1Wofuŋzi Samue ʒiŋuc âzâcnewec: “Saulo e noni Israe ŋic jaŋere ŋicwofuŋ mi juocte hone suŋgiŋ ecnepo, irec go wemocte dameŋ ʒora ere busâqoc manahuc jukomec? Go bulimakao ʒuŋenao wokemaŋ qoŋgiŋketec hume rac. No Betelehem ŋic Isairao sorecgukopac. No nahac ŋokâfâc‐ticne jaŋere ŋondeŋkonec ŋicwofuŋ moc rowosâepo.”
2Eme Samuezi muwec, “No weniŋuc rapemu? Rape Saulozi biŋe manarâ nuocmu.” Mume Wofuŋzi muwec, “Go bulimakao motecne moc rorâ rahuc ʒiŋuc muzemec: ‘No Wofuŋ taha bacnepemurâ warekopac.’
3Erâ taha bacmu dameŋ ira Isai wâc hefârezemec. Eme no ira wiac weniŋuc ecmu i gowatupemu. Erâ ŋic moc gowatupe nore biŋe wokemaŋ ruacnezemec.”
4Eme Samue e Wofuŋzi mutâcnecnewec irec sâc erâ Betelehem haeo ra fisiwec. Ra fisime hae irec soŋaŋ jaŋe hâwic‐jopame ʒocnehec erao fisirâ mumbiŋ, “Go wemocte warekomec? Wiac sasawa sâcne me?”
5Wiopie Samuezi muwec, “Sâcne. No Wofuŋ taha bacnepemurâ warekopac. Ŋoŋe maŋ sahac‐ŋeŋic emasaŋkerâ nohec taha bazo ranaŋ.” Eme Samue e Isai â ŋokâfâc‐ticne jaŋerao eemasaŋ gie barâ taha baniŋte hefârec‐jopawec.
6Eme jaŋe fisipie Samuezi Eliaba honerâ ʒiŋuc manasuwec: “Wofuŋte maio fuakac ŋic ʒi hâcne ŋicwofuŋ juocte wokemaŋ ruacnezo.”
7Ehame Wofuŋzi Samue ʒiŋuc âzâcnewec: “Go sahac hawari‐ticne â ʒoʒora‐ticnere sawa boc mi fic. No ere mi enarekac. Wofuŋ no ŋiczi honeekac iŋuc mi honeekopac. Ŋiczi sahac hohone sawa â Wofuŋ noni ine maŋ hohone.”
8Eme Isaizi Abinada hefârehuc ecneme Samuerao fuawec. Fuame Samuezi muwec, “Wofuŋ ʒi wâc mi rowosâewec.”
9E iŋuc mume saizi Sama ecneme Samuere maio fuame muwec, “Wofuŋzi e wâc mi rowosâewec.”
10Eme Isai e ŋokâfâcne 7 jaŋe ejareme Samuerao fua‐fârembiŋ. Eme Samuezi Isai ʒiŋuc âzâcnewec: “Wofuŋzi keci jaŋe mi rowosâec‐jopawec.”
11Erâ Isai ʒiŋuc muhuc wiocnewec: “Ŋokâfâcge ʒi sawa me?” Mume Isaizi muwec, “Ʒâhec motec jâmbâŋ e jukac, erâ e ine lama soŋaŋ‐jopahuc jukac.” E iŋuc mume Samuezi ʒiŋuc âzâcnewec: “Kiŋaŋ sorec‐jopatec ra jowa wareniŋ. Eki ʒira fisime jaha waha ŋenaŋmu.”
12Eme Isaizi kiŋaŋ sorec‐jopame ra jowa warembiŋ. Dawidi e ʒâŋe mai‐ticne â sahac hawari‐ticne i biaŋne jâmbâŋ. Eme Wofuŋzi muwec, “Ajoc, ŋic ʒi hâcne wokemaŋ ruacnec.”
13Eme Samuezi wokemaŋ ʒuŋe i rorâ hahacfac‐ticne jaŋe honehapie Dawidi ruacnewec. Ehame Wofuŋte Mârozi dameŋ ira hâcne fuŋkerâ tâpirihec neŋgoc ŋesiŋ ecnewec. Eme Samue e faharerâ Rama haeo risiewec.
14Ehame Wofuŋte Mârozi Saulo beheme Wofuŋzi mâro sâqocne moc manacneme dameŋ sâc ba imac ecnehuc juwec.
15Iŋuc ecnehuc jume kiŋaŋ qaqafâc‐ticne jaŋe ʒiŋuc âzâcnembiŋ: “Manakic, ʒi Anutuzi mâro sâqocne moc ecneme eki ba imac egarehuc jukac.
16Irec bomboŋ‐nâŋec, go kiŋaŋ qaqafâcge juŋgopeneŋ ʒi nâŋe enâretec gita qaqa saric ŋic moc bâfuanaŋte babasa gie banʒepeneŋ. Eme Anuturaonec mâro sâqocnezi gorao fuame ŋic eki gita qame go mocwâc biaŋkecmu.”
17Iŋuc mupie Saulozi kiŋaŋ qaqafâc‐ticne ʒiŋuc jazawec: “Ŋoŋe ŋic moc gita qaqa saric e bâfua‐narerâ norao jowa wareniŋ.”
18E iŋuc mume kiŋaŋ qaqafâc‐ticne jaŋeraonec ŋic moczi dâŋ ʒiŋuc bâtikiecnewec: “Manakic, no Betelehem ŋic moc ʒâŋene Isai ere ŋokâ moc honeekopac. Ŋic e gita qaqa saric. E ŋic tâpirihec â ʒikafac, e dâŋ mumu‐ticne i biaŋne, erâ wâc sahac hawari‐ticne biaŋne. Erâ Wofuŋzi ehec jukac wâc.”
19Irec Saulozi Isairao kiŋaŋ sorec‐jopahuc muwec, “Ŋokâge Dawidi lama soŋaŋ‐jopahuc juekac e râe‐naretec wareoc.”
20Eme Isai e doŋgi moc rorâ poroŋ â waiŋ ʒopo moc, erâ noniŋ motecne moc, iŋuc ŋokâ‐ticne Dawidizi Saulorao baraocte râewec.
21Eme Dawidi e Saulorao fisirâ kiŋaŋ gie‐ticne fuŋkewec. Ehame Saulozi ere boc ecneme maro babaju‐ticne erâ juwec.
22Eme Saulozi Isai dâŋ râecnehuc ʒiŋuc muwec: “Dawidi e norao juzejec. No ere mâretec aŋacnu sâqorekac.”
23Eme dameŋ sâc Anutuzi mâro sâqocne ecneme Saulorao fuame Dawidizi gita‐ticne rorâ qajujec. Iŋuc eme mâro sâqocnezi Saulo beheme mana aŋac ehuc biaŋne juwec.
