Sɑmiyɛɛlɩ I 28

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ḿpʋ́ɣʋ́ Filiisi nyǝ́mɑ kotɑ pɑ yoolɑɑ tintikɑ sɩ pɑ yookinɑ Ɩsɛɣɛlɩ nyǝ́mɑ. Ɩlɛnɑ Akisi pɔɔsɩ Tɑfiiti sɩ: Ntɔŋ n nyǝ́mɑ sɩ nyɑnɑ nyɑ́ yǝlɑɑ ɩ kɑ sǝnɑ-m nɑ tǝ́ yoonɑ Ɩsɛɣɛlɩ nyǝ́mɑ nɑ?

²Ntɛnɑ Tɑfiiti cɔ-ɩ sɩ: N kɑ́ nɑnɑ nyɑ́ ɩsǝpǝle kɛ nti mɑɑ lɑ tɔ. Kɛlɛnɑ Akisi sɩ: Wɑɑtʋ ɩnǝɣɩ mɑɑ yele nɑ ń tɑŋǝɣɩ mɑ mɑɣɑmɑɣɑ kɛ tɑm tɔɔ.

³Sɑmiyɛɛlɩ kɑ tɛmɑ sǝpʋ nɑ Ɩsɛɣɛlɩ nyǝ́mɑ pimi-ɩ ɩ tɛ Lɑmɑ. Hɑlɩ pɑ́ cɑɣɑ ɩ lǝyɑɣɑ. Pǝyele Sɑyuli kɑ tɔɣɔnɑ kɔɣɔnɑmǝŋ sʋsǝlɑɑ, nɑ pee pɔɔsǝlɑɑ tǝnɑɣɑ ɩ tɛtʋ tɑɑ kɛ́.

⁴Ḿpʋ́ɣʋ́ Filiisi yoolɑɑ kotɑɑ nɑ pɑ́ siki Sunem, nɑ Sɑyuli nɑ́ɑ́ koti Ɩsɛɣɛlɩ nyǝ́mɑ tǝnɑ nɑ pɑ́ siki Kilipʋwɑ.

⁵Sɑyuli nɑwɑ kolontunɑɑ yoolɑɑ pɑɣɑlɛ, ɩlɛnɑ sɔɣɔntʋ kpɑ-ɩ nɑ ɩ́ seliɣi ɩsɩɩ lʋm tɑɑ kpɑtɛ.

⁶Ɩlɛnɑ ɩ́ yɔɣɔtǝnɑ Tɑcɑɑ. Amɑ ɩ́lɛ́ ɩ tɑ cɔ-ɩ. Pɑɑ toosee tɑɑ, pɑɑ kɔtǝlɑɑ mɑɣɑsʋɣʋ tɑɑ. Pǝyele Ɩsɔ kʋyɔɣɔtʋtʋ tɛlǝsǝlɑɑ nɔɣɔlʋ ɩ tɑ heeli-ɩ sɩ pʋlʋ.

⁷Ntɛnɑ ɩ́ tʋ́ nɔɣɔ sɩ pɑ́ pɛɛkɩ-ɩ ɑlʋ wei ɩ sʋsǝɣɩ kɔɣɔnɑmǝŋ tɔ nɑ ɩnɩ ɩ polo ɩ kiŋ. Ɩlɛnɑ ɩ wɑɑlɩ nyǝ́mɑ heeli-ɩ sɩ: Alʋ nɔɣɔlʋ ɩ wɛ An-Tɔɔɔ nɑ ɩ́ sʋsǝɣɩ.

⁸Ahoo yuwɑ ɩlɛnɑ Sɑyuli lɑɣɑsɩ wontu, nɑ ɩ́ kpɑɣɑ ɑpɑlɑɑ nɑɑlɛ nɑ pɑ́ polo ɑlʋ ɩnɩ ɩ kiŋ. Ḿpʋ́ɣʋ́ Sɑyuli tɔmɑ-ɩ sɩ: Mɑ cɑɑ sɩ ń yɑɑ-m ɑtɛtʋ wei mɑɑ kɛɛsɩ-ŋ tɔ nɑ ɩ́ heeli-m mɑ nyʋɣʋ tɔm.

