀kapↄnↄsɛrinↄ doke ũ.
22Akũ Solu gbɛ̃ zĩ̀ Yɛsɛa à pì: Ǹ tó Dauda gↄ̃ ma zĩkɛri ũ, zaakũ a yã dì kɛmɛnɛ nna.
23Tó Luda tò tãna pìi sù Solua, akũ Dauda dì a mↄrↄ sɛ́ àgↄ̃ lɛ́nɛ. Tó tãna pìi gòa, akũ àdi kɛ sã̀na, à su a laakariia.
