1Siikhu moote Yinsa eetta olompa vahali vaya apho, eeshiyeevo mmote wa anakhiyoni awe khuri: “Mbwana, oninozele olompa nkhama etthiipile Yaahaya Namoosa na-ye awaanozeliyeezo anakhiyoni awe.”
2Aphano, Yinsa khuwooza yoori: “Amana mwilompaka mwisala mwiri toono: Papeetthu, littitthimisiwe nzina lawo loottakatthifu. Wiishushe Ofwalume awo.
3Oninkhe wakhula siikhu etthu-yoojiwa ninhithajiyaaye.
4Oniswaamihi twampi zetthu, nkhama etthiipi na-fweyo nininswaamihaaye wakhula otule annikosaaye. Ohinilikhelele nizayiniwaka ti sheethwani, ila onuusuru khwa vitthu zootakhalaa.”
5Yinsa khuwooza theenya yoori: “Nkaakanyerelani mmote wa-mweyo anlankhaaye osikhu layili, khulawa ompiyela nlako swaahipu awe araka: ‘Swaahipu, kiipaashe phaawu ttatthu,
6mwaasa yoori eetta ota swaahipu aka onti na akina hatha etthu yoomwinkha.’
7Khi amana swaahipu enu oojipuni ari nnyupa mwawe araka: ‘Ohikantipu! Miiyo kafuka milako zaka, karapalela na aanaaka alala; akinwahi olankha yoori kuupatthise phaawu zaya.’
8Weekhweele miiyo kiniwuuzani yoori, hatha nkhama khatakheeni olankha yoori oopatthise phaawu mwaasa w'ooswaahipu, oniishela olankha na awinkhe zooshi onhithajiyaazo mwaasa wa nthiti.
9Ti eto kiniwuuzaanini yoori: Mwiveke, mwintta winkhiwa; mweekese mwintta opattha; mwipiye nlako mwintta ofukuleliwa.
10Maana wakhula anvekaaye oninkhiwa, aneekesaaye ompattha, ampiyaaye nlako ontta ofukuleliwa.
11Paapa-ni mmote wa mweeyo anraaye mwanawe anvekeliye phaawu khumwinkha liwe? Ama anvekeliye swi khumwinkha nyookha?
12Wala anvekeliye laayi khumwinkha wenye?
13Moone, mweeyo wootakhala rooho mwinjuwa owenkha aaneenu vitthu zooshapweya, sapiseni Paapa wa pinkuuni khanziti owenkha Rooho Ttakatthiifu apale aninvekelaaye?”
14Siikhu moote, Yinsa aari omwiikara sheethwani mmwiili wa mwinyi mmote antotheliyeeyo ohittakhuli. Wakathi ansaruwiyeevo sheethwani otule, ye khwaaza ottakhula; apale aari omoonaaye khushanka.
15Ila atthu akina khusala alupa yoori: “Ye oniikara masheethwani na owahi wa Belezibuuli, mfwalume wa masheethwani.”
16Akinoko eetta omweeza, khusala anvekela alama moote ya pinkuuni.
17Yinsa khujuwa vitthu aari ofikhiraazo, khuwooza yoori: “Ofwalume woojaawanya khusala wuumana oniishelana otapanyeya, na ojama wa waawanyeya oniishelana wiisha.
18Nkhama Epiliisi eetta ojaawanya, ofwalume awe onttela wiiyavo toovi? Mweeyo mwinlupa yoori miiyo kiniikara masheethwani khwa owahi wa Belezibuuli.
19Nkhama pi etthiipo, khi aaneenu aniikara na owahi waani? Atthaapo pa yo anttelaaye wuuthoonyezani yoori khamwina shariya.
20Ila nkhama khweele masheethwani apa kiniikhara na owahi wa Nnyizinku, eto enthoonyeza yoori ofwalume wa Nnyizinku wafiya vakatthi venu.
21Ntthu woozivala na woojuumaanya, amana eekeselaka vaje vawe saaneene, mali zawe ziniiya zookholeleleya.
22Ila ntthu woozivala zayita ye, amana ankukuttela khunshintta ontta onnyakanya zaana zawe anroromelaazo athuule phantte ya mali zawe.
23Otule ahina vamote na-miyo oto ona lupattha na-miyo, otule ahinkusanyaaye na-miyo ontta omwaza.”
24Yinsa khurutela olupa yoori: “Sheethwani, amana alaamo mmwiili oneekesa puuro yoohiina maati yoori avumule, n'oohisikani puuro ye onlupa yoori kintta orutela mphule kaariimo.
25Amana aruti asikana nnyupa ori wooseeliwamo na wa waattaleliwamo,
26ontta oruti eettele masheethwani makinoko sapa ootepa zayita otule, aviremo asala eekhala nttumphule. Attaaphale ohaayi wa ntthu aya otule oniiya wootepa zayita omwanzo.”
27Yinsa eettaka olupa mattakhuzi apale, muukha mmote aari attaaphale khunyakula araka: “Wooshapweyiwa muukha otule oovokoliyeeyo khuwaamwisa.”
28Ila Yinsa khunjipu araka: “Ooshapweyiwa pi apale ansiilaaye nttakhuzi la Nnyizinku khushututela.”