⁹Ḿpʋ́ɣʋ́ ɑlʋ pɔɔsɑ-ɩ sɩ: Ntɔŋ n nyǝmɑ́ sɩ Sɑyuli tɔɣɔnɑ kɔɣɔnɑmǝŋ sʋsǝlɑɑ, nɑ pee pɔɔsǝlɑɑ tǝnɑɣɑ ɩ tɛtʋ tɑɑ? Ɩlɛ pepe tɔɔ kɛ́ n nyǝkɩ-m kɑtɔkɑ sɩ ń kpɑ-m nɑ pɑ́ kʋ-m.

¹⁰Ntɛnɑ Sɑyuli yɔɣɔtɩ nɑ ɩ tuu sɩ: Nɑ Ɩsɔ, pʋlʋ kɑɑ lɑ-ŋ.

¹¹Ntɛnɑ ɑlʋ pɔɔsɩ-ɩ sɩ: Aweɣe n cɑɑ sɩ mɑ́ yɑɑ? Sɑyuli sɩ yɑɑ Sɑmiyɛɛlɩ.

¹²Wɑɑtʋ wei ɑlʋ nɑwɑ Sɑmiyɛɛlɩ, ɩlɛnɑ ɩ́ mɑ́ kɑpukɑ nɑ ɩ́ tɔ́ Sɑyuli sɩ: Hei, sɛsɛ nyɑɣɑlɛ Sɑyuli nɑ ń puɣusu-m mpʋ?

¹³Ntɛnɑ wulɑʋ nɔɣɔ tǝkpɑʋ sɩ: Nyɑ́ lɑŋlɛ ɩ́ tɑɑ tɔ. N nɑ pʋlʋɣʋ? Ntɛnɑ ɑlʋ sɩ: Atɛtʋ nɔɣɔlʋɣʋ mɑ nɑɑkɩ nɑ ɩ́ lɩɩkǝnɑ tɛtʋ tɛɛ.

¹⁴Ɩlɛnɑ ɩ́ pɔɔsɩ-ɩ sɩ: Ɩ ɩsɛntɑɑ wɛ ɩsǝnɑ tɔɔ? Alʋ sɩ: Kʋkpɑtʋlʋ kɛ́, nɑ ɩ́ suu cɑpɑ. Tǝnɑɣɑ Sɑyuli cɛkǝnɑɑ sɩ Sɑmiyɛɛlɩ, nɑ ɩ́ hǝntɩ-ɩ ɑtɛ.

¹⁵Mpʋɣʋlɛ Sɑmiyɛɛlɩ pɔɔsɑ Sɑyuli sɩ: Pepe tɔɔ kɛ́ n cɑɑlǝɣɩ-m mpʋ? Ntɛnɑ Sɑyuli sɩ: Mɑ tɔm tɛmɑɣɑ. Mpi tɔ, Filiisi nyǝ́mɑ kɔmɑ-m yoonɑʋ. Pǝyele Ɩsɔ ɩɩ tɑsǝɣɩ-m yɔɣɔtǝnɑʋ. Pɑɑ toosee tɑɑ, pɑɑ Ɩsɔ kʋyɔɣɔtʋtʋ tɛlǝsǝlɑɑ ɩɩ heeliɣi-wɛɣɛ mɑ tɔm. Pǝ tɔɔ kɛ́ mɑ yɑɑ-ŋ sɩ ń heeli-m nti pǝ wɛɛ sɩ mɑɑ lɑ tɔ.

¹⁶Ntɛnɑ Sɑmiyɛɛlɩ pɔɔsɩ-ɩ sɩ: Tɑcɑɑ lɔ-ŋ nɑ ɩ́ pǝsɩ nyɑ́ kolontu, ɩlɛnɑ ń yɑɑkɩ mɑ́ suwe?

¹⁷Ɩsɩɩ Tɑcɑɑ kɑ heelɑ-ŋ nɑ mɑ kɛɛsɩ-ŋ tɔɣɔ ɩ lɑkɩ-ŋ. Ɩ lɛɛkɑ nyɑ́ kɑwulɑɣɑ nɑ ɩ́ hɑ-kɛɣɛ Tɑfiiti.

¹⁸N tɑ tɔkɩ Tɑcɑɑ tɔm nɑ ń kpiisi Amɑleke nyǝ́mɑ. Mpʋ pǝ tɔɔ kɛ́ Tɑcɑɑ lɑkɩ-ŋ ḿpʋ́ɣʋ́ sɑŋɑ.

¹⁹Cele ɩ kɑ́ tʋ nyɑnɑ Ɩsɛɣɛlɩ nyǝ́mɑ tǝnɑ kɛ Filiisi nyǝ́mɑ niŋ tɑɑ, nɑ nyɑnɑ nyɑ́ piyɑ ɩ kɑ́ lɑ sɔlʋnɑɑ.

²⁰Ḿpʋ́ɣʋ́ Sɑmiyɛɛlɩ tɔm ntɩ tǝ sʋsɑ Sɑyuli kɛ wɑtʋ nɑ ɩ́ yele ɩ tɩ nɑ ɩ́ fɑlɑ ɑtɛ tǝmʋlʋ ɩsɩɩ tɑɑʋ. Mpi tɔ, ɩ tɑɑ tɔɣɔ pʋlʋɣʋ kʋyɑkʋ ŋkʋ nɑ ɑhoo tǝnɑ, ɩlɛ ɩ tɔnʋɣʋ kɑ hoowɑɣɑ.

²¹Mpʋɣʋlɛ ɑlʋ ɩnɩ ɩ polɑ Sɑyuli kiŋ nɑ ɩ́ mɑɣɑnɑ-ɩ nɑ sɔɣɔntʋ pɩɩ-ɩ ḿpʋ́ɣʋ́ kɑtɑtǝlɑɣɑ. Ɩlɛnɑ ɩ́ tɔmɩ-ɩ sɩ: Tɑ cɑɑ, nyɑ́ pɛɛlɔ mɑ́, mɑ nɩɩnɑ-ŋ teu nɑ mɑ́ mʋ sǝm nɑ mɑ́ lɑ́ nti n heelɑ-m tɔ.

²²Mpʋ tɔ, yele mɑ́ hɑ-ŋ tɔɣɔnɑɣɑ kɛ pǝcɔ nɑ ń tɔɣɔ, nɑ pǝ́ cɛ nyɑ́ ɩsɛntɔɔ nɑ ń tʋ́ nyɑ́ mpɑɑʋ.

²³Ɩlɛnɑ Sɑyuli kisi sɩ ɩ kɑɑ tǝŋ pʋlʋ. Ḿpʋ́ɣʋ́ Sɑyuli wɑɑlɩ nyǝ́mɑ nɑ ɑlʋ ɩnɩ pɑ kɑɑnɑ-ɩ, hɑlǝnɑ ɩ́ kɔɔ ɩ kʋlɩ ɑtɛ nɑ ɩ́ cɑɣɑ kʋhǝntʋɣʋ tɔɔ.

²⁴Ḿpʋ́ɣʋ́ ɑlʋ kpɑ nɑʋ ɩfɑtɛ nte tǝ yɑsǝlɑ teu tǝlǝpǝlǝpɩ tɔɣɔ lɔŋ, nɑ ɩ́ kʋ nɑ ɩ́ tʋ pɛtɛpɛtɑsɩ.

²⁵Ɩlɛnɑ ɩ́ cɛlɑ Sɑyuli nɑ ɩ wɑɑlɩ nyǝ́mɑ nɑ pɑ́ tɔɣɔ. Ḿpʋ́ɣʋ́ pɑ kʋlɑ ɑhoo ɑnɩ nɑ pɑ́ kpe.