29Wakathi atthu akusanyeyiyeevo vahali vamote, Yinsa khusala alupa yoori: “Atthu a leelo pi ootakhala rooho, anveka woona alama ya minjuza ila khanlawa othoonyeziwa hatha alama moote, yoohiiyi etile ya napiyu Yuunusa.
30Nkhama etthiipo Yuunusa eeyiyeeyo alama ya atthu a Neniive, na-ye Mwaana wa Pinaatamu onttela wiiya alama ya atthu a leelo.
31Siikhu ya khiyaama rayisi wa kusini onttela olankha awaaphuke atthu a aphano; maana ye alankha okhu wiisheliyeewo olumwenku oteela osiila ojuwa wa Seleyimaana, ila otu mwiriina apha anziti Seleyimaana.
32Siikhu ya khiyaama atthu a Neniive anttela wuuphukani mweeyo, maana yo athupwiya twampi zaya, n'oosiila tafusiiri epile aari olupaazo Yuunusa; otu mwiriina apha nasaapi anziti Yuunusa.”
33Yinsa khuvira alupaka yoori: “Khaavo ntthu ankhozaaye khantteya khuvitha ama khukhutela na yuuku, ila entthiiwa vahali wa wooneyavo yoori esala ewaamwasikhela apale anviraaye nnyupa.
34Khantteya ya mwiili maasho, amana maasho awo eeya oosaana, mwiili awo wooshi oniiya wa nuuru. Ila amana maasho awo ahiiyi saana mwiili awo oniiya n'yiiza.
35Wiiyane phoole na nuuru eto oriinaaye yoori ehiiye yiiza.
36Amana mwiili awo wooshi wiiyana nuuru khuhiina hatha phantte moote ya yiiza, oniiya woomwasikheliwa nkhama khantteya yuumwasikhelaka weeyo.”
37Wakathi Yinsa eeshiyeevo ottakhula, mfwarizeewu mmote khumuuza olawa oja owawe. Ye n'oofiya khwiikhala vameeza.
38Mfwarizeewu otule khushanka mwaasa woomoona Yinsa eettela oja woohinawi.
39Mbwana khuwooza yoori: “Mweeyo mafwarizeewu, mwinoosa koopho na parathu oje waya, ila rooho zenu zeetaala vitthu za omaasho kopho na zoohusuti.
40Alolo! Otule aattaliyeeyo oje khahi othuuto attaliyeeyo nkatthi?
41Khapula mwaaze winkha etile eriiye nkatthi wa rooho yenu nkhama zimola, toowo mwintta woona zooshi ziwiikhaleliyeni saana.
42Olaanikha pu weenu mweeyo mafwarizeewu, maana mwininkha lifunku lakhuumi mathapa na vitthu za nwoorotha, ila khusala mwitarawu shariya na pheta ya Nnyizinku! Mweeyo mwina yooretta vitthu epo woohilikhi phantte kiina.
43Olaanikha pu weenu mweeyo mafwarizeewu, wawuutuvelani puuro ya wiilokozi nnyupa woosifwiwamo Nnyizinku na ochelisiwa wa shitahavo vamwanttiwa.
44Olaanikha pu weenu mweeyo, mwiiyiyeeyo nkhama khapuri yoohooneyi anviraavo atthu vatulu vaya khuhijuwi.”
45Aphano namanozela wa kano mmote khunjipu Yinsa araka: “Khahiyo toowo! Mattakhuzi apo kinoona yoori annithoonya fweeyo.”
46Yinsa khuri: “Olaanikha pu weenu mweeyo anamanozela a kano, mwiniwaapwecherisaaye atthu mapwattha oolemela wala mweeyo mwihinwahaaye osapa na yaala yenu.
47Olaanikha pu weenu mweeyo mwiniwaajekelaaye khapuri zooshapweya manapiyu, atthaapale ooliiweeyo pi amarehemu apapazenu.
48Apho mweeyo mwinthoonyeza yoori mwinlawela oshaahiti wookhupalela epile apapazenu arettiyeeyo, yo awoola manapiyu, mweeyo khuwaajekela khapuri zooshapweya.
49Ti eto Nnyizinku alupiyeeyo nkatthi woojuwa wawe yoori: ‘Kinlawa kawaaperekhe manapiyu na maaswihaapa; yo anteela owoola, akina aweekarise.’
50Mwaasa wa manapiyu apa ooliiweeyo tokhiya olumwenku waazaka, atthu ooshi apa a leelo eti ana paathuli.
51Waaza taamu ya Apeele mpakha taamu ya Zakariya otule ooliiweeyo kharipu ya vaalitaari vaje wa nyuupa ya Nnyizinku. Kiniwuuzani yoori, atthu a leelo anlawa ahukhumwiwe mwaasa wa ethiito.
52Olaanikha pu weenu mweeyo anamanozela a kano, maana mwathuula efukulo yoojuwa, ila khuhivirimo na khuwaakhattaza apale aari otakhaaye oviramo.”
53Paata ya Yinsa olaavo aphale vaya, mafwarizeewu na anamanozela a kano khwaaza omuuzela vitthu za waatta ari ookatipukha.
54Yo aari onwazela shawuri yoori kusapi onalupa etthu, apatthe onlokoveza.